1Bila Isa tengok orang-banyak itu, dia naik gunong; dan bila dia sudah dudok, dia punya murid-murid datang sama dia:
2dan dia buka mulut dan ajar dia-orang bgini:
3"Berkat-lah orang yang rndah-hati: kerna kraja'an shorga itu dia-orang punya.
4"Berkat-lah orang yang susah-hati: kerna dia-orang nanti di-hiburkan.
5"Berkat-lah orang yang lmah-lmbot hati: kerna dia-orang nanti dapat bumi jadi dia punya psaka.
6"Berkat-lah orang yang lapar dan haus sbab mau dapat kbnaran: kerna dia-orang nanti di-knnyangkan.
7"Berkat-lah orang berksian: kerna dia-orang nanti trima ksian.
8"Berkat-lah orang yang suchi-hati: kerna dia-orang nanti tengok Allah.
9"Berkat-lah orang yang damaikan orang: kerna dia-orang nanti di-panggil anak-anak Allah.
10"Berkat-lah orang yang kna aniaya sbab kbnaran: kerna kraja'an Allah dia-orang punya.
11Berkat-lah kamu bila orang maki dan aniayakan kamu, dan kata macham-macham punya jahat deri-hal kamu dngan bohong kerna sahya punya sbab.
12Jadi-lah suka-hati dan banyak bersuka: kerna bsar-lah kamu punya pahala dalam shorga: kerna bgitu juga orang sudah aniayakan nabi-nabi yang dhulu deri-pada kamu.
13"Kamu-lah ini bumi punya garam: ttapi jikalau itu garam sudah jadi tawar, dngan apa-kah boleh kasi dia asin? satu pun t'ada dia punya guna lagi, ttapi chuma kna buang dan kna orang pinjak.
14Kamu-lah dunia punya trang. Negri yang di atas gunong t'ada boleh smbunyi.
15Orang bukan pasang plita, dan ltak di bawah satu gantang, ttapi di atas kaki-plita, bharu dia kasi trang sama satu rumah punya orang.
16Bgitu juga biar kamu punya trang berchahya-chahya di dpan orang, spaya dia-orang boleh nampak kamu punya perbuatan baik, dan muliakan kamu punya Bapa yang di shorga.
17"Jangan kamu fikir yang sahya sudah datang mau tolakkan hukum-taurit atau kitab nabi-nabi: bukan-nya sahya datang mau tolakkan, ttapi mau gnapkan.
18Kerna dngan sunggoh sahya kata sama kamu, kalau s-blum langit sama bumi lnnyap, t'ada skali-kali nanti hilang satu titek atau satu tiam punya surat deri-pada hukum-taurit, sampai smoa perkara sudah di-gnapkan.
19"Sbab itu barang-siapa tolakkan satu hukum yang kchil skali deri-pada ini hukum-hukum, dan ajar orang buat bgitu, dia nanti di-panggil yang kchil skali dalam kraja'an shorga: ttapi barang-siapa turut dan ajar ini hukum-hukum, dia nanti di-panggil bsar dalam kraja'an shorga.
20Kerna sahya kata sama kamu, kalau kamu punya kbnaran t'ada jadi lbeh deri-pada katib-katib sama orang Farisi punya, skali-kali kamu ta'boleh dapat masok dalam kraja'an shorga.
21"Kamu sudah dngar sudah di-katakan sama orang dhulu-dhulu, 'Jangan-lah angkau bunoh orang; dan barang-siapa bunoh orang, dia patut kna hukum:'
22ttapi sahya pula kata sama kamu, tiap-tiap orang yang marah sama sudara-nya, dia pun patut kna hukum; dan barang-siapa kata sama sudara-nya, 'Hei bangsat,' dia patut kna hukum majlis bichara; dan barang-siapa kata, 'Hei chlaka,' dia patut kna jhannam api.
23Sbab itu, jikalau angkau bawa pmbrian di tmpat korban dan di sana teringat yang angkau ada salah sama angkau punya sudara,
24tinggalkan angkau punya pmbrian di sana dpan tmpat korban, dan pergi berdamai dhulu sama angkau punya sudara, kmdian bharu bawa datang angkau punya pmbrian.
25Lkas jadi baik sama orang yang d'awa angkau, s-lagi angkau jalan bersama-sama; spaya jangan pula dia srahkan angkau sama hakim, dan hakim pula srahkan sama mata-mata, dan angkau kna masok jel.
26Dngan sunggoh sahya kata sama angkau, skali-kali angkau t'ada nanti kluar deri situ, jikalau ada tertinggal satu duit pun yang angkau blum bayer.
27"Kamu sudah dngar sudah di-katakan, 'Jangan-lah angkau buat zina:'
28ttapi sahya pula kata sama kamu, tiap-tiap orang yang pandang sama satu prempuan dngan maksud mau ingin sama dia, itu orang sudah pun buat zina dngan dia dalam dia punya hati.
29Dan jikalau angkau punya mata kanan kasi angkau terantok, korek kluar, buangkan deri-pada angkau: kerna angkau lbeh untong kalau hilang satu deri-pada angkau punya anggota, jangan satu badan skali kna buang dalam jhannam.
30Dan jikalau angkau punya tangan kasi angkau terantok, kratkan, buangkan deri-pada angkau: kerna angkau lbeh untong kalau hilang satu deri-pada angkau punya anggota, jangan satu badan skali masok jhannam.
31Dan dhulu sudah di-katakan, 'Barang-siapa yang mau chraikan dia punya bini, biar dia kasi dia satu surat-chrai-an:
32ttapi sahya pula kata sama kamu, tiap-tiap orang yang chraikan dia punya bini, jikalau bukan sbab zina, dia kasi bini-nya buat zina, dan barang-siapa yang kahwin sama dia bila dia sudah kna chrai, dia itu pun buat zina.
33"Lagi pula kamu sudah dngar sudah di-katakan sama orang dhulu-dhulu, 'Jangan-lah angkau mungkiran sumpah, ttapi bayer-lah niat yang angkau sudah sumpah k-pada Tuhan:'
34ttapi sahya pula kata sama kamu, jangan skali-kali bersumpah; baik dmi langit, kerna langit itu takhta Allah;
35baik dmi bumi, kerna bumi itu alas kaki-nya; baik dmi Yerusalim, kerna Yerusalim negri Raja yang maha bsar itu.
36Dan dmi angkau punya kpala pun jangan angkau bersumpah, kerna angkau t'ada kuasa jadikan puteh atau hitam s-lai rambot pun.
37Ttapi biar-lah angkau punya chakap jadi, 'Ya, ya;' 'Bukan, bukan:' dan apa-apa yang lbeh deri-pada ini itu-lah deri-pada si-jahat asal-nya.
38"Kamu sudah dngar sudah di-katakan, 'Mata ganti mata, dan gigi ganti gigi:'
39ttapi sahya pula kata sama kamu, jangan mlawan orang jahat: ttapi barang-siapa lpakkan angkau punya pipi kanan, balekkan sama dia lain sblah pipi pun.
40Dan jikalau orang mau d'awa angkau dan ambil angkau punya baju dalam, biar dia ambil baju luar pun.
41Dan jikalau orang paksa angkau jalan satu batu punya jauh, ikut dia jalan sampai dua batu pun.
42Kasi-lah sama orang yang minta sama angkau, dan jangan-lah balekkan muka sama orang yang mau minta pinjam sama angkau.
43"Kamu sudah dngar sudah di-katakan, 'Kaseh-lah orang sblah mnyblah, dan bnchi angkau punya musoh:'
44ttapi sahya pula kata sama kamu, kaseh-lah angkau punya musoh, dan minta-lah do'a kerna orang yang aniayakan angkau;
45spaya kamu boleh jadi anak-anak Bapa kamu yang di shorga: kerna dia kasi kluar matahari-nya kerna orang jahat dan orang baik pun, dan turunkan hujan atas orang bnar dan yang t'ada bnar pun.
46Kerna kalau kamu kaseh orang yang kaseh sama kamu, apa-kah kamu punya pahala? bukan-kah orang pungut chukai pun buat bgitu juga?
47Dan jikalau kamu kasi tabek sama kamu punya sudara saja, apa-kah lbeh baik yang kamu buat? bukan-kah orang bangsa-asing pun buat bgitu juga?
48Sbab itu biar-lah kamu jadi smpurna, sperti kamu punya Bapa yang di shorga ada smpurna.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel