1Sbab itu, hei sudara-sudara, deri sbab sgala pngasehan Allah, sahya minta kamu smbahkan-lah badan kamu, mnjadi satu korban yang hidop dan kudus dan berknan k-pada Allah, ia'itu-lah kamu punya smbahyang yang berakal.
2Dan jangan-lah kamu ikut chontoh orang jman ini: ttapi biar-lah rupa kamu di-ubahkan deri sbab ingatan kamu sudah jadi bharu, spaya kamu boleh dapat tahu dngan tntu-nya apa-kah Allah punya kahandak yang baik dan yang berknan dan yang smpurna itu.
3Oleh anugrah yang sudah di-bri k-pada sahya, sahya bilang sama tiap-tiap orang antara kamu, jangan fikirkan diri lbeh deri-pada yang patut di-fikirkan; ttapi biar-lah kamu fikirkan dngan fikiran yang ttap s-kdar bhagian perchaya yang Allah sudah bhagikan k-pada kamu masing-masing.
4Kerna sama sperti dalam satu badan banyak juga anggota kita, dan anggota itu bukan smoa-nya sama pkerja'an-nya:
5bgitu juga kita pun yang banyak ini mnjadi satu badan dalam Almaseh, dan masing-masing kita mnjadi anggota satu sama lain.
6Dan sdang kita ada pmbrian yang lain-lain, mnurut sperti anugrah yang sudah di-bri k-pada kita, kalau nabuat, baik-lah kita bernabuat s-kdar kita punya perchaya;
7atau kalau mlayankan orang, baik-lah ttap mlayan; atau kalau mngajar orang, ttap juga mngajar:
8atau kalau kasi nasihat, ttap juga kasi nasihat: orang yang bhagikan apa-apa, biar-lah dngan hati yang murah; yang prentahkan orang, biar-lah dngan rajin; orang yang tunjok ksian, biar-lah dngan suka-hati.
9Biar-lah kamu punya kaseh itu jangan pura-pura. Bnchi-lah apa yang jahat; berhubong-lah sama apa yang baik.
10Dalam hal kaseh sama sudara-sudara, biar-lah kamu panas dalam perkara rohani; mnjadi hamba k-pada Tuhan:
11dalam hal rajin, jangan-lah lengah; biar-lah kamu panas dalam perkara rohani; mnjadi hamba k-pada Tuhan;
12bersuka-hati dalam harap; sabar-hati dalam ksusahan; tinggal ttap dalam do'a;
13tolong chukopkan kkurangan orang kudus; rajin sambot orang dagang.
14Mintakan berkat atas orang yang aniayakan kamu; mintakan berkat, dan jangan sumpahkan orang.
15Bersuka-suka sama orang yang ada bersuka, dan mnangis sama orang yang ada mnangis.
16Biar-lah kamu satu-hati satu sama lain. Jangan ingat perkara yang bsar-bsar, ttapi ikut perkara yang rndah. Jangan kamu fikirkan diri kamu bijaksana.
17Orang punya kjahatan jangan kamu balaskan dngan kjahatan. Ingat dngan sngaja mau buat perkara yang bnar di dpan smoa orang.
18Jikalau boleh, dalam kamu punya bhagian, biar-lah kamu berdamai dngan smoa orang.
19Hei sgala kkaseh, jangan balaskan sndiri, ttapi kasi tmpat sama Allah punya marah: kerna ada tersurat, "Balasan itu sahya punya: sahya ini-lah nanti balaskan, bgini-lah firman Tuhan."
20Ttapi jikalau angkau punya musoh lapar, kasi dia makan; kalau dia haus, kasi dia minum: kerna dngan ini macham punya perbuatan angkau nanti timbonkan bara-api atas kpala dia.
21Jangan-lah jahat kalahkan angkau, ttapi kalahkan jahat dngan yang baik.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel