1Jadi, bila Festus sudah masok jadi gobernor negri itu, tiga hari kmdian dia pergi deri Kaisariah naik Yerusalim.
2Dan kpala-kpala imam dan kpala-kpala orang Yahudi trangkan sama dia Paulus punya fasal,
3serta minta sama dia spaya boleh dapat muka mlawan Paulus, dan spaya dia boleh suroh panggil Paulus pergi Yerusalim, dan dia-orang nanti mngadang mau bunoh dia tngah jalan.
4Ttapi Festus jawab yang Paulus ada dalam jel di Kaisariah, dan lagi pun dia sndiri nanti pergi sana ta'brapa lama lagi.
5Dia kata, "Sbab itu sgala orang yang ada kuasa antara kamu, mari turun sama sahya, dan kalau ini orang ada apa-apa salah, kamu boleh d'awa sama dia."
6Dan bila Festus sudah tinggal antara orang-orang itu t'ada lbeh deri-pada lapan atau s-puloh hari bgitu, dia turun pergi Kaisariah; dan besok-nya dia dudok di krusi bichara, dan suroh orang bawa Paulus.
7Dan bila Paulus sudah datang, orang-orang Yahudi yang sudah turun deri Yerusalim berdiri kliling dia, dan d'awakan dia banyak perkara yang brat, yang smoa-nya dia-orang ta'boleh trangkan:
8itu ktika Paulus kasi jawab, dan kata, "Satu pun t'ada sahya berdosa, baik k-pada hukum orang Yahudi, atau k-pada ka'abah, atau k-pada Kaisar pun."
9Ttapi sbab Festus mau chari pahala sama orang Yahudi, dia jawab sama Paulus, dan kata, "Angkau mau naik Yerusalim, spaya di sana kna bichara dpan sahya deri-hal ini smoa?"
10Ttapi Paulus jawab, "Sahya ada berdiri dpan krusi bichara Kaisar, di sini-lah tmpat yang sahya patut kna bichara: sama orang Yahudi sahya t'ada buat satu salah pun, sperti tuan sndiri tahu baik-baik.
11Jadi itu, kalau sahya sudah buat salah, dan sudah buat apa-apa yang sahya patut kna mati, bukan sahya ta'mau mati: ttapi kalau ini perkara smoa yang dia-orang d'awa sama sahya t'ada satu pun yang bnar, satu orang pun ta'boleh srahkan sahya sama ini orang smoa. Sahya minta mngadu sama Kaisar."
12Habis itu, bila Festus sudah berchakap sama dia punya orang bichara, dia jawab, "Angkau sudah minta mngadu sama Kaisar: k-pada Kaisar juga angkau nanti pergi."
13Lpas brapa hari, raja Agrippa sama Bernike sampai Kaisariah, mau kasi tabek sama Festus.
14Dan waktu dia-orang dua-dua tinggal sana brapa hari punya lama, Festus chritakan Paulus punya kesah k-pada itu raja, dan kata, "Ada satu orang di sini yang Felek sudah tinggalkan dalam jel:
15dan bila sahya ada di Yerusalim imam-imam-bsar dan orang Yahudi punya orang tua-tua trangkan dia punya hal, minta sahya hukumkan dia.
16Dan sahya jawab sama dia-orang, yang bukan adat orang Rom srahkan siapa pun, kalau blum itu orang yang kna d'awa s-muka sama orang yang d'awa dia, dan ada smpat kasi jawab deri-hal d'awa'an-nya.
17Sbab itu bila dia-orang sudah berhimpon di sini, sahya t'ada lengah lagi, dan besok-nya juga sahya dudok krusi bichara, dan suroh orang bawa itu orang.
18Dan bila orang-orang d'awa itu sudah berdiri, t'ada dia-orang bawa satu d'awa pun deri-hal perkara jahat yang sahya sudah sangkakan,
19chuma ada sikit perbantahan deri-hal dia-orang sndiri punya agama yang dia-orang bawa atas dia, dan deri-hal satu orang bernama Isa yang sudah mati, ttapi yang Paulus kata ada hidop.
20Dan sbab sahya jadi bingong ta'tahu bagimana mau preksa ini macham punya hal, sahya tanya kalau dia mau pergi Yerusalim, dan di sana kna bichara deri-hal ini smoa?
21Ttapi bila Paulus sudah minta mngadu, mau tanggoh spaya yang maha-mulia itu boleh putuskan bichara, sahya suroh jaga sama dia sampai sahya boleh hantarkan dia pergi k-pada Kaisar."
22Dan raja Agrippa kata sama Festus, "Sahya sndiri pun sudah ingat mau dngar ini orang." Festus kata, "Besok, tuan nanti dngar sama dia."
23Jadi besok-nya, bila Agrippa sudah datang, dan Bernike, dngan s-lngkap kbsaran-nya, dan bila dia-orang sudah masok tmpat bichara sama-sama panglima-panglima dan negri punya orang bsar-bsar. Festus suroh panggil Paulus, dan orang bawa dia masok.
24Dan Festus kata, "Ya raja Agrippa, dan sgala orang yang ada sama kita di sini, kamu tengok ini orang yang deri-hal-nya s-gnap bangsa Yahudi di Yerusalim dan di sini pun sudah mngadu dpan sahya, serta bertriak-triak yang dia t'ada patut hidop lagi.
25Ttapi bila sahya sudah dapat tahu yang dia t'ada buat apa-apa yang dia patut kna mati, dan bila dia sndiri sudah minta mngadu sama yang maha-mulia itu, sahya tntukan mau hantarkan dia pergi.
26Deri-hal dia ini sahya t'ada apa-apa yang tntu mau tulis sama raja itu. Sbab itu sahya bawa dia mnghadap tuan-tuan sklian, terlbeh skali dpan tuan-ku, ya raja Agrippa, spaya bila sudah habis preksa, boleh dapat apa-apa yang sahya boleh tulis.
27Kerna k-pada sahya punya sangka, jadi bodoh kalau kita kirim orang salah dngan t'ada trangkan d'awa'an-nya."
<< Kisah Para Rasul 25 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel