1Dan smoa orang yang pungut chukai dan orang berdosa pun ada datang dkat Isa mau dngar sama dia.
2Dan orang Farisi dan orang pnulis bersungut-bersungut, kata, "Dia ini sambot orang berdosa, dan makan sama-sama dia-orang."
3Dan Isa katakan ini perumpama'an sama dia-orang, dan kata,
4"Mana satu orang antara kamu yang ada s-ratus ekor kambing, dan hilang s'ekor, t'ada nanti tinggalkan yang smbilan-puloh-smbilan ekor di tanah sunyi, dan pergi chari yang sudah hilang punya, sampai dapat?
5Dan bila dia sudah dapat, dia angkat di bahu-nya dngan suka-hati.
6Dan bila dia sampai rumah, dia panggil dia punya sohbat-sohbat sama orang sblah-mnyblah, dan kata sama dia-orang, 'Bersuka-lah sama-sama sahya, kerna sahya sudah dapat kambing sahya yang sudah hilang.'
7Sahya bilang sama kamu, bgitu-lah nanti ada ksuka'an di shorga atas satu orang berdosa yang bertobat, lbeh deri-pada atas smbilan-puloh-smbilan orang bnar, yang ta'usah bertobat.
8"Atau mana satu prempuan yang ada s-puloh kping wang, jikalau dia hilang satu kping, t'ada dia nanti pasang plita, dan sapu itu rumah, dan chari dngan rajin sampai dapat?
9Dan bila dia sudah dapat, dia panggil dia punya sohbat-sohbat sama orang sblah-mnyblah, dan kata, 'Bersuka-lah sama sahya, kerna sahya sudah dapat wang perak yang sudah hilang itu.'
10Sahya kata sama kamu, bgitu juga ada ksuka'an di dpan mla'ikat-mla'ikat Allah atas satu orang berdosa yang bertobat."
11Dan Isa kata, "Ada satu orang yang ada dua anak dlaki:
12dan yang kchil itu kata sama bapa-nya, 'Bapa, kasi-lah sahya bhagian herta itu.' Dan bapa itu bhagikan herta-nya sama dia-orang.
13Dan t'ada brapa hari kmdian, anak yang kchil itu kmaskan smoa dan jalan pergi negri jauh; dan di situ dia boroskan herta-nya dngan ta'ktahuan punya hidopan.
14Bila dia sudah blanjakan smoa, jadi satu klaparan yang bsar di dalam itu negri; bharu-lah dia mula'i mnjadi ssak.
15Dan dia pergi hubongkan diri-nya sama satu orang isi negri itu; dan itu orang pula suroh dia pergi di ladang piara babi.
16Dan dia beringin mau knnyangkan diri-nya dngan skam kachang yang babi makan punya: dan itu pun t'ada orang kasi sama dia.
17Ttapi bila dia sudah sdar diri, dia kata, 'Ah, brapa banyak orang-gaji bapa sahya dapat roti dngan kmewahan, dan sahya mati lapar di sini!
18Sahya mau bangun pergi k-pada bapa sahya, dan mau kata sama dia, "Ya bapa, sahya sudah berdosa k-pada Allah, dan dpan bapa:
19t'ada-lah lagi sahya layak di-sbot anak bapa: buatkan-lah sahya sperti satu deri-pada bapa punya orang-gaji."'
20Dan dia bangun pergi k-pada bapa-nya. Ttapi ktika dia lagi jauh, bapa-nya sudah tengok sama dia, dan hati-nya rasa ksian, dan dia lari plok anak-nya punya lehir, dan chium dia.
21Dan itu anak kata sama dia, 'Ya bapa, sahya sudah berdosa k-pada Allah, dan dpan bapa: t'ada-lah lagi sahya layak di-sbot anak bapa.'
22Ttapi itu bapa kata sama hamba-hamba-nya, 'Lkas bawa kluar baju yang baik skali, pakaikan sama dia; dan knakan s-bntok chinchin di jari-nya, dan kasut di kaki-nya;
23dan bawa anak-lmbu yang gmok, potong, dan mari kita makan dan suka-suka:
24kerna ini anak sahya sudah mati, dan sudah hidop s-mula; dia sudah hilang, dan sudah dapat balek.' Dan dia-orang mula'i bersuka-suka.
25Ttapi anak yang bsar ada di ladang: dan bila dia datang dkat ramah, dia dngar bunyi-bunyian dan orang bertandak.
26Dan dia panggil satu hamba, dan tanya sama dia apa-kah itu hal smoa?
27Dan itu hamba kata sama dia, 'Tuan punya adek sudah pulang; dan tuan punya bapa sudah potong anak-lmbu yang gmok, kerna dia sudah trima dia balek dngan slamat.'
28Ttapi dia naik marah, dan ta'mau masok: dan bapa-nya kluar pujok sama dia.
29Ttapi dia jawab kata sama bapa-nya, 'Tengok brapa tahun punya lama sahya sudah jadi hamba sama bapa, dan blum pernah sahya langgar bapa punya hukum: ttapi sama sahya ini bapa ta'pernah kasi satu ekor punya anak-kambing pun, spaya sahya boleh suka-suka hati sama sohbat-sohbat sahya:
30ttapi bila bapa punya anak ini datang, yang sudah habis makan bapa punya herta dngan prempuan sundal, bapa sudah potongkan anak-lmbu yang gmok kerna dia.'
31Ttapi itu bapa kata sama dia, 'Hei anak, angkau ini slalu ada sama-sama sahya, dan smoa yang sahya punya jadi angkau punya.
32Patut-lah bersuka-suka dan gmar: kerna ini angkau punya adek sudah mati, dan hidop s-mula; dia sudah hilang, dan sudah dapat balek.'"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel