Alkitab Mobile SABDA
[VER] : [BABA]     [PL]  [PB] 
 <<  Yohanes 19 >> 

1Habis itu, Pilatus ambil sama Isa, dan ssahkan dia.

2Dan soldado-soldado anyamkan makota deri pokok duri, dan pakaikan itu atas dia punya kpala, dan pakaikan dia baju werna ungu;

3kmdian dia-orang datang sama dia, dan kata, "Tabek, Raja orang Yahudi!" dan dia-orang tampar muka-nya.

4Dan lagi s-kali Pilatus kluar, dan kata sama dia-orang, "Tengok, sahya bawa dia kluar k-pada kamu smoa, spaya kamu boleh tahu yang sahya ini t'ada dapat apa-apa yang dia boleh kna d'awa."

5Jadi Isa pun kluar, dngan pakai itu makota pokok duri dan itu baju werna ungu. Dan Pilatus kata sama dia-orang, "Tengok, itu orang!"

6Jadi bila kpala-kpala imam dan mata-mata tengok Isa, dia-orang bertriak, kata, "Salibkan, salibkan." Pilatus kata sama dia-orang, "Kamu sndiri ambil sama dia, dan salibkan: kerna sahya ini t'ada dapat apa-apa yang dia boleh kna d'awa."

7Orang Yahudi jawab sama dia, "Kita orang ada satu hukum, dan ikut itu hukum dia patut mati, kerna dia sudah buatkan diri-nya Anak Allah."

8Bila Pilatus dngar ini perkata'an, dia makin lbeh takot;

9dan dia masok istana-nya lagi skali, dan kata sama Isa, "Angkau ini deri mana?" Ttapi Isa t'ada kasi jawab sama dia.

10Jadi Pilatus kata sama dia, "T'ada-kah angkau mau chakap sama sahya? t'ada-kah angkau tahu yang sahya ada kuasa lpaskan angkau, dan ada kuasa salibkan angkau?"

11Isa jawab sama dia, "Angkau t'ada satu kuasa atas sahya, kalau t'ada di-bri k-pada angkau deri atas: itu sbab-lah dia itu yang sudah srahkan sahya k-pada angkau ada dosa yang lbeh bsar."

12Deri-pada itu ktika Pilatus chari jalan mau lpaskan dia: ttapi orang Yahudi bertriak-triak, kata, "Jikalau tuan lpaskan ini orang, tuan bukan Kaisar punya kawan: barang-siapa yang buatkan diri-nya satu raja, dia mlawan Kaisar."

13Sbab itu bila Pilatus dngar ini smoa, dia bawa Isa kluar, dan dudok di krusi bichara di tmpat yang bernama Hamparan Batu, ttapi dngan bhasa Ibrani nama-nya Gabbata.

14Itu hari jadi hari Sdiakan Paska: waktu-nya ada pukol dua-blas bgitu. Dan Pilatus kata sama orang Yahudi, "Tengok, kamu punya Raja!"

15Sbab itu dia-orang bertriak-triak, "Kasi mampus, kasi mampus, salibkan dia." Pilatus kata sama dia-orang, "Boleh-kah sahya salibkan kamu punya raja?" Kpala-kpala imam jawab, "Kita t'ada raja lain deri-pada Kaisar."

16Habis itu, Pilatus srahkan Isa k-pada dia-orang spaya kna salib.

17Sbab itu dia-orang ambil sama Isa: dan dia kluar dngan sndiri angkat itu kayu salib, pergi tmpat yang bernama Tmpat Tngkorak, yang di-sbot Golgota dalam bhasa Ibrani:

18di situ-lah dia-orang salibkan dia, dan dua orang lain pula sama-sama dia, sblah mnyblah, dan Isa di tngah-tngah.

19Dan lagi pun Pilatus ada tulis satu surat alamat, dan taroh atas kayu salib. Dan ini-lah surat-nya: "ISA ORANG NASARAT, RAJA ORANG YAHUDI."

20Dan banyak orang Yahudi bacha ini surat alamat: kerna itu tmpat yang dia kna salib ada dkat negri: dan itu sudah tertulis dalam bhasa Ibrani, dan bhasa Rom, dan bhasa Grik.

21Jadi orang Yahudi punya kpala-kpala imam kata sama Pilatus, "Ta'usah tulis, 'Raja orang Yahudi,' ttapi yang itu orang sndiri sudah kata, 'Sahya ini-lah raja orang Yahudi.'"

22Pilatus jawab, "Apa yang sahya sudah tulis, sudah tulis."

23Jadi bila soldado-soldado itu sudah salibkan Isa, dia-orang ambil dia punya pakaian dan jadikan ampat bhagian, masing-masing soldado satu bhagian; dan baju-nya pun: dan itu baju t'ada bersambong, ttapi satu tnunan saja deri atas sampai bawah.

24Sbab itu dia-orang kata satu sama lain, "Kita jangan koyakkan ini, ttapi baik kita buang undi atas-nya, siapa-kah dapat." Spaya kitab boleh di-bnarkan yang sudah kata, "Orang bhagikan pakaian sahya sama sndiri, Dan atas sahya punya baju dia-orang buang undi." Jadi soldado-soldado buat ini smoa.

25Ttapi ada berdiri dkat salib Isa dia punya mak, dan mak-nya punya sudara prempuan, ia'itu Mariam bini Klopas, dan Mariam orang Magdala.

26Jadi bila Isa tengok mak-nya dan itu murid yang dia kaseh ada berdiri dkat, dia kata sama mak-nya, "Tengok mak punya anak!"

27Kmdian dia kata sama itu anak-murid pula, "Tengok angkau punya mak!" Dan deri-pada itu waktu, itu anak-murid sambot dia dalam rumah-nya sndiri.

28Kmdian deri-pada itu, sbab Isa tahu yang smoa perkara skarang sudah habis, spaya kitab boleh di-bnarkan, dia kata, "Sahya haus."

29Dan di situ ada terltak satu bkas berisi chuka: jadi orang taroh satu lumut-karang yang berisi chuka itu di atas s-batang pokok zufa, dan bawa sampai mulut Isa.

30Jadi bila Isa sudah trima itu chuka, dia kata, "Sudah habis." Dan dia tundok kpala, dan srahkan roh-nya.

31Sbab itu jadi hari-sdiakan, spaya mayat-mayat itu jangan tertinggal di atas salib tempo hari-perhentian (kerna itu hari perhentian satu hari-bsar), jadi orang-orang Yahudi minta Pilatus spaya itu orang punya kaki boleh di-patahkan, dan boleh di bawa pergi.

32Jadi itu soldado-soldado datang dan patahkan kaki orang yang pertama dan kaki orang yang lain yang sudah kna salib sama-sama Isa:

33ttapi bila dia-orang sampai dkat Isa pula, dan tengok yang dia sudah pun mati, dia-orang t'ada patahkan kaki-nya:

34ttapi dalam pada itu, ada satu soldado tikamkan rusok Isa dngan tombak, dan itu juga terkluar darah sama ayer.

35Dia yang sudah tengok sudah bersaksi, dan dia punya ksaksian ada btul: dan dia tahu yang dia chakap btul, spaya kamu smoa pun boleh perchaya.

36Kerna ini smoa sudah jadi spaya kitab boleh di-bnarkan, "S-batang tulang-nya pun t'ada nanti patah."

37Dan lagi satu suratan ada kata, "Dia-orang nanti tengok sama dia yang dia-orang sudah tikam."

38Habis ini smoa, Yusof orang Arimatiah (ia'itu satu anak-murid Isa juga, ttapi dngan smbunyi sbab takot orang Yahudi), minta Pilatus mau ambil Isa punya mayat: dan Pilatus kasi izin. Jadi dia datang, dan ambil mayat-nya.

39Dan Nikodimus, yang mula-mula datang k-pada Isa tempo malam, dia pun datang bawa mur champur gharu, ada s-ratus kati punya brat bgitu.

40Jadi dia-orang ambil mayat Isa, dan kapankan dngan kain khasah halus sama rmpah-rmpah, sperti adat orang Yahudi tanamkan orang.

41Di tmpat di mana Isa sudah di-salibkan ada satu kbun, dan dalam itu kbun ada satu kubor bharu, yang blum pernah orang di-tanamkan dalam-nya.

42Deri sbab orang Yahudi punya hari-sdiakan, di situ-lah dia-orang taroh mayat Isa: kerna itu kubor ada dkat.



 <<  Yohanes 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel