Alkitab Mobile SABDA
[VER] : [BABA]     [PL]  [PB] 
 <<  Roma 4 >> 

1Jikalau bgitu, apa-kah kita boleh bilang? apa-kah Ibrahim sudah dapat, ia'itu kita punya nenek-moyang dalam hal badan?

2Kerna jikalau Ibrahim sudah di-bnarkan sbab perbuatan-nya, ada juga satu sbab yang dia boleh mgahkan diri-nya; ttapi ta'boleh dpan Allah.

3Kerna apa-kah kitab ada bilang? "Ibrahim sudah perchaya sama Allah, dan itu sudah di-hitongkan k-pada dia jadi kbnaran."

4Sama orang yang ada bkerja, t'ada orang hitongkan upah-nya jadi satu pmbrian, ttapi jadi satu hutang.

5Ttapi sama orang yang t'ada bkerja, chuma perchaya saja sama dia yang bnarkan orang-orang jahat, dia punya perchaya di-hitongkan jadi kbnaran.

6Sperti Da'ud pun ada sbotkan berkat-lah itu orang yang Allah hitongkan jadi bnar, dngan t'ada hitong perbuatan-nya:

7"Berkat-lah orang-orang yang ksalahan-nya sudah di-ampunkan, Dan dosa-dosa-nya sudah di-tutopkan.

8Berkat-lah itu orang yang Tuhan t'ada nanti hitongkan dosa-nya."

9Ini berkat sudah di-sbotkan di atas orang yang sudah bersunat-kah, atau atas orang yang ta'bersunat pun? kerna kita kata, "Sama Ibrahim dia punya perchaya sudah di-hitongkan jadi kbnaran."

10Ttapi dalam hal yang mana-kah ini sudah di-hitongkan? pada waktu dia sudah bersunat-kah, atau bila blum bersunat-kah? Bukan-nya bila sudah bersunat, ttapi bila blum bersunat lagi:

11dan dia sudah trima sunat itu, ia'itu satu tanda yang ttapkan itu kbnaran yang datang deri perchaya, yang sudah ada sama dia s-blum dia bersunat: spaya dia boleh jadi bapa sgala orang yang perchaya, sunggoh pun dia-orang t'ada bersunat, spaya kbnaran boleh di-hitongkan k-pada dia-orang.

12dan spaya dia jadi bapa sgala orang yang bersunat, ia'itu k-pada orang yang bukan saja di-sunatkan, ttapi yang bawa diri dalam jalan perchaya yang kita punya nenek-moyang Ibrahim sudah ikut waktu dia blum sunat.

13Kerna perjanjian k-pada Ibrahim dan bneh-nya, yang dia nanti dapat dunia jadi psaka-nya, itu bukan datang deri sbab hukum-taurit, ttapi deri sbab kbnaran yang datang deri-pada perchaya.

14Kerna jikalau hukum-taurit punya orang jadi waris, perchaya sudah jadi sia-sia, dan itu perjanjian pun sudah ta'pakai:

15kerna hukum-taurit bawa marah, ttapi di mana t'ada hukum-taurit di situ t'ada ksalahan.

16Ini-lah sbab psaka itu datang deri perchaya, ia'itu spaya jadi satu pmbrian: spaya perjanjian itu mnjadi ttap k-pada smoa bneh Ibrahim, bukan saja k-pada hukum-taurit punya orang, ttapi k-pada smoa orang yang ada Ibrahim punya perchaya,

17sdang dpan Tuhan yang Ibrahim sudah perchaya, ia'itu Allah yang bangkitkan orang mati dan triak barang yang t'ada spertikan ada, Ibrahim itu jadi kita sklian punya bapa (sperti ada tersurat, "Sahya sudah jadikan angkau banyak bangsa punya bapa").

18Kerna Ibrahim itu, sunggoh pun sudah putus harap-nya, dia perchaya juga dngan harap-nya, spaya dia boleh jadi banyak bangsa punya bapa, sperti yang sudah di-katakan, "Bgitu-lah nanti jadi angkau punya bneh."

19Dan dngan t'ada kurang perchaya dia ingatkan hal badan-nya sndiri yang sdia sudah mati (sbab umor-nya sudah dkat s-ratus tahun) dan Sarah punya rahim yang sudah mati itu:

20ttapi sdang dia ingat sama perjanjian Allah, t'ada dia bergoyang sbab kurang perchaya, ttapi mnjadi kuat sbab perchaya, dan muliakan Allah,

21sbab sudah rasa tntu yang apa-apa dia sudah janji dia ada kuasa boleh buat.

22Sbab itu-lah perchaya-nya sudah di-hitongkan sama dia jadi kbnaran.

23Dan sudah tersurat yang kbnaran sudah di-hitongkan sama Ibrahim, bukan saja kerna dia;

24ttapi kerna kita ini pun, dan kbnaran nanti di-hitongkan sama kita pun yang perchaya sama dia yang sudah bangkitkan deri antara orang mati Tuhan kita Isa.

25yang sudah di-srahkan kerna kita punya ksalahan, dan di-bangkitkan kerna kita punya kbnaran.



 <<  Roma 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel