Alkitab Mobile SABDA
[VER] : [BABA]     [PL]  [PB] 
 <<  Wahyu 7 >> 

1Kmdian deri-pada itu, sahya tengok ampat mla'ikat berdiri di ampat pnjuru bumi, dan tahankan ampat mata angin di bumi, spaya jangan angin tiop di bumi, atau di laut, atau di atas satu pokok pun.

2Dan sahya tengok lain satu mla'ikat naik deri-pada matahari hidop, yang pegang Allah yang hidop itu punya sil, dan dia bertriak dngan suara yang bsar k-pada itu ampat mla'ikat, yang sudah di-bri kuasa rosakkan bumi dan lautan itu,

3dan dia kata, "Jangan rosakkan bumi atau lautan atau pokok-pokok, kalau s-blum kita sudah silkan hamba-hamba Allah di dahi-nya.

4Dan sahya dngar bilangan smoa orang yang sudah kna sil, ia'itu s-ratus ampat-puloh-ampat ribu, yang sudah di-silkan deri-pada tiap-tiap suku-bangsa anak-anak Isra'el.

5Deri-pada suku-bangsa Yahuda sudah di-silkan dua-blas ribu: Deri-pada suku-bangsa Ra'ubin dua-blas ribu: Deri-pada suku-bangsa Gad dua-blas ribu:

6Deri-pada suku-bangsa Ashir dua-blas ribu: Deri-pada suku-bangsa Naftali dua-blas ribu: Deri-pada suku-bangsa Manasseh dua-blas ribu:

7Deri-pada suku-bangsa Shimun dua-blas ribu: Deri-pada suku-bangsa Liwi dua-blas ribu: Deri-pada suku-bangsa Yisakar dua-blas ribu:

8Deri-pada suku-bangsa Zabulun dua-blas ribu: Deri-pada suku-bangsa Yusof dua-blas ribu: Deri-pada suku-bangsa Binyamin sudah di-silkan dua-blas ribu:

9Dan kmdian deri-pada itu smoa, sahya tengok, ada terlalu banyak orang, yang satu orang pun ta'boleh hitong, datang deri-pada tiap-tiap bangsa, dan deri-pada sgala suku, dan sgala kaum, dan sgala bhasa, berdiri di dpan itu takhta dan di dpan Anak-domba itu, dngan pakai baju puteh, dan ada pegang plpah khurma di tangan-nya;

10dan dia-orang bertriak dngan suara yang bsar, dan kata, "Yang slamatkan kita, ia'itu Tuhan kita yang dudok di atas takhta itu, dan Anak-domba pun."

11Dan smoa mla'ikat berdiri kliling itu takhta, dan smoa ktua-ktua, dan itu ampat hidop-hidopan; dan jatoh di muka-nya; dan smbah Allah,

12kata, "Amin: sgala puji dan kmulia'an dan bijaksana dan shukor dan hormat dan kuasa dan kkuatan k-pada Tuhan kita sampai s-lama-lama-nya. Amin."

13Dan satu antara itu ktua-ktua jawab kata sama sahya, "Siapa-kah ini orang smoa yang pakai baju puteh, dan deri-mana dia-orang datang?

14Dan sahya kata sama dia, "Tuan juga yang tahu." Dan dia kata, "Ini smoa yang sudah kluar deri-pada ksusahan yang bsar itu, dan dia-orang sudah chuchikan dia-orang punya pakaian, dan putehkan dalam darah Anak-domba.

15Itu sbab-lah dia-orang ada di dpan takhta Allah dan buat smbahyang k-pada dia siang-malam dalam ka'abah-nya: dan dia yang dudok di atas takhta itu nanti bntangkan khemah-nya atas dia-orang.

16T'ada dia-orang nanti lapar lagi, dan t'ada dia-orang nanti haus lagi, dan t'ada matahari nanti pukol atas-nya, atau apa-apa panas:

17kerna itu Anak-domba yang di tngah-tngah itu takhta nanti jadi dia-orang punya gombala, dan nanti bawa dia-orang pergi mata-ayer yang kasi hidop: dan Allah nanti sapukan smoa ayer-mata-nya.



 <<  Wahyu 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran