1Bila itu gadoh sudah brenti, Paulus panggil murid-murid, dan habis dia nasihatkan dia-orang, dia kasi dia-orang slamat-tinggal, dan berjalan mau pergi Makadoniah.
2Dan bila dia sudah jalan trus sgala jajahan itu, sambil kasi banyak nasihat, dia masok tanah Grik.
3Bila dia sudah tinggal sana tiga bulan punya lama, orang Yahudi pakat mlawan dia, tempo dia mau blayer pergi tanah Suriah, sbab itu dia tntukan mau pulang trus Makadoniah.
4Dan yang hantar dia pergi sampai tanah Asiah, ia'itu, Sopater anak Purrus orang Biruya, dan deri antara orang Tisalonika, Aristarkus sama Sikundus; dan Gayus orang Darbi, sama Timotius; dan orang deri-pada tanah Asiah, ia'itu Tukhikus sama Trofimus.
5Ttapi ini orang smoa sudah berjalan dhulu, dan ada nantikan kita di Troas.
6Dan kita blayer deri Filipi kmdian deri-pada hari-raya makan roti ta'ragi, dan dalam lima hari kita berjumpa dia-orang di Troas; di situ kita tinggal ada tujoh hari punya lama.
7Hari yang pertama dalam itu minggo kita berhimpon mau pchah roti, dan Paulus punya maksud mau berjalan besok-nya, dan dia berchakap sama dia-orang, serta panjangkan perkata'an-nya sampai tngah malam.
8Dan ada banyak plita dalam itu bilek loteng, di mana kita sudah berhimpon.
9Ada satu orang muda, nama Yutukus, dudok di jndela, dan dia sudah tertidor llap skali; dan sambil Paulus lagi berchakap sbab llap tidor orang ini sudah jatoh deri loteng tiga tengkat, dan orang angkat dia, sudah mati.
10Paulus turun dan mniarap atas itu orang, dan sambil dia plok sama dia itu, Paulus kata, "Jangan buat gadoh, kerna ada lagi nyawa-nya."
11Bila dia sudah naik, dan pchah roti, serta makan dan berchakap sama dia-orang lama juga, sampai trang tanah, bharu dia berjalan.
12Itu orang muda dia-orang bawa pergi dngan hidop-nya, dan smoa-nya jadi bukan sikit hibur hati.
13Kita jalan dhulu, dan naik kapal blayer pergi Assus. Kita punya maksud mau ambil Paulus di sana, kerna dia sudah tntukan bgini, sbab dia sndiri mau jalan kaki.
14Bila dia jumpa sama kita di Assus, kita ambil dia naik kapal dan pergi Mitulene.
15Kita blayer deri situ, dan besok kita sampai tntang pulau Khius, lusa-nya kita singgah di Samus, dan tulat-nya sampai di Miletus.
16Kerna Paulus sudah tntukan jangan singgah di Ifisus, spaya dia jangan lengah di tanah Asiah, kerna dia mau chpat blayer, spaya kalau boleh dia nanti sampai Yerusalim waktu hari-bsar Pentekosta.
17Deri Miletus dia suroh orang pergi Ifisus panggil ktua-ktua eklisia.
18Bila dia-orang jumpa sama Paulus, dia kata sama dia-orang, "Kamu sndiri tahu, deri itu tempo bila sahya mula-mula masok tanah Asiah, apa macham sahya punya klakuan s-lama sahya ada sama-sama kamu,
19ia'itu bagimana sahya sudah jadi hamba k-pada Tuhan dngan s-habis-habis rndah hati, dan dngan ayer-mata, dan dngan pnchoba'an yang sahya sudah kna deri orang Yahudi punya pakatan:
20dan bagimana sahya t'ada smbunyikan deri-pada kamu satu apa pun yang berguna, ttapi sudah ajarkan kamu di dpan orang-banyak dan di masing-masing punya rumah,
21sambil bersaksi k-pada orang Yahudi sama orang Grik pun deri-hal tobat k-pada Allah dan perchaya dalam Tuhan kita Isa Almaseh.
22Skarang dngan hati sahya terpaksa sahya pergi Yerusalim, dngan ta'tahu 'ntah apa-kah nanti jadi sama sahya di sana:
23chuma ini saja yang Roh Alkudus bersaksi sama sahya dalam tiap-tiap negri, serta kata yang ikatan dan ksusahan ada nantikan sahya.
24Ttapi sahya t'ada bilangkan nyawa sahya jadi berherga k-pada diri sahya, asa sahya habiskan sahya punya pkerja'an, dan itu playanan yang sahya sudah trima deri-pada Tuhan Isa, ia'itu bersaksi atas injil deri-hal Allah punya anugrah.
25Skarang ingat-lah, sahya tahu kamu smoa t'ada nanti tengok muka sahya lagi, ia'itu kamu smoa yang antara-mu sahya sudah berjalan-jalan khabarkan hal kraja'an.
26Sbab itu sahya bersaksi k-pada kamu ini hari, yang sahya ada berseh deri-pada sgala orang punya darah.
27Kerna sahya t'ada smbunyikan deri-pada kamu pngajaran deri-hal smoa kahandak Allah.
28Jaga sama kamu punya diri sndiri, dan sama s-gnap kawan domba itu, yang dalam-nya Roh Alkudus sudah jadikan kamu bishop, spaya kamu boleh gombalakan eklisia Allah, yang dia sudah bli dngan dia sndiri punya darah.
29Sahya tahu, kmdian deri-pada sahya tinggalkan kamu, srigala yang garang-garang nanti masok antara kamu, dan t'ada dia-orang nanti kasehankan kawan domba itu:
30lagi deri antara kamu sndiri nanti terkluar orang-orang yang kata perkara yang putar-blit, dngan maksud mau tarek murid-murid itu ikut dia-orang.
31Sbab itu biar kamu jaga, dan ingat yang tiga tahun punya lama siang malam sahya t'ada brenti nasihatkan tiap-tiap orang dngan ayer-mata.
32Dan skarang sahya srahkan kamu k-pada Allah, dan k-pada perkata'an anugrah-nya, yang ada kuasa kasi kamu tgoh, dan kasi kamu psaka sama-sama dngan sklian orang yang sudah di-suchikan.
33Sahya blum pernah tma'a baik orang punya perak, atau mas, atau pakaian.
34Kamu sndiri tahu yang ini dua tangan sahya sudah bkerja buat blanja sahya, dan blanja orang yang bserta dngan sahya.
35Dalam smoa perkara sahya sudah tunjokkan satu tuladan, bagimana kamu pun patut bkerja bgini juga spaya tolong orang yang lmah, dan ingat perkata'an Tuhan Isa, bagimana dia sndiri sudah kata, 'Lbeh berkat kalau kasi deri-pada trima.'"
36Bila dia sudah berchakap bgini, dia berlutut dan minta do'a dngan dia-orang smoa.
37Smoa-nya mnangis banyak skali, serta plok Paulus punya lehir, dan chium sama dia,
38dngan susah-hati terlbeh skali sbab itu perkata'an yang dia sudah bilang yang dia-orang t'ada nanti tengok dia punya muka lagi. Habis itu dia-orang hantarkan dia pergi kapal.
<< Kisah Para Rasul 20 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel