Alkitab Mobile SABDA
[VER] : [BABA]     [PL]  [PB] 
 <<  Matius 19 >> 

1Jadi bila Isa sudah habis kata ini smoa, dia undur deri negri Galil, dan masok jajahan tanah Yahudiah, yang di sbrang sungai Yordan;

2dan banyak skali orang ikut sama dia; dan di situ dia smbohkan dia-orang.

3Ada orang Farisi datang sama dia mau choba dia, dan kata, "Ada-kah halal orang chraikan bini-nya kerna s-barang punya sbab?"

4Isa jawab kata sama dia-orang, "T'ada-kah kamu bacha bagimana dia yang mula-mula sudah jadikan manusia sudah jadikan dia-orang dlaki dan prempuan,

5dan sudah kata, 'Kerna ini sbab-lah orang nanti tinggalkan mak-bapa-nya dan berhubong sama bini-nya; dan dua-dua itu nanti jadi satu badan?'

6Jadi itu, dia-orang t'ada lagi dua orang, ttapi satu badan. Sbab itu apa-apa yang Allah sudah jodohkan, jangan manusia asingkan."

7Dia-orang kata sama dia, "Kalau bgitu, knapa pula Musa suroh kasi surat chraikan, bharu chraikan?"

8Isa kata sama dia-orang, "Deri sbab kamu punya kras-hati Musa sudah biarkan kamu chraikan kamu punya bini: ttapi deri mula-mula t'ada s-bgitu.

9Dan sahya ini kata sama kamu, barang-siapa yang chraikan dia punya bini, kalau bukan sbab persundalan, dan berbini sama lain orang, dia itu buat zina: dan orang yang berbini sama prempuan yang sudah kna chrai, dia pun buat zina."

10Murid-murid kata sama dia, "Jikalau bgitu hal satu laki dngan bini-nya, lbeh baik jangan kahwin."

11Ttapi Isa kata sama dia-orang, "Bukan-nya sklian orang boleh trima ini perkata'an, chuma orang yang k-pada-nya ini perkata'an sudah di-bri.

12Kerna ada orang kmbiri yang sudah jadi bgitu deri prot mak-nya: dan ada orang kmbiri yang manusia sudah kmbirikan dan ada orang kmbiri pula yang sudah kmbirikan diri-nya sndiri, kerna kraja'an shorga punya sbab. Dia yang boleh trima, biar dia trima."

13Itu ktika orang bawa sama dia budak-budak kchil, spaya dia boleh taroh tangan-nya atas dia-orang dan minta do'a: dan murid-murid tgurkan itu orang.

14Ttapi Isa kata, "Biarkan-lah budak-budak kchil itu, dan jangan larangkan dia-orang datang sama sahya: kerna bgitu-lah kraja'an shorga punya orang."

15Dan Isa taroh tangan-nya di atas budak-budak kchil itu, dan berjalan deri sana.

16Dan ada satu orang datang sama dia, dan kata, "Guru, apa perbuatan baik yang sahya boleh buat, spaya dapat hidop yang kkal?"

17Isa kata sama dia, "Knapa angkau tanya sama sahya deri-hal apa yang baik? ada Satu juga yang baik: ttapi jikalau angkau mau masok hidop, turut-lah itu hukum-hukum."

18Dia tanya sama Isa, "Hukum yang mana?" Dan Isa kata, "Jangan bunoh orang,jangan buat zina, jangan churi, jangan jadi saksi bohong,

19hormatkan angkau punya mak-bapa: dan lagi, Kaseh-lah orang sblah mnyblah sperti diri-sndiri."

20Itu orang muda kata sama Isa, "Smoa ini sahya sudah turut: apa kurang lagi sama sahya?"

21Isa kata sama dia, "Jikalau angkau mau jadi smpurna, pergi jualkan apa-apa yang angkau ada, kasi sama orang miskin, dan angkau nanti dapat herta-bnda di shorga: kmdian mari ikut sama sahya."

22Ttapi bila itu orang muda dngar ini perkata'an, dia pergi dngan susah-hati: kerna dia ada banyak herta.

23Dan Isa kata sama murid-murid-nya, "Dngan sunggoh sahya kata sama kamu, susah-lah orang kaya masok kraja'an shorga.

24Lagi pun sahya kata sama kamu, lbeh snang satu onta tmbus lobang jarom deri-pada orang kaya masok kraja'an shorga."

25Bila murid-murid dngar itu, dia-orang jadi banyak hairan skali, dan kata, "Kalau bgitu siapa pula boleh dapat slamat?"

26Isa mrnong sama dia-orang, dan kata, "Sama manusia ini perkara ta'boleh jadi; ttapi sama Allah smoa perkara boleh jadi."

27Kmdian Petrus jawab, kata sama Isa, "Kita ini-lah sudah tinggalkan smoa skali, dan ikut sama Tuhan; apa-kah kita pula nanti dapat?"

28Isa kata sama dia-orang, "Dngan sunggoh sahya kata sama kamu, dalam kjadian yang bharu, bila Anak-manusia nanti dudok di atas takhta kmulia'an-nya, kamu yang sudah ikut sama sahya nanti dudok di atas dua-blas takhta, mnjadi hakim k-pada dua-blas suku bangsa Isra'el.

29Dan tiap-tiap orang yang sudah tinggalkan rumah-tangga, atau sudara dlaki, atau sudara prempuan, atau bapa, atau mak, atau anak-anak-nya, atau tanah, kerna nama sahya punya sbab, nanti trima s-ratus kali ganda, dan hidop yang kkal jadi psaka-nya.

30Ttapi banyak orang yang mula-mula nanti jadi blakang skali; dan yang blakang skali nanti jadi yang mula-mula.



 <<  Matius 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel