Alkitab Mobile SABDA
[VER] : [BABA]     [PL]  [PB] 
 <<  Wahyu 12 >> 

1Dan satu tanda yang bsar ternampak-lah di shorga; ia'itu satu prempuan yang pakai matahari jadi pakaian-nya, dngan bulan jadi alas kaki-nya, dan di atas dia punya kpala ada satu makota dua-blas bintang;

2dan dia ada mngandong: dan bertriak sbab mau beranak punya sakit dan sngsara.

3Dan ternampak-lah lain satu tanda di shorga; ada satu naga bsar yang merah, yang ada tujoh kpala dan s-puloh tandok, dan di kpala-nya ada tujoh makota.

4Dan dia punya buntut seret s-pertiga sgala bintang di langit, dan champakkan smoa-nya di bumi; dan itu naga berdiri-lah dpan itu prempuan yang mau beranak, spaya bila dia beranak dia boleh tlankan dia punya anak.

5Dan itu prempuan beranakkan satu anak, ia'itu anak jantan yang msti prentahkan sgala bangsa dngan tongkat bsi: dan dia punya anak kna bawa k-pada Allah dan k-pada takhta-nya.

6Dan itu prempuan lari masok itu tanah sunyi, dan di situ dia ada satu tmpat yang Allah sudah sdiakan, spaya di situ orang boleh piarakan dia s-ribu dua-ratus anam-puloh hari punya lama.

7Dan ada prang dalam shorga, ia'itu Mika'el sama sgala mla'ikat-nya berprang sama itu naga; dan itu naga pun berprang sama-sama dia punya mla'ikat;

8dan t'ada juga dia mnang, dan tmpat-nya pun t'ada dapat di shorga lagi.

9Dan itu naga bsar kna champak, ia'itu ular dhulu-kala, yang di-sbot iblis dan Setan pun, yang tipukan sgala orang dunia; dia kna champak di bumi, dan dia punya mla'ikat pun kna champak sama-sama dia.

10Dan sahya dngar satu suara yang bsar di shorga, yang kata, "Skarang-lah sudah datang slamat dan kkuatan dan kraja'an Tuhan kita, dan kuasa Almaseh-nya: kerna kita punya sudara punya pnd'awa sudah kna champak, ia'itu yang d'awa dia-orang dpan Allah siang-malam.

11Dan dia-orang sudah mnang atas dia deri sbab darah Anak-domba itu, dan deri sbab perkata'an ksaksian-nya; dan dia-orang t'ada sayang dia-orang punya nyawa sampai mati pun.

12Sbab itu bersuka-suka-lah kamu, hei shorga, dan sgala yang tinggal di dalam-nya. Susah-lah bumi dan laut itu: kerna iblis sudah turun k-pada kamu dngan marah yang bsar, sbab dia tahu tempo-nya chuma sikit saja.

13Dan bila itu naga tengok yang dia sudah kna champak di bumi, dia aniayakan itu prempuan yang sudah beranakkan itu budak dlaki.

14Dan orang kasi itu prempuan burong lang yang bsar punya dua sayap, spaya dia boleh terbang masok tanah-sunyi di tmpat-nya sndiri, ia'itu tmpat di mana dia boleh di-piarakan dalam satu ktika, dan dua ktika, dan s-tngah ktika, jauh deri-pada itu ular punya mata.

15Dan itu ular smburkan ayer sperti sungai deri dalam dia punya mulut, ikut itu prempuan, spaya dia boleh kna hanyut oleh itu sungai.

16Dan bumi sudah tolong itu prempuan, dan bumi buka mulut tlankan itu sungai yang naga smburkan deri dalam dia punya mulut.

17Dan itu naga jadi marah sama itu prempuan, dan pergi prang sama itu prempuan punya bneh yang lagi tinggal, yang simpan Allah punya hukum, dan pegang ksaksian deri-hal Isa:



 <<  Wahyu 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran