Alkitab Mobile SABDA
[VER] : [BABA]     [PL]  [PB] 
 <<  Wahyu 18 >> 

1Kmdian deri-pada itu smoa, sahya tengok lagi satu mla'ikat turun deri langit, dan dia ada banyak kuasa; dan bumi ada di-trangkan dngan dia punya kmulia'an.

2Dan dia bertriak dngan suara yang kuat skali, dan kata, "Sudah ruboh-lah, sudah ruboh-lah, Babil yang bsar itu, dan sudah jadi sgala Setan punya tmpat tinggal, dan sgala jin yang najis punya jel, dan tiap-tiap burong yang najis dan yang kbnchian punya jel.

3Kerna smoa bangsa sudah jatoh deri sbab ayer-anggor, ia'itu marah atas perchabolan-nya; dan raja-raja bumi sudah buat perchabolan sama dia, dan sudagar-sudagar bumi pun sudah mnjadi kaya deri sbab lazat-nya punya kuasa."

4Dan sahya dngar lagi satu suara deri langit, yang kata, "Hei orang bangsa sahya, kluar-lah deri-pada-nya, spaya jangan kamu berskutu dngan dosa-dosa-nya, dan jangan kamu kna dia punya chlaka smoa:

5kerna dia punya dosa sudah naik sampai langit, dan Allah sudah ingat dia punya kjahatan smoa.

6Balaskan k-pada dia sperti dia pun sudah balaskan, dan kasi dia dua kali ganda ikut sperti dia punya perbuatan: dalam itu chawan yang dia sudah isikan, isikan dua kali ganda kerna dia.

7S-bagimana dia sudah muliakan diri-nya sndiri, dan berlazat, bgitu juga kasi sama dia sngsara dan ratap; kerna dia bilang dalam hati-nya, 'Sahya ini ada dudok sperti satu raja prempuan, dan sahya bukan bujang, dan t'ada skali-kali sahya nanti tahu mratap.'

8Sbab itu dalam satu hari juga nanti datang dia punya chlaka, ia'itu kmatian, dan ratap, dan klaparan; dan dia nanti kna hangus dngan api; kerna kuat-lah Allah, Tuhan yang sudah hukumkan dia.

9Dan raja-raja bumi yang sudah berchabol dan berlazat sama dia nanti mnangis dan mratapkan dia, bila dia-orang tengok itu asap api yang bakarkan dia,

10dan berdiri jauh-jauh deri sbab takot sama dia punya sngsara, sambil kata, 'Susah, susah, negri yang bsar itu, ia'itu Babil, negri yang kuat itu! kerna dalam satu jam juga sudah datang angkau punya hukuman.

11Dan sgala sudagar di bumi mnangis dan mratapkan dia, kerna satu orang pun t'ada bli dia-orang punya barang-barang lagi;

12ia'itu barang-barang mas perak, dan permata, dan mutiara, dan kain khasah halus, dan kain ungu, dan stra, dan kain merah; dan sgala kayu wangi, dan sgala bkas deri-pada gading, dan sgala bkas deri-pada kayu yang indah skali, dan deri-pada tmbaga, dan bsi, dan batu marmar;

13dan kayu manis, dan rmpah-rmpah, dan bau-bauan, dan mur, dan kmnyan, dan ayer-anggor, dan minyak, dan tpong halus, dan trigu, dan lmbu, dan domba; dan kuda, dan kreta, dan hamba-hamba; dan nyawa orang.

14Itu buah-buahan yang angkau punya hati sudah inginkan sudah lnyap deri-pada angkau, dan smoa perkara yang sdap dan lazat sudah binasa deri-pada angkau, dan skali-kali t'ada lagi orang nanti dapat itu smoa.

15Dan orang yang mniagakan itu smoa, dan sudah jadi kaya deri-pada itu negri, nanti berdiri jauh-jauh sbab takot dia punya sngsara, sambil mnangis dan mratap;

16dan kata, 'Susah, susah, negri yang bsar itu, yang pakai kain khasah halus, dan kain ungu dan merah, dan berrias dngan mas dan permata dan mutiara!

17kerna dalam satu jam juga bgitu banyak punya kkaya'an sudah jadi sunyi.' Dan tiap-tiap kapitan, dan siapa-siapa yang blayer di mana-mana pun, dan sgala anak-prahu, dan s-brapa orang yang chari makan di laut, berdiri-lah deri jauh,

18dan bertriak, bila dia-orang tengok asap api yang bakarkan dia, dan kata, 'Negri yang mana-kah ada sama sperti negri yang bsar itu?'

19Dan dia-orang buangkan habok di atas kpala-nya, dan bertriak, sambil mnangis dan mratap, dan kata, 'Susah, susah, negri yang bsar itu, yang dalam-nya sudah jadi kaya sgala orang yang ada kapal di laut, deri sbab dia punya kmewahan! kerna dalam satu jam juga dia sudah jadi sunyi.'

20Hei shorga, bersuka-suka-lah sbab hal-nya, dan kamu orang-orang kudus dan rasul-rasul dan nabi-nabi pun; kerna Allah sudah jatohkan kamu punya hukuman atas dia."

21Dan satu mla'ikat yang kuat angkat satu batu, sperti batu kisaran yang bsar, dan buangkan di laut, sambil kata, "Dngan bgini-lah punya krubohan Babil negri yang bsar itu nanti kna buang, dan skali-kali t'ada lagi orang nanti dapat sama dia.

22Dan bunyi orang yang main kchapi dan bunyi-bunyian dan suling dan srunai t'ada skali-kali nanti di-dngar lagi dalam angkau; dan satu orang pandai, baik apa kpandaian pun, t'ada skali-kali nanti orang dapat lagi dalam angkau; dan bunyi batu kisaran t'ada skali-kali nanti di-dngar lagi dalam angkau;

23dan chahya plita pun t'ada skali-kali nanti mnyala lagi dalam angkau; dan suara kmantin jantan atau prempuan t'ada skali-kali nanti di-dngar lagi di dalam angkau: kerna angkau punya sudagar-sudagar smoa-nya orang bsar-bsar di bumi; dan sgala bangsa sudah kna ssat oleh angkau punya hobatan.

24Dan dalam-nya-lah sudah terdapat darah nabi-nabi dan orang-orang kudus, dan darah smoa orang yang sudah kna bunoh di bumi."



 <<  Wahyu 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran