1Antara itu, ktika orang-banyak berhimpon berlaksa-laksa, sampaikan orang terpijak satu sama lain, Isa mula'i kata sama murid-murid-nya mula-mula, "Jaga kamu punya diri deri-pada orang Farisi punya ragi, ia'itu pura-pura.
2Ttapi t'ada satu pun yang tertutop, yang t'ada nanti di-nyatakan: dan yang tersmbunyi, yang t'ada nanti orang tahu.
3Sbab itu apa-apa yang kamu sudah katakan dalam glap, nanti orang dngar di dalam trang: dan apa-apa yang kamu sudah bisek di kuping dalam bilek, orang nanti khabarkan di atas gnting yang rata.
4Ttapi sahya kata sama kamu yang jadi sohbat sahya, jangan takot sama orang yang kasi badan mati, dan habis itu ta'boleh buat apa-apa lagi.
5Ttapi sahya mau tunjok sama kamu siapa yang kamu msti takot: takot-lah sama dia yang, bila dia sudah bunoh, ada kuasa boleh buangkan dalam nraka pula; ya, sahya kata sama kamu, takot-lah sama dia.
6Bukan-kah orang jual burong pipit lima ekor dua duit? dan t'ada satu ekor pun di-lupakan di dpan Allah.
7Ttapi sampai rambot kpala kamu smoa-nya sudah terhitong. Jangan-lah takot: kamu lbeh indah deri-pada banyak burong pipit.
8Dan sahya kata sama kamu, tiap-tiap orang yang nanti mngaku sama sahya dpan orang, sama dia-lah Anak-manusia nanti mngaku dpan mla'ikat Allah.
9Ttapi orang yang sangkalkan sahya dpan manusia, dia itu nanti di-sangkalkan dpan mla'ikat Allah.
10Dan siapa-siapa yang nanti chakap apa-apa mlawan Anak-manusia, dia boleh juga di-ampunkan: ttapi orang yang mnghujat sama Roh Alkudus, dia itu t'ada boleh di-ampunkan.
11Bila orang bawa kamu di dpan majlis rumah-smbahyang, dan dpan pnghulu-pnghulu, dan dpan orang bsar-bsar, jangan jadi khuatir fasal bagimana atau apa-kah kamu msti jawab, atau apa-kah kamu msti kata:
12kerna itu jam juga Roh Alkudus nanti ajarkan kamu apa kamu patut kata."
13Dan antara itu orang-banyak ada satu orang kata sama dia, "Hei guru, suroh-lah sudara sahya bhagikan psaka sama sahya."
14Ttapi Isa kata sama dia, "Hei kawan, siapa sudah jadikan sahya satu hakim atau orang yang bhagi herta atas kamu?"
15Dan lagi, dia kata sama dia-orang, "Ingat baik-baik, jaga kamu punya diri deri-pada sgala tma'a: kerna orang hidop bukan-nya deri-pada kmewahan herta-bnda-nya."
16Dan Isa katakan satu perumpama'an sama dia-orang, dan kata, "Ada satu orang kaya punya tanah kluarkan banyak hasil:
17dan dia berrondeng dalam diri-nya, dan kata, 'Apa sahya mau buat? sbab sahya t'ada tmpat mau simpankan buah-buahan sahya.'
18Jadi dia kata, 'Ini sahya mau buat: sahya nanti rubohkan smoa sahya punya gudang, dan naikkan yang lbeh bsar punya; dan di situ-lah sahya nanti simpankan sahya punya trigu dan herta.
19Dan sahya nanti kata sama jiwa sahya, "Hei jiwa, angkau ada banyak herta sudah tersimpan sampai banyak tahun punya lama; snangkan diri, makan-minum dan bersuka-suka."'
20Ttapi Allah kata sama dia, 'Hei orang bodoh, ini malam juga angkau punya jiwa nanti di-ambil deri-pada angkau; dan apa-apa yang angkau sudah siapkan nanti jadi siapa punya?'
21Bgitu-lah orang yang simpan herta kerna diri-nya sndiri, ttapi t'ada kaya k-pada Allah."
22Dan dia kata sama murid-murid-nya, "Sbab itu sahya kata sama kamu, jangan jadi khuatir deri-hal nyawa apa-kah kamu nanti makan, atau deri-hal kamu punya badan apa-kah kamu nanti pakai.
23Kerna nyawa lbeh deri-pada makanan, dan badan lbeh deri-pada pakaian.
24Ingat-lah burong gagak punya hal, dia t'ada mnabur, dan t'ada mnuai; sama dia t'ada gudang atau bangsal; dan Allah kasi dia makan: brapa lagi indah kamu ini deri-pada burong-burong!
25Dan siapa antara kamu dngan dia punya khuatir boleh lanjutkan umor-nya sikit pun?
26Sbab itu, jikalau kamu t'ada kuasa buat perkara yang kchil skali, knapa-kah kamu khuatir deri-hal yang lain-lain?
27Ingat-lah bunga bakong punya hal, bagimana dia bertumboh: t'ada dia kerja, t'ada dia pintal bnang; ttapi sahya kata sama kamu, mski pun Sulaiman dalam smoa dia punya kmulia'an t'ada berrias sperti satu kuntum bunga itu.
28Ttapi jikalau bgini Allah riaskan rumput di padang, yang ini hari ada, dan besok kna buang dalam dapur; brapa lagi kamu pula? hei kamu yang kurang perchaya.
29Dan jangan kamu ini chari-chari apa-kah kamu nanti makan, dan apa-kah kamu nanti minum, dan jangan kamu bimbang hati.
30Kerna smoa ini perkara sgala bangsa dunia ini ada chari: ttapi Bapa kamu tahu yang smoa ini ada berguna sama kamu.
31Dalam pada itu, chari-lah dia punya kraja'an, dan smoa ini perkara nanti di-tambahkan k-pada kamu.
32Jangan-lah takot, hei kawan domba yang kchil ini; kerna kamu punya Bapa berknan mau kasi itu kraja'an sama kamu.
33Jualkan apa-apa yang kamu ada, dan kasi sdkah; bikin kerna kamu punya diri pundi-pundi yang ta'boleh burok, satu herta yang t'ada putusan-nya, dalam shorga, di mana pnchuri t'ada datang, dan ggat t'ada binasakan.
34Kerna di mana ada kamu punya herta, di situ-lah ada kamu punya hati.
35"Biar-lah kamu punya pinggang berikat, dan plita kamu terpasang;
36dan kamu ini sperti orang yang nantikan tuan-nya bila dia pulang deri perjamuan kahwin; spaya bila dia sampai dan ktok pintu, dngan sgra dia-orang boleh bukakan kerna dia.
37Berkat-lah itu hamba smoa, yang tuan-nya berjumpa ada sdia berjaga bila dia datang: dngan sunggoh-nya sahya kata sama kamu, itu tuan nanti ikat pinggang sndiri, dan kasi itu orang smoa dudok meja, dan nanti datang layankan dia-orang.
38Dan jikalau dia datang dalam nombor dua punya waktu-jaga, atau nombor tiga punya, dan berjumpa bgitu juga, berkat-lah dia-orang.
39Ttapi baik kamu tahu ini, yang jikalau itu tuan-rumah sudah tahu mana jam pnchuri nanti datang, dia tntu sudah jaga, dan t'ada kasi rumah-nya kna orang tmbus.
40Baik kamu ini pun bersdia: kerna dalam satu jam yang kamu t'ada sangka Anak-manusia datang."
41Dan Petrus kata, "Ya Tuhan, ini perumpama'an Tuhan ada chakap sama kita-kah, atau sama smoa orang?"
42Dan Tuhan kata, "Siapa-kah itu juru-kunchi yang stiawan dan bijaksana, yang tuan-nya nanti kasi prentah atas isi-rumah-nya, mau bhagikan makanan masing-masing pada waktu yang patut?
43Berkat-lah itu hamba yang tuan-nya nanti berjumpa buat s-bgitu bila dia datang.
44Dngan s-btul-nya sahya kata sama kamu, dia nanti kasi dia prentah atas smoa apa-apa yang dia ada.
45Ttapi jikalau itu hamba kata dalam hati-nya, 'Sahya punya tuan ada lambat datang,' dan mula'i pukol sgala hamba jantan dan hamba prempuan pun, dan makan-minum sampai mabok;
46itu hamba punya tuan nanti datang dalam satu hari yang dia t'ada sangka, dan dalam satu jam yang dia ta'tahu, dan nanti ssah sama dia, dan tntukan bhagian-nya sama-sama orang yang t'ada stiawan.
47Dan itu hamba yang sudah tahu tuan-nya punya kahandak, dan t'ada bersdia, atau t'ada buat sperti dia punya kahandak, dia itu nanti kna pukol banyak;
48ttapi orang yang ta'tahu, dan sudah buat perkara yang patut kna ssah, dia itu nanti kna pukol sikit saja. K-pada barang-siapa orang kasi banyak, deri-pada dia-lah orang nanti chari banyak: dan k-pada barang-siapa orang srahkan banyak, deri-pada dia-lah orang nanti minta lbeh lagi.
49"Sahya sudah datang spaya champakkan api di atas bumi; dan apa-kah kahandak sahya? baik juga kalau sudah sdia terpasang.
50Ttapi sahya ada satu baptisan yang sahya msti di-baptiskan, dan brapa ssak hati sahya s-blum itu sudah di-sampaikan.
51Ada-kah kamu fikir sahya sudah datang mau kasi sjahtra di atas bumi? Sahya kata sama kamu, bukan; ttapi perslisehan:
52kerna deri-pada ini waktu nanti ada lima orang dalam satu rumah, smoa-nya bersliseh satu sama lain, tiga lawan dua, dan dua lawan tiga.
53Orang nanti bersliseh, bapa lawan anak, dan anak lawan bapa; mak lawan anak prempuan, dan anak prempuan lawan mak; mertua prempuan lawan mnantu, dan mnantu lawan mertua."
54Dan Isa kata sama orang-banyak pun, "Bila kamu tengok satu awan naik deri sblah barat, itu juga kamu kata, 'Hujan mau turun,' dan jadi bgitu.
55Dan bila kamu tengok angin-slatan tiop, kamu kata, 'Mau jadi panas-trek,' dan jadi bgitu.
56Hei orang pura-pura, kamu tahu trangkan bumi dan langit punya muka; ttapi bagimana pula kamu ta'tahu trangkan ini jman?
57Dan knapa deri-pada kamu punya diri kamu t'ada timbang mana yang bnar?
58Kerna sambil angkau ada berjalan sama-sama angkau punya musoh mau pergi mnghadap majistret, di tngah jalan juga, baik angkau usahakan diri mau dapat lpas deri-pada itu orang; spaya jangan dia seretkan angkau di dpan hakim, dan hakim pula nanti srahkan angkau k-pada mata-mata, dan mata-mata nanti masokkan angkau dalam jel.
59Sahya kata sama angkau, skali-kali angkau t'ada nanti kluar deri situ, kalau ada tertinggal satu duit pun yang angkau blum bayer."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel