Alkitab Mobile SABDA
[VER] : [BABA]     [PL]  [PB] 
 <<  Wahyu 11 >> 

1Dan sudah di-bri k-pada sahya satu kayu ukor, rupa-nya sperti tongkat, orang kata, "Bangun-lah, dan ukor ka'abah Allah dngan tmpat korban dan sgala orang yang smbahyang di dalam-nya.

2Tinggalkan-lah itu hlaman yang di sblah luar ka'abah, ta'usah ukor; kerna itu sudah di-bri k-pada orang bangsa-asing: dan orang nanti pinjakkan negri kudus itu ampat-puloh-dua bulan punya lama.

3Dan sahya nanti kasi izin k-pada sahya punya dua saksi itu, dan dia-orang nanti bernabuat s-ribu dua-ratus anam-puloh hari punya lama, dngan pakai kain karong."

4Ini-lah itu dua pokok zaitun dan itu dua kaki-plita, yang berdiri di dpan Tuhan yang ampunya bumi.

5Dan jikalau orang mau rosakkan itu dua-orang, terkluar api deri-pada mulut-nya, dan makankan musoh-musoh-nya: dan jikalau orang mau rosakkan itu dua orang, dia msti kna bunoh bgini.

6Ini dua-dua ada kuasa tutopkan langit, spaya jangan turun hujan s-lagi dia-orang ada bernabuat: dan ada kuasa pula atas ayer, boleh jadikan darah, dan palu ini dunia dngan macham-macham chlaka, s-brapa kali dia-orang suka.

7Dan bila ini dua-orang sudah habis dia-orang punya ksaksian, itu binatang buas yang kluar deri dalam itu tmpat yang t'ada terduga nanti berprang sama itu dua orang, dan nanti mnang, dan bunoh sama dia-orang.

8Dan dia-orang punya mayat ada di jalan negri yang bsar itu, ia'itu dalam satu ibarat di-sbot Sadom dan Masir pun, di tmpat di mana dia-orang punya Tuhan sudah kna salib.

9Dan ada orang deri antara sgala kaum dan suku dan bhasa dan bangsa tengokkan itu mayat tiga hari s-tngah punya lama, dan t'ada biarkan itu mayat taroh dalam kubor.

10Dan orang-orang yang tinggal di bumi bergmar atas-nya, dan buat suka-suka hati; dan dia-orang kirim pmbrian satu sama lain; sbab ini dua nabi sudah seksakan orang-orang yang tinggal di bumi.

11Dan kmdian deri-pada itu tiga hari s-tngah, roh hidop yang datang deri-pada Allah masok dalam itu dua orang, dan dia-orang bangun berdiri; dan orang-orang yang tengok naik ktakotan yang bsar.

12Dan itu dua-dua dngar satu suara yang bsar datang deri langit yang kata sama dia-orang, "Mari naik sini." Dan dia-orang naik langit dalam awan, dan musoh-musoh-nya tengok sama dia-orang.

13Dan itu ktika ada satu gmpa bumi yang bsar, dan s-perpuloh negri itu ruboh; dan dalam itu gmpa tujoh-ribu orang kna bunoh: dan yang lain itu jadi takot, dan muliakan Allah yang di shorga.

14Itu susah yang nombor dua sudah lpas: ingat, susah yang nombor tiga pula ada datang dngan sgra.

15Dan mla'ikat yang nombor tujoh pun tiop trompet: dan di shorga ada suara bsar-bsar yang kata, "Sgala kraja'an dunia ini sudah mnjadi kraja'an Tuhan kita, dan kraja'an Almaseh-nya, dan dia nanti jadi raja sampai s-lama-lama-nya."

16Dan itu dua-puloh-ampat ktua-ktua yang dudok atas masing-masing punya takhta di dpan Allah jatoh di muka-nya smbah Allah, dan kata,

17"Kita mnguchap shukor k-pada-mu, ya Allah, Tuhan yang maha kuasa, yang ada, dan yang sudah ada, kerna Tuhan sudah ambil Tuhan punya kuasa yang bsar itu, dan sudah jadi raja.

18Dan sgala bangsa-asing jadi marah, dan Tuhan punya marah, sudah datang, dan tempo orang mati kna hukum, dan tempo kasi pmbalasan k-pada hamba-hamba-mu, ia'itu nabi-nabi, dan k-pada orang-orang kudus, dan k-pada orang yang takot nama-mu, baik kchil baik bsar; dan tempo binasakan orang yang binasakan ini bumi."

19Dan Allah punya ka'abah yang di shorga itu sudah terbuka; dan nampak-lah dalam ka'abah itu pti perjanjian-nya; dan datang-lah kilat, dan suara-suara, dan guntor, dan satu gmpa bumi, dan hujan batu yang bsar.



 <<  Wahyu 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran