1Dan orang-orang Farisi sama brapa orang pnulis yang sudah turun deri Yerusalim berhimpon datang sama Isa,
2dan dia-orang tengok ada brapa murid-murid-nya makan dngan tangan yang najis, ia'itu yang blum chuchi lagi.
3Kerna orang Farisi sama smoa orang Yahudi pun kalau blum chuchi tangan sampai di siku, t'ada dia nanti makan, ia'itu ikut pngajaran ktua-ktua:
4dan bila pulang deri pasar kalau blum mandi, t'ada dia nanti makan: dan ada banyak lain perkara lagi yang dia-orang trima dan ikut, sperti chuchi mangkok, chawan, dan priok tmbaga.
5Jadi orang-orang Farisi sama orang pnulis tanya sama dia, "Knapa guru punya murid-murid t'ada ikut ktua-ktua punya pngajaran, ttapi makan roti dngan tangan yang najis?"
6Isa kata sama dia-orang, "Patut skali nabi Yash'aya sudah katakan lbeh dhulu fasal kamu, orang pura-pura, sperti ada tersurat, 'Ini bangsa hormatkan sahya sama mulut-nya, Ttapi hati-nya ada jauh deri-pada sahya.
7Jadi perchuma saja dia-orang smbah sama sahya, Sdang dia-orang ajar chuma manusia punya pngajaran.'
8Kamu tinggalkan hukum Allah, dan pegang manusia punya pngajaran."
9Dan lagi dia kata sama dia-orang, "Bagus skali kamu tolakkan hukum Allah spaya boleh turut kamu sndiri punya pngajaran.
10Kerna Musa kata, 'Hormatkan-lah angkau punya mak-bapa;' dan lagi, 'Siapa-siapa chakap jahat deri-hal bapa atau mak-nya, patut-lah dia kna hukum mati.'
11Ttapi kamu pula kata, 'Siapa-siapa yang kata sama bapa atau sama mak, "Apa deri-pada sahya yang boleh kasi untong sama mak, dan sama bapa, sudah jadi Korban,"' arti-nya persmbahan k-pada Allah,
12kamu t'ada kasi dia buat satu apa pun lagi, baik kerna bapa atau kerna mak-nya.
13Bgitu-lah kamu sudah hilangkan kuasa perkata'an Allah sbab pngajaran yang kamu ajar, dan banyak lain perkara kamu buat s-bgini."
14Dan lagi skali Isa panggil itu orang-banyak, dan kata sama dia-orang, "Kamu smoa dngar-lah sama sahya dan mngerti:
15t'ada satu apa pun deri luar orang yang masok dalam mulut-nya boleh najiskan dia: ttapi apa yang kluar deri dalam orang, ini-lah yang najiskan orang."
16[KOSONG]
17Bila dia sudah tinggalkan itu orang-banyak dan masok rumah, murid-murid-nya tanya dia fasal itu perumpama'an.
18Dan dia kata sama dia-orang, "Kamu pun bgitu kurang mngerti-kah? t'ada-kah kamu mngerti yang barang-apa deri luar yang masok dalam orang ta'boleh najiskan dia:
19kerna itu t'ada masok dalam hati-nya, ttapi dalam prot-nya, dan kluar di jamban?" (Dngan ini chakap Isa jadikan smoa makanan berseh.)
20Dan lagi dia kata, "Barang yang kluar deri dalam orang, itu-lah yang najiskan orang.
21Kerna deri dalam, ia'itu deri dalam hati-lah, kluar fikiran jahat, persundalan,
22churi, bunoh, zina, tma'a, kjahatan, tipu-daya, hawa-nafsu, mata-jahat, umpat, chongkak dan kbodohan:
23smoa ini perkara yang jahat kluar deri dalam hati, dan najiskan orang."
24Isa berjalan deri situ, dan pergi masok jajahan negri Tur dan Sidon. Dia masok satu rumah, dan maksud-nya jangan satu orang pun tahu: ttapi ta'boleh dia tersmbunyi.
25Ttapi itu juga ada satu prempuan yang anak prempuan-nya terkna jin najis, bila dia dngar deri-hal Isa dia datang jatoh di kaki-nya.
26Ini prempuan orang Grik, bangsa Suro-Finiki. Dia minta Isa buangkan itu jin deri dalam anak-nya.
27Dan Isa kata sama itu prempuan, "Biar-lah anak-anak knnyang dhulu, kerna t'ada baik ambil anak-anak punya roti champakkan k-pada anjing."
28Ttapi dia jawab kata sama Isa, "Btul, Tuhan: sampai anjing yang di bawah meja pun dapat makan anak-anak punya sisa-sisa."
29Isa kata sama dia, "Deri sbab ini chakap nyonya boleh pergi; itu jin sudah kluar deri dalam nyonya punya anak."
30Dan itu prempuan pulang rumah, dan jumpa budak itu berbaring di atas tmpat tidor, dan itu jin sudah kluar.
31Dia kluar pula deri jajahan Tur, dan lalu negri Sidon sampai datang di tasek Galil, trus tngah-tngah jajahan Dkapolis.
32Dan ada orang bawa sama dia satu orang pkak dan telur; dan minta dia taroh tangan atas itu orang.
33Isa bawa dia itu s'orang-s'orang jauh sikit deri-pada orang-banyak, dan chochokkan jari-nya dalam itu orang punya kuping, dan dia ludah, dan jamah lidah-nya;
34kmdian dia tngadah k-langit dan tarek nafas panjang, serta kata sama itu orang, "Iffata," arti-nya, "Terbuka-lah."
35Dan dia punya kuping terbuka, dan lidah-nya punya ikatan pun terlpas, dan dia berchakap btul-btul.
36Dan Isa psan dia-orang jangan katakan sama satu orang pun: ttapi makin dia psan dia-orang, makin lbeh dia-orang khabarkan.
37Dan dia-orang sangat-lah terchngang-chngang, serta kata, "Sgala perbuatan-nya ada baik; orang yang pkak pun dia kasi dngar, dan orang bisu pun dia kasi berchakap."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel