Alkitab Mobile SABDA
[VER] : [BABA]     [PL]  [PB] 
 <<  Wahyu 19 >> 

1Kmdian deri-pada ini smoa sahya dngar pula sperti satu suara bsar, ia'itu suara banyak-banyak orang di shorga yang kata, "Halliluyah; sgala slamat dan mulia dan kuasa k-pada Tuhan kita:

2kerna btul dan bnar-lah dia punya hukuman; kerna dia sudah hukumkan itu sundal bsar, yang sudah rosakkan dunia dngan dia punya persundalan, dan dia sudah balaskan hamba-hamba-nya punya darah atas itu sundal."

3Dan nombor dua kali dia-orang kata, "Halliluyah." Dan dia punya asap naik sampai s-lama-lama-nya.

4Dan itu dua-puloh-ampat ktua dan itu ampat hidop-hidopan berlutut mnymbah Allah yang dudok di atas takhta, sambil kata, "Amin; Halliluyah."

5Dan satu suara kluar deri itu takhta, yang kata, "Puji-lah Allah kita, hei sgala hamba-nya yang takot sama dia, baik kchil baik bsar."

6Dan sahya dngar sperti bunyi suara orang terlalu banyak, dan sperti bunyi banyak ayer, dan sperti bunyi guntor yang kuat, kata, "Halliluyah: kerna Allah Tuhan kita yang maha kuasa itu sudah jadi raja.

7Baik kita bergmar dan bersuka-suka skali, dan kasi hormat k-pada dia: kerna itu Anak-domba punya tempo kahwin sudah sampai, dan dia punya istri sudah siapkan diri-nya."

8Dan istri-nya sudah di-bri pakai kain khasah halus, yang berkilat dan suchi: kerna kain khasah halus itu-lah orang-orang kudus punya perbuatan bnar.

9Dan dia kata sama sahya, "Tulis bgini, 'Berkat-lah orang-orang yang kna jmpot k-pada itu Anak-domba punya perjamuan kahwin.'" Dan dia kata sama sahya, "Ini-lah Allah punya perkata'an yang btul."

10Dan sahya berlutut di kaki-nya mau smbah sama dia. Dan dia kata sama sahya, "Jangan bgini: sahya pun sama hamba sperti angkau, dan sperti angkau punya sudara-sudara yang pegang ksaksian deri-hal Isa: smbah sama Allah: kerna ksaksian deri-hal Isa ia'itu Roh nabuat."

11Dan sahya tengok langit terbuka; dan ada satu kuda puteh, sama orang yang tunggang dia, bernama Stiawan dan Btul; dan dalam kbnaran dia putuskan hukum dan berprang.

12Dan dia punya mata sperti satu nyala api, dan di kpala-nya ada banyak makota; dan dia ada satu nama tertulis, yang satu orang pun ta'tahu chuma dia sndiri saja.

13Dan dia pakai pakaian yang sudah kna rnjis dngan darah: dan dia punya nama di-sbot Perkata'an Allah.

14Dan sgala bala-tntra yang di shorga ikut sama dia dngan mnunggang kuda puteh, dan ada pakai kain khasah halus yang puteh dan suchi.

15Dan deri-pada dia punya mulut terkluar satu pdang yang tajam, spaya dngan itu dia boleh bunoh sgala bangsa: dan dia nanti prentahkan itu smoa dngan tongkat bsi: dan dia-lah yang mngirek irekan anggor, ia'itu kahangatan marah Allah yang maha kuasa.

16Dan di baju-nya dan di paha-nya ada tertulis satu nama, "Raja atas sgala raja, dan Tuan atas sgala tuan."

17Dan sahya tengok satu mla'ikat berdiri di matahari; dan dia bertriak dngan suara yang bsar, dan kata k-pada sgala burong yang terbang di tngah langit, "Mari berhimpon k-pada Allah punya perjamuan yang bsar;

18spaya kamu boleh makan daging raja-raja dan daging pnglima, dan daging orang kuat-kuat, dan daging kuda, dan orang-orang yang mnunggang dia, dan smoa orang punya daging, baik hamba baik bebas, baik bsar baik kchil."

19Dan sahya tengok itu binatang, dan raja-raja bumi sama dia-orang punya bala-tntra berhimpon mau prang dngan itu orang yang tunggang kuda, dngan dia punya bala-tntra.

20Dan itu binatang kna tangkap, dan itu nabi bohong pun sama-sama dia, yang sudah buat tanda-tanda di dpan dia, dan dngan itu tanda-tanda juga sudah ssatkan smoa orang yang sudah trima tanda binatang itu dan yang smbah dia punya patong: dua-dua itu kna champak hidop-hidop dalam kolam api yang mnyala dngan blerang:

21dan yang lain-lain kna bunoh dngan pdang oleh itu orang yang tunggang kuda, ia'itu pdang yang kluar deri mulut-nya: dan smoa burong-burong jadi knnyang makan daging-nya.



 <<  Wahyu 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel