Alkitab Mobile SABDA
[VER] : [BABA]     [PL]  [PB] 
 <<  Matius 8 >> 

1Bila Isa sudah turun deri atas gunong, banyak orang ikut dia.

2Dan ada satu orang tai-ko datang dan berlutut sama dia, dan kata, "Ya Tuhan, jikalau Tuhan mau, Tuhan boleh kasi sahya berseh."

3Dan Isa hulorkan tangan jamah sama dia, dan kata, "Sahya mau; jadi-lah angkau berseh." Dan itu juga itu orang punya tai-ko sudah berseh.

4Dan Isa kata sama dia, "Ingat baik-baik, jangan angkau kata sama satu orang pun, ttapi angkau pergi-lah tunjokkan angkau punya diri sama imam, dan bawa persmbahan yang Musa sudah psan, jadi satu ksaksian k-pada dia-orang."

5Bila dia masok negri Kafarnahum, satu hulubalang datang minta sama dia,

6dan kata, "Tuhan, di rumah ada sahya punya hamba yang terbaring sakit tepok, terlalu banyak sngsara-nya."

7Dan Isa kata sama dia, "Sahya nanti datang smbohkan dia."

8Itu hulubalang jawab dan kata, "Ya Tuhan, sahya t'ada layak yang Tuhan boleh masok di bawah pondok sahya: ttapi chuma katakan satu patah saja, dan sahya punya hamba nanti di-smbohkan.

9Kerna sahya pun satu orang yang di bawah prentah orang, dan ada juga soldado di bawah sahya punya prentah: dan sahya kata sama ini satu, 'Pergi,' dan dia pergi; dan sama lain satu, 'Mari sini,' dan dia mari; dan sama sahya punya hamba, 'Buat ini,' dan dia buat."

10Bila Isa dngar, dia hairan, dan kata sama orang yang ikut dia, "Dngan sunggoh sahya kata sama kamu, di antara orang Isra'el pun sahya blum pernah jumpa bgini punya perchaya.

11Dan lagi sahya kata sama kamu, yang banyak orang nanti datang deri sblah timor dan barat, dan nanti dudok sama-sama Ibrahim, dan Isahak, dan Yakob dalam kraja'an shorga:

12ttapi anak-anak kraja'an nanti kna buang dalam glap yang di luar: di situ-lah nanti ada mratap sama gertak gigi."

13Dan sama itu hulubalang Isa kata, "Pergi-lah; biar-lah jadi sama angkau sperti angkau sudah perchaya." Dan itu jam juga itu hamba sudah baik.

14Dan bila Isa sudah masok Petrus punya rumah, dia tengok Petrus punya mertua prempuan terbaring sakit dmam.

15Dan Isa jamah itu prempuan punya tangan, dan dmam-nya hilang, dan dia bangun mlayan sama Isa.

16Dan bila sudah ptang, orang bawa sama dia banyak orang yang terkna jin, dan dia buangkan itu jin dngan s-patah chakap, dan smoa orang yang sakit dia smbohkan:

17spaya di-bnarkan apa yang nabi Yash'aya sudah kata, "Dia sndiri sudah ambil kita punya klmahan, dan mnanggong kita punya pnyakit."

18Bila Isa tengok terlalu banyak orang kliling, dia suroh berlayer sbrang.

19Dan ada satu orang pnulis datang sama Isa, dan kata, "Hei guru, sahya nanti ikut di mana-mana pun guru pergi."

20Dan Isa kata sama dia, "Srigala ada lobang-nya, dan burong-burong ada sarang-nya; ttapi Anak-manusia t'ada tmpat mau ltak kpala pun."

21Dan ada lagi satu dia punya anak-murid kata sama dia, "Ya Tuhan, biar-lah sahya pergi tanam sahya punya bapa dhulu."

22Ttapi Isa kata sama dia, "Ikut-lah sama sahya; dan biarkan orang mati tanamkan dia-orang sndiri punya orang mati."

23Dan bila Isa naik prahu, dia punya murid-murid ikut sama dia.

24Dan satu ribot yang bsar turun di tasek, sampaikan itu prahu kna timbus dngan ombak; ttapi Isa ada tidor.

25Dan murid-murid datang bangunkan dia, dan kata, "Ya Tuhan, slamatkan-lah kita; kita binasa."

26Dan dia kata sama dia-orang, "Knapa kamu takot, hei kamu yang kurang perchaya." Kmdian dia bangun, dan tngkingkan itu angin sama ayer tasek, dan jadi tdoh skali.

27Dan smoa itu orang naik hairan, dan kata, "Apa macham punya orang dia ini, sampaikan angin sama tasek pun turut prentah-nya?"

28Dan bila Isa sudah sampai sbrang di tanah orang Gadara, dia terjumpa dua orang yang terkna jin kluar deri kubur-kubur, banyak garang skali, sampaikan t'ada orang brani lalu itu jalan.

29Dan dia-orang bertriak-triak kata, "Hei Anak Allah, kita sama angkau apa ada terkna? sudah-kah angkau datang sini mau seksakan kita dhulu deri-pada waktu-nya?"

30Ada s-kawan babi yang banyak chari makan sikit jauh deri itu orang punya tmpat.

31Dan itu jin minta sama Isa, dan kata, "Kalau mau buangkan kita, suroh kita masok dalam itu kawan babi."

32Dan dia kata, "Pergi." Dan itu jin smoa kluar dan masok dalam smoa babi itu; dan itu kawan babi smoa lari turun itu gunong punya churam, terjun dalam tasek, dan mati dalam ayer.

33Itu orang yang piara babi lari masok negri, dan khabarkan smoa perkara, dan apa yang sudah jadi sama orang-orang yang terkna jin itu.

34Dan satu negri punya orang kluar mau jumpa sama Isa; dan bila dia-orang sudah tengok dia, dia-orang minta dia kluar deri-pada dia-orang punya jajahan.



 <<  Matius 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel