1Hei sudara-sudara, jangan-lah kamu jadi banyak guru, sdang kamu tahu yang kita guru nanti trima lbeh brat punya hukuman.
2Kerna dalam banyak perkara kita smoa terantok. Jikalau ada orang t'ada terantok dalam dia punya perchakapan, dia-lah orang yang smpurna, yang boleh tahankan satu badan-nya.
3Jikalau kita taroh kang dalam mulut kuda, spaya dia boleh turut kita punya prentah, kita pusingkan dia-orang punya satu badan pun.
4Tengok, kapal-kapal pun bgitu juga, sunggoh pun bgitu bsar dan kna tolak oleh angin kras, itu pun kna pusing dngan kmudi yang kchil skali oleh juru-mudi punya grak, di mana-mana dia mau.
5Bgitu juga lidah itu satu anggota yang kchil, dan sangat-lah dia mgahkan diri-nya. Tengok brapa banyak kayu boleh kna makan oleh brapa kchil punya api.
6Dan lidah itu satu api: di antara smoa kita punya anggota, lidah itu-lah satu dunia punya kjahatan, yang najiskan s-gnap badan, dan mnyalakan s-bulat alam, dan dia pula kna nyalakan oleh jhannam.
7Kerna sgala jnis punya binatang, dan burong-burong, dan binatang yang mrayap, dan yang di dalam lautan, boleh juga di-jinakkan, dan sudah di-jinakkan oleh manusia:
8ttapi lidah itu, t'ada satu manusia boleh jinakkan; ia'itu satu chlaka yang ta'mau diam, pnoh dngan rachun yang kasi mati.
9Dngan lidah juga kita pujikan Bapa kita Tuhan; dan dngan lidah juga kita sumpahkan manusia, yang sudah di-jadikan atas rupa Allah:
10deri dalam itu mulut juga kluar puji dan sumpah. Hei sudara-sudara, ini smoa t'ada patut jadi bgitu.
11Ada-kah mata-ayer pancharkan ayer jerneh dan ayer kroh deri satu pancharan juga?
12hei sudara-sudara, boleh-kah pokok ara kluarkan buah zaitun, atau pokok anggor kluarkan buah ara? t'ada pula ayer asin boleh kluarkan ayer jerneh.
13Siapa-kah antara kamu yang bijaksana dan berakal? dngan lmah-lmbot yang datang deri bijaksana biar dia tunjokkan smoa dia punya perbuatan oleh klakuan yang baik.
14Ttapi jikalau kamu ada chmburuan yang pahit, dan lawanan dalam kamu punya hati, jangan tinggikan diri atas kbtulan itu, dan jangan bohong atas dia.
15Ini macham punya bijaksana bukan-nya bijaksana yang turun deri atas, ttapi deri-pada bumi, deri-pada tabi'at binatang, dan deri-pada iblis asal-nya.
16Kerna di mana ada chmburuan dan lawanan, di situ-lah ada kachau-mngachau dan macham-macham perbuatan yang jahat.
17Ttapi bijaksana yang deri atas itu mula-mula ada suchi, kmdian suka berdamai, dan manis, bukan dgil, pnoh dngan ksian dan buah-buahan yang baik, dngan t'ada sliseh dan t'ada pura-pura.
18Dan dia punya buah, ia'itu kbnaran, ada di-taburkan dngan damai kerna orang yang jadikan damai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel