1Bila kita sudah berchrai deri-pada dia-orang, kita blayer trus sampai pulau Kus, dan besok-nya sampai di pulau Rodus, dan deri situ sampai Patara:
2di sana kita dapat satu kapal yang mau sbrang pergi Foinike, dan kita naik itu kapal dan blayer.
3Bila kita sudah nampak Kuprus, kita tinggalkan itu pulau sblah kiri, serta blayer pergi tanah Suriah, dan turun darat di negri Tur: kerna di sana-lah kapal itu msti punggahkan muatan-nya.
4Bila kita sudah jumpa murid-murid kita tinggal di sana tujoh hari punya lama dan ini murid-murid kata sama Paulus, dngan Roh punya grak, jangan dia pergi Yerusalim.
5Dan bila sudah gnap hari kita tinggal di situ, kita berjalan pergi; dan dia-orang smoa dngan anak-bini-nya hantar sama kita sampai kluar negri; dan kita berlutut di tpi pantai serta minta do'a,
6dan kasi tabek satu sama lain: kmdian bharu kita naik kapal, dan dia-orang pulang masing-masing punya rumah.
7Bila sudah habis kita punya playeran deri Tur, kita sampai di Ptolma'is: kita kasi tabek k-pada sudara-sudara, dan tinggal sama dia-orang satu hari.
8Besok-nya kita berjalan, dan sampai di Kaisariah: dan kita masok rumah Filipus, yang jadi guru-injil dan satu deri-pada orang tujoh itu, dan kita tinggal sama dia.
9Ini orang ada ampat anak-prempuan, anak-dara lagi, yang bernabuat.
10Waktu kita tinggal sana brapa hari punya lama, satu nabi yang bernama Agabus turun deri Yahudiah.
11Dia datang k-pada kita, dan bila dia sudah ambil Paulus punya ikat-pinggang, dia ikatkan dia sndiri punya kaki-tangan, serta kata, "Bgini-lah Roh Alkudus sudah bilang, 'Orang Yahudi di Yerusalim nanti ikatkan bgini sama orang yang pakai ini ikat-pinggang, dan nanti srahkan dia k-pada orang bangsa-asing punya tangan.'"
12Bila kita dngar ini smoa, kita sama itu tmpat punya orang pun minta dia jangan pergi Yerusalim.
13Kmdian Paulus jawab, "Apa buat kamu mnangis dan pchahkan hati sahya? kerna sahya ada sdia bukan saja mau kna ikat, ttapi mau mati pun di Yerusalim, kerna nama Tuhan Isa."
14Bila dia ta'mau dngar, kita brenti, serta kata, "Biar-lah kahandak Tuhan jadi."
15Kmdian deri-pada itu ktika, kita kmaskan kita punya barang-barang dan berjalan pergi Yerusalim.
16Dan ada brapa murid-murid deri Kaisariah ikut sama kita, dan dia-orang bawa kita k-pada Mnason, orang Kuprus dan orang yang lama sudah jadi anak-murid, di rumah dia ini kita mau tumpang.
17Bila kita sampai Yerusalim, sudara-sudara itu sambot sama kita dngan suka-hati.
18Besok-nya Paulus sama-sama kita pergi jumpa Yakob: dan smoa ktua-ktua ada di situ.
19Bila Paulus sudah kasi tabek sama dia-orang, dia chritakan satu-satu sgala perkara yang Allah sudah jadikan antara orang bangsa-asing oleh dia punya pkerja'an.
20Dan dia-orang muliakan Allah bila dia-orang dngar ini, serta kata sama Paulus, "Sudara, angkau tengok brapa laksa punya orang sudah perchaya deri antara orang Yahudi; dan dia-orang smoa ada rajin ikut hukum-taurit:
21dan orang sudah khabarkan sama dia-orang deri-hal angkau, ia'itu yang angkau ajar smoa orang Yahudi yang tinggal antara orang bangsa-asing patut lpas deri Musa, dan lagi angkau kata orang jangan sunatkan dia-orang punya anak, dan jangan ikut kita punya adat.
22Jadi skarang apa macham hal? Dia-orang tntu nanti dngar yang angkau sudah datang.
23Sbab itu buat-lah ini perkara yang kita kata sama angkau: Ada sama kita ampat orang yang ada berniat:
24ambil dia-orang ini, suchikan angkau sndiri sama-sama dia-orang, dan bayerkan dia-orang punya blanja spaya dia-orang boleh chukor kpala: jadi smoa orang nanti dapat tahu yang itu chakap yang orang sudah khabarkan deri-hal angkau t'ada btul: ttapi angkau pun ada mlakukan diri dngan aturan, turut sperti hukum-taurit.
25Ttapi deri-hal orang bangsa-asing yang sudah perchaya, kita sudah kirim surat kasi kita punya bichara yang dia-orang patut jauhkan diri-nya deri-pada lauk datok, dan deri-pada darah, dan deri-pada daging binatang yang mati lmas, dan deri-pada zina."
26Habis itu, Paulus ambil itu ampat orang, dan besok-nya bila dia sudah suchikan dia punya diri sndiri sama-sama dia-orang, dia masok ka'abah, dan kasi tahu yang hari ksuchian itu sudah gnap, sampai itu tempo tiap-tiap orang itu sudah bawa dia punya persmbahan.
27Dan bila itu tujoh hari sudah hampir habis, orang-orang Yahudi deri Asiah tengok Paulus dalam ka'abah, dan dia-orang usutkan orang-banyak itu, dan pegang sama Paulus,
28serta bertriak-triak, "Hei orang Isra'el, mari tolong: ini-lah itu orang yang ajar sklian orang di mana-mana pun mlawan bangsa kita, dan hukum-taurit, dan ini tmpat; lagi pun dia sudah bawa orang Grik masok ka'abah, dan sudah najiskan ini tmpat suchi."
29Kerna dia-orang dhulu sudah tengok Trofimus orang Ifisus dalam negri sama-sama Paulus, dan dia-orang punya sangka Paulus sudah bawa dia-ini masok ka'abah.
30Satu-negri skali sudah jadi rioh-rndah, dan orang bangsa itu lari berkrumun: dan dia-orang pegang sama Paulus dan seretkan dia kluar ka'abah: dan itu juga orang tutop smoa pintu ka'abah.
31Dan ktika dia-orang choba mau bunoh dia, orang kasi khabar sama panglima pasokan soldado yang satu Yerusalim punya orang sudah jadi kachan.
32Dan dngan sgra dia ambil soldado sama hulubalang, dan berlari turun k-pada itu orang-banyak: dan dia-orang brenti pukol sama Paulus bila dia-orang tengok itu panglima sama soldado-soldado.
33Kmdian itu panglima datang dkat, dan pegang sama Paulus, serta suroh orang ikatkan dia dngan dua rantai: habis itu dia tanya dia siapa, dan apa dia sudah buat?
34Dan antara orang-banyak itu, s-tngah bertriak kata bgini, s-tngah kata bgitu: dan bila itu panglima ta'boleh tahu apa-apa dngan tntu deri sbab itu gadoh, dia suroh orang bawa Paulus masok kota.
35Dan ktika dia naik tangga, soldado-soldado angkat sama dia, sbab bgitu kras orang-banyak itu.
36Kerna sgala orang bangsa itu ikut sambil bertriak-triak, "Kasi dia mampus."
37Dan ktika orang bawa Paulus hampir masok kota, dia kata sama itu panglima, "Boleh-kah sahya chakap sikit sama tuan?" Dan dia kata, "Angkau tahu chakap Grik, ya?
38Bukan-kah angkau itu orang Masir yang dhulu sudah usutkan itu ampat-ribu pnyamon, dan ajat dia-orang pergi tanah sunyi?"
39Paulus jawab, "Sahya ini orang Yahudi deri Tarsus di tanah Kilikiah, anak negri yang bukan s-barang nama-nya: dan sahya minta tuan biar sahya berchakap sama orang bangsa ini."
40Bila dia sudah kasi izin, Paulus berdiri di atas tangga, dan lambai tangan sama orang bangsa itu: dan bila sudah snnyap skali, Paulus chakap k-pada dia-orang dalam bhasa Ibrani. Dia kata,
<< Kisah Para Rasul 21 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel