Alkitab Mobile SABDA
[VER] : [BABA]     [PL]  [PB] 
 <<  Wahyu 22 >> 

1Dan dia tunjokkan sahya satu sungai deri-pada ayer hidop, jerneh sperti hablur, mngalir kluar deri-pada takhta Allah, ia'itu takhta Anak-domba,

2di tngah-tngah itu jalan negri. Dan sbrang-mnybrang itu sungai ada pokok hidop, yang kluarkan dua-blas jnis punya buah, dan bulan-bulan dia kluarkan buah: dan itu pokok punya daun mau smbohkan sgala bangsa.

3Dan t'ada nanti ada apa-apa yang kna la'anat lagi: dan Allah sama Anak-domba punya takhta nanti ada dalam-nya: dan dia punya hamba-hamba nanti buat smbahyang k-pada dia;

4dan dia-orang nanti tengok dia punya muka; dan dia punya nama nanti tertulis di hamba-hamba itu punya dahi.

5Dan t'ada nanti ada malam lagi, dan chahya plita dan chahya matahari pun t'ada berguna lagi sama dia-orang; kerna Allah Tuhan itu nanti trangkan dia-orang: dan dia-orang nanti jadi raja sampai s-lama-lama-nya.

6Dan dia kata sama sahya, "Ini-lah perkata'an yang kita boleh perchaya dan yang btul: dan Allah, ia'itu Tuhan sgala nabi-nabi punya roh, sudah hantarkan dia punya mla'ikat mau tunjokkan sama dia punya hamba-hamba sgala perkara yang msti jadi dngan sgra.

7Dan ingat-lah, sahya datang lkas. Berkat-lah orang yang simpankan ini kitab punya perkata'an nabuat."

8Dan sahya Yahya ini-lah yang sudah dngar dan tengok ini smoa. Dan bila sahya dngar dan tengok, sahya berlutut mau smbah di kaki itu mla'ikat yang sudah tunjokkan sahya ini smoa.

9Dan dia kata sama sahya, "Ingat, jangan buat bgini: sahya pun sama hamba sperti angkau, dan sperti smoa angkau punya sudara, ia'itu smoa nabi-nabi, dan sperti smoa orang yang simpan ini kitab punya perkata'an: smbah-lah sama Allah."

10Dan dia kata sama sahya, "Jangan angkau silkan ini kitab punya perkata'an nabuat; kerna waktu-nya sudah dkat.

11Orang yang buat jahat, biar dia buat jahat lagi: orang yang kotor, biar dia mnjadi kotor lagi: orang yang bnar, biar dia buat bnar lagi: orang yang kudus, biar dia mnjadi kudus lagi.

12Ingat-lah, sahya datang lkas; dan sahya punya pahala ada sama-sama sahya, mau balaskan k-pada masing-masing orang sperti perbuatan-nya.

13Sahya-lah Alfa dan Omega, yang mula-mula dan yang kmdian skali, permula'an dan ksudahan.

14Berkat-lah orang-orang yang chuchi dia punya pakaian, spaya dia dapat kuasa atas pokok hidop, dan boleh masok dalam negri itu deri-pada itu pintu-pintu bsar.

15Di luar ada anjing, dan orang hobatan, dan orang chabol, dan sgala pmbunoh, dan smoa orang yang smbahyang datok, dan tiap-tiap orang yang suka bohong, dan buat bohong."

16"Sahya ini Isa sudah hantarkan sahya punya mla'ikat spaya saksikan smoa ini perkara k-pada kamu kerna smoa eklisia. Sahya-lah Akar dan Kturunan Da'ud, dan bintang siang yang berchahya-chahya itu."

17Dan Roh sama kmantin prempuan kata, "Mari-lah." Dan dia yang dngar, biar-lah dia pun kata, "Mari-lah." Dan orang yang haus, biar-lah dia mari: siapa-siapa yang suka, biar dia ambil ayer yang kasi hidop dngan t'ada bayeran.

18Sahya bersaksi k-pada tiap-tiap orang yang dngar ini kitab punya perkata'an nabuat, "Jikalau siapa-siapa tambahkan k-pada ini perkara smoa, Allah nanti tambahkan k-pada dia smoa chlaka yang tertulis dalam ini kitab:

19dan jikalau siapa-siapa hilangkan perkata'an kitab nabuat ini, Allah nanti hilangkan dia punya bhagian deri pokok hidop, dan deri negri yang kudus, sperti yang tertulis dalam ini kitab."

20Dia itu yang saksikan ini smoa kata, "Ya: sahya datang lkas." "Amin: mari-lah, Tuhan Isa."

21Biar-lah anugrah Tuhan Isa bersama-sama sgala orang kudus itu. Amin.



 <<  Wahyu 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran