1Dan Sa'ul pun suka Stifanus kna bunoh. Dan itu hari sudah datang satu aniaya yang bsar atas eklisia yang di Yerusalim; dan smoa-nya chrai-brai pada sluroh tanah Yahudiah dan Samariah, chuma rasul-rasul saja t'ada.
2Dan orang berbakti tanamkan Stifanus, dan mratapkan dia banyak skali.
3Ttapi Sa'ul buat chlaka sama eklisia, masok rumah kluar rumah, dan seret orang, baik jantan baik prempuan, dan srahkan dia-orang masok jel.
4Jadi smoa-nya yang chrai-brai itu pergi sana-sini dan khabarkan perkata'an itu.
5Dan Filipus turun negri Samariah, dan khabarkan sama dia-orang deri-hal Almaseh.
6Dan dngan satu hati orang-banyak ingat baik-baik sgala perkara yang Filipus sudah katakan, bila dia-orang dngar dan tengok itu tanda-tanda yang dia buat.
7Kerna deri-pada banyak orang yang sudah kna jin yang najis, sudah terkluar itu jin serta bertriak dngan suara yang bsar: dan banyak orang sakit tepok dan orang tempang sudah di-smbohkan.
8Dan mnjadi ksuka'an bsar dalam itu negri.
9Ttapi ada satu orang bernama Simon, yang dhulu pakai obat-guna dalam itu negri, dan kasi orang bangsa Samariah itu hairan, dan katakan diri-nya orang bsar;
10dan smoa-nya, baik kchil baik bsar, pdulikan dia, dan kata, "Ini orang-lah itu kuasa Allah yang di-sbot Kuasa Bsar."
11Dan dia-orang pdulikan dia, sbab sudah lama dia kasi dia-orang hairan dngan dia punya obat-guna.
12Ttapi bila dia-orang sudah perchaya sama Filipus yang kasi khabar yang baik deri-hal kraja'an Allah dan deri-hal nama Isa Almaseh, dia-orang sudah di-baptiskan, jantan dan prempuan pun.
13Dan Simon pun perchaya: dan bila sudah baptis, dia ikut ttap sama Filipus; dan dia mnjadi hairan tengokkan itu tanda-tanda dan perkara hairan yang bsar yang sudah di-jadikan.
14Bila rasul-rasul yang di Yerusalim dngar yang Samariah sudah trima perkata'an Allah, dia-orang suroh Petrus dan Yahya pergi k-pada dia-orang.
15Bila dia-orang sudah turun di sana, dia-orang minta do'a kerna orang Samariah, spaya boleh trima Roh Alkudus:
16kerna Roh blum turun atas satu orang pun di antara dia-orang: chuma dia-orang sudah di-baptiskan k-dalam nama Tuhan Isa.
17Kmdian, itu dua rasul tarohkan tangan-nya atas dia-orang, dan dia-orang trima Roh Alkudus.
18Bila Simon tengok yang oleh taroh tangan rasul-rasul Roh Alkudus sudah di-brikan, dia bawa wang sama dia-orang,
19dan kata, "Kasi ini kuasa sama sahya pun, spaya atas barang-siapa yang sahya taroh tangan, dia boleh trima Roh Alkudus."
20Ttapi Petrus kata sama dia, "Pergi binasa angkau punya wang sama-sama angkau, sbab angkau sangka pmbrian Allah boleh di-bli dngan wang.
21Angkau t'ada ada bhagian atau psaka dalam ini perkara, kerna angkau punya hati t'ada btul dpan Allah.
22Sbab itu bertobat-lah kerna ini kjahatan angkau, dan minta do'a k-pada Tuhan, spaya barangkali angkau punya sangka-hati boleh di-ampunkan.
23Kerna sahya tengok yang angkau ini ada dalam hmpdu kpahitan dan ikatan kjahatan."
24Simon jawab dan kata, "Minta-lah do'a k-pada Tuhan kerna sahya, spaya jangan datang atas sahya satu pun itu perkara yang kamu sudah sbot."
25Sbab itu, bila Petrus dan Yahya sudah bersaksi dan mashhurkan perkata'an Tuhan, dia-orang pulang Yerusalim, dan khabarkan injil dalam banyak kampong orang Samariah.
26Ada satu mla'ikat Tuhan kata sama Filipus, "Bangun-lah, dan pergi k-sblah slatan, di jalan yang turun deri Yerusalim k-Gaza: jalan yang sunyi itu."
27Dan dia bangun pergi: dan ada satu orang Habshi, satu orang sida-sida yang pangkat bsar di bawah prentah Kandake, orang Habshi punya raja prempuan, dan yang pegang smoa herta-bnda-nya, dia datang Yerusalim mau smbahyang.
28Itu waktu dia ada berjalan pulang, dudok di dalam kreta-nya dan mmbacha kitab nabi Yash'aya.
29Dan Roh kata sama Filipus, "Pergi dkat, dan rapat sama itu kreta."
30Filipus lari k-pada itu orang, dan dngar dia bacha kitab nabi Yash'aya, dan dia kata, "Ada-kah tuan mngerti apa-apa tuan bacha?"
31Dia jawab, "Mana boleh, kalau t'ada orang artikan?" Dan dia minta Filipus naik dudok sama dia.
32Itu tmpat yang dia bacha deri kitab ada bgini: "Dia sudah di-bawa sperti domba mau kna smbleh; Dan sperti anak domba ada bisu dpan orang yang gunting bulu-nya, Bgitu juga t'ada dia buka mulut-nya:
33Dalam hal kahina'an-nya hukum yang adil sudah di-tolakkan sblah: Dan siapa-kah yang boleh chritakan dia punya jman? Kerna nyawa-nya di-ambil deri bumi."
34Itu sida-sida jawab sama Filipus, dan kata, "Sahya minta tanya sama tuan, deri-hal siapa ini nabi ada berchakap bgini? deri-hal diri-nya sndiri, atau deri-hal lain orang?"
35Dan Filipus buka mulut-nya, dan mula'i deri itu surat juga, dia khabarkan sama dia khabar yang baik deri-hal Isa.
36Dan s-tngah itu orang berjalan pada jalan itu, dia-orang datang k-pada satu ayer; dan itu sida-sida kata, "Tengok, sini ada ayer; apa-kah yang tahankan sahya jangan di-baptiskan?"
37[KOSONG]
38Dan dia suroh itu kreta brenti,dan dia-orang dua-dua turun dalam ayer, Filipus dan itu sida-sida; dan dia baptiskan sama dia.
39Bila dia-orang sudah naik deri dalam ayer, Roh Tuhan bawa Filipus pergi; dan itu sida-sida t'ada tengok sama dia lagi, sbab sida-sida itu berjalan pergi dngan suka-hati.
40Ttapi orang jumpa Filipus di Azotus, dan sambil dia lalu, dia khabarkan injil k-pada sgala negri-negri sampai dia datang di Kaisariah.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel