Alkitab Mobile SABDA
[VER] : [BABA]     [PL]  [PB] 
 <<  Wahyu 1 >> 

1Ini-lah Knyata'an Isa Almaseh, yang Allah sudah kasi sama dia, spaya dia boleh tunjokkan k-pada dia punya hamba-hamba, ia'itu perkara-perkara yang msti jadi dngan sgra: dan dia hantarkan dan trangkan oleh mla'ikat-nya k-pada hamba-nya Yahya;

2yang saksikan pula perkata'an Allah, dan ksaksian Isa Almaseh, ia'itu apa-apa yang dia sudah tengok.

3Berkat-lah orang yang bacha, dan orang-orang yang dngar perkata'an nabuat ini, dan simpan apa-apa yang ada tertulis dalam-nya, kerna waktu-nya sudah dkat.

4Deri-pada Yahya, datang k-pada itu tujoh eklisia yang di negri Asiah: biar-lah anugrah dan sjahtra datang k-pada kamu deri-pada dia itu yang ada, dan sudah ada, dan nanti datang; dan deri-pada itu tujoh Roh yang di dpan takhta-nya;

5dan deri-pada Isa Almaseh, saksi yang kperchaya'an, ia'itu yang sulong deri antara orang-orang mati, dan yang prentahkan sgala raja-raja dunia ini. K-pada dia yang kaseh sama kita, dan sudah lpaskan kita deri-pada dosa-dosa kita oleh darah-nya;

6dan sudah jadikan kita satu kraja'an dan imam-imam k-pada Bapa-nya Allah: k-pada dia datang-lah kmulia'an dan kuasa sampai s-lama-lama-nya. Amin.

7Tengok, dia ada datang dngan awan-awan; dan tiap-tiap mata nanti nampak sama dia, dan orang-orang yang sudah tikam dia; dan smoa bangsa dunia ini nanti mratap kerna dia. Bgitu-lah. Amin.

8Sahya-lah Alfa dan Omega, bgini-lah perkata'an Tuhan Allah, yang ada, dan sudah ada, dan nanti datang, ia'itu yang Maha Kuasa.

9Sahya ini Yahya, kamu punya sudara, dan yang s-bhagian sama kamu dalam ksusahan, dan kraja'an, dan sabar yang di dalam Isa, sudah ada di pulau yang bernama Patmos, deri sbab perkata'an Allah dan ksaksian deri-hal Isa.

10Sahya ada dalam roh tempo hari Tuhan, dan sahya dngar deri blakang sahya satu suara bsar, sperti bunyi trompet,

11yang kata, "Apa yang angkau tengok, tulis-lah dalam satu buku, dan kirimkan k-pada itu tujoh eklisia; ia'itu k-pada Ifisus, dan Smurnah, dan Pergamun, dan Tuatirah, dan Sardis, dan Filadelfiah, dan Laodikiah.

12Dan sahya balek muka mau tengok itu suara yang berchakap sama sahya. Dan bila sahya sudah balek muka, sahya tengok tujoh kaki-plita mas;

13dan di tngah-tngah itu kaki-plita ada satu orang yang sperti anak-manusia, dngan pakaian yang sampai di kaki, dan berkmban dngan tali mas.

14Dan kpala dan rambut-nya puteh sperti bulu domba yang puteh, dan sperti salju; dan dia punya mata sperti nyala api;

15dan dia punya kaki sperti tmbaga yang sudah di-kilatkan, spertikan kna bakar dalam dapur; dan dia punya suara sperti bunyi banyak-banyak ayer.

16Dan dalam tangan kanan-nya dia ada tujoh bintang: dan deri mulut-nya terkluar satu pdang tajam yang dua mata: dan dia punya muka sperti matahari berchahya bila panas trek.

17Dan bila tengok dia, sahya jatoh di kaki-nya sperti satu orang mati. Dan dia taroh tangan kanan-nya atas sahya, dan kata, "Jangan takot; sahya-lah yang mula-mula, dan yang kmdian skali, dan yang hidop itu;

18dan sahya sudah mati, dan tengok, sahya ada hidop sampai s-lama-lama-nya, dan sahya pegang kunchi kmatian dan Alam-maut.

19Sbab itu, tulis-lah apa-apa yang angkau sudah tengok, dan yang skarang ada, dan yang nanti jadi kmdian;

20ruhsia itu tujoh bintang yang angkau sudah tengok di tangan kanan sahya, dan itu tujoh kaki-plita mas. Itu tujoh bintang jadi tujoh eklisia punya mla'ikat: dan itu tujoh kaki-plita jadi tujoh eklisia.



 <<  Wahyu 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran