1Dan sahya tengok satu mla'ikat turun deri langit, sambil pegang di tangan-nya itu tmpat yang ta'terduga punya anak-kunchi, sama satu rantai yang bsar.
2Dan dia tangkap itu naga, ia'itu ular yang dhulu kala itu, dia-lah Iblis dan Setan, dan dia ikatkan sama dia s-ribu tahun punya lama,
3dan champakkan dia dalam itu tmpat yang ta'terduga, dan tutop dan silkan di atas-nya, spaya jangan lagi dia boleh tipukan sgala bangsa, sampaikan sudah habis itu s-ribu tahun: habis itu dia msti di-lpaskan sikit waktu.
4Dan sahya tengok bbrapa takhta, dan ada orang dudok di atas-nya, dan dia-orang di-bri kuasa mnjadi hakim: dan sahya tengok jiwa sgala orang yang sudah kna krat kpala deri sbab ksaksian deri-hal Isa, dan deri sbab perkata'an Allah, dan orang-orang yang t'ada smbah sama itu binatang, atau dia punya patong, dan t'ada trima dia punya chap di dahi-nya dan di tangan-nya; dan dia-orang hidop dan jadi raja sama-sama Almaseh s-ribu tahun punya lama.
5Lain-lain orang mati t'ada hidop sampaikan sudah habis itu s-ribu tahun. Ini-lah kbangkitan yang pertama.
6Berkat-lah dan kudus-lah orang yang dapat bhagian dalam kbangkitan yang pertama itu: atas ini smoa kmatian nombor dua tidak ada kuasa; ttapi dia-orang nanti mnjadi Allah punya imam dan Almaseh punya, dan nanti jadi raja sama-sama dia s-ribu tahun punya lama.
7Dan bila itu s-ribu tahun sudah habis, Setan nanti di-lpaskan deri dalam dia punya jel,
8dan nanti kluar tipukan sgala bangsa di ampat-ampat pnjuru bumi, sperti Yajuj dan Majuj, spaya himponkan dia-orang mau berprang: dan bilangan-nya sperti pasir di tpi laut.
9Dan sklian-nya naik sluroh bumi, dan kpongkan orang-orang kudus punya tmpat bala-tntra, dan itu negri yang di-kaseh: dan api turun deri langit makan sklian-nya.
10Dan iblis yang sudah tipukan dia-orang kna champak di kolam api dan blerang, di mana ada itu binatang dan itu nabi bohong: dan dia-orang nanti kna seksa siang malam sampai s-lama-lama-nya.
11Dan sahya tengok satu takhta puteh yang bsar, dan dia yang dudok di atas-nya, dan bumi dan langit lnyap-lah deri dia punya muka; dan t'ada terdapat satu tmpat kerna itu smoa.
12Dan sahya tengok orang-orang mati bsar kchil berdiri di dpan itu takhta; dan kitab-kitab ada di-bukakan: dan ada lain satu kitab di-bukakan, ia'itu kitab hidop: dan orang-orang mati ada di-hukumkan turut sperti dia-orang punya perbuatan deri-pada apa-apa yang sudah tertulis di dalam itu kitab-kitab.
13Dan laut pun srahkan-lah orang-orang mati yang ada dalam-nya; dan kmatian sama alam maut pun srahkan-lah sgala orang mati yang dalam-nya: dan smoa itu di-hukumkan-lah turut sperti masing-masing punya perbuatan.
14Dan kmatian sama alam maut kna champak dalam kolam api. Ini-lah kmatian yang nombor dua, ia'itu kolam api.
15Dan jikalau barang-siapa punya nama t'ada terdapat tertulis dalam kitab hidop, dia kna champak dalam kolam api.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel