Alkitab Mobile SABDA
[VER] : [BALI]     [PL]  [PB] 
 <<  Bilangan 32 >> 

Suku-

1Suku-suku Ruben miwah Gad akeh pisan maderbe ingon-ingon. Rikala panggihin ipun mungguing tanah Yaeser miwah tanah Gilead punika becik pisan buat genah ngubuh ingon-ingon,

2ipun raris nangkil ring Dane Musa, Dane Eleasar miwah parapamimpin Israele sane lianan maduluran atur sapuniki:

3“Tanahe ring kota-kota Atarot, Dibon, Yaeser, Nimra, Hesbon, Eleale, Sebam, Nebo, miwah Beon sane sampun kaug antuk bangsa Israele, malantaran pitulungan Ida Sang Hyang Widi Wasa, becik pisan buat genah ngubuh ingon-ingon. Santukan ingon-ingon tiange akeh pisan,

4(32:3)

5paicayangja tanahe punika ring tiang mangda dados paderbean tiange. Sampunangja tiang nikayanga magingsir ka dauh Tukad Yordane.”

6Pasaur Dane Musa sapuniki: “Punapike semeton mapakayunan jenek iriki, rikala bangsan semetone kantun ngarepin yuda?

7Punapi awinanipun semeton jaga purun pisan ngawinang bangsa Israele jejeh nglintangin Tukad Yordane jaga ngaug jagat sane kapaicayang ring ipun antuk Ida Sang Hyang Widi Wasa?

8Sane riin ajin semetone taler sampun malaksana kadi asapunika, rikala dane utus tiang saking Kades-Barnea buat nyelehin jagate punika.

9Dane sampun lunga rauh ring Lebak Eskol tur sampun ngaksi tanahe punika, nanging rikalaning mawali, dane ngawinang bangsa Israele jejeh jagi ngaug jagate sane sampun kapaicayang antuk Ida Sang Hyang Widi Wasa ring ipun.

10Duaning punika ring rahina punika ugi Ida Sang Hyang Widi Wasa raris duka sarwi ngandika sapuniki:

11‘Jalma-jalmane ene tusing satia teken Ulun. Sawireh keto Ulun masumpah, mungguing uli di pantarannyane, ane suba matuuh duang dasa tiban wiadin lebihan teken ento, dugase ia makaad uli di Mesir, tusing ada ane lakar ngentap gumi ane suba janjiang Ulun teken Abraham, Ishak muah Yakub.’

12Anake punika makasami keni ukumane punika, sajawining Dane Kaleb okan Dane Yepune, wong Kenase punika, miwah Dane Yosua okan Dane Nune, santukan sang kalih satia tuu ring Ida Sang Hyang Widi Wasa.

13Ida Sang Hyang Widi Wasa duka pisan ring bangsa Israel kantos ipun kabanggayang ngumbara ring tegal melakange ngantos petang dasa taun suenipun, kantos sawatek anake sane brontak ring Ida punika makasami padem.

14Sane mangkin semeton mapakayunan pateh sakadi aji-ajin semetone punika. Semeton jati-jati wantah katurunan sane madosa. Malantaran laksanan semetone punika, semeton nundunin pidukan Ida Sang Hyang Widi Wasa sane tan sipi marep ring bangsa Israele.

15Yening sane mangkin semeton sawatek suku Ruben miwah Gad nenten sareng sairing ring pakayunan Ida Sang Hyang Widi Wasa, Ida pacang malih ngutang bangsane puniki makasami ring tegal melakange, tur semeton sane ngawinang pakewuh ipune punika.”

16Irika suku Ruben miwah suku Gad punika nganampekin Dane Musa sarwi matur sapuniki: “Lugrainja dumun tiang ngwangun kandang sane matembok pabuat biri-birin tiange, miwah kota-kota sane mabenteng pabuat pianak-pianak tiange.

17Sasampune punika, wau tiang sayaga pacang mangseh mayuda sareng ring semeton-semeton tiange tunggal bangsa. Tiang sane jaga mamuncukin yudane punika, kantos semeton-semeton tiange punika prasida genahang tiang ring jagat sane jaga dados paderbeannyane. Sakantun tiange ring payudan, pianak-pianak tiange mrasidayang magenah iriki, ring kota-kota sane mabenteng, tur nenten kusak-asik antuk jadma uedan jagate puniki.

18Sadurung wong Israel makasami polih duman tanah sane dados paderbeannyane, tiang nenten jaga mawali budal.

19Tiang nenten jaga ngambil angan atapak saking tanahnyane sane dauh Tukad Yordane, santukan tiang sampun polih iriki ring dangin Tukad Yordane.”

20Pasaur Dane Musa sapuniki: “Yening pasaur semetone punika sawiakti metu saking nekeng ati, becik sane mangkin iriki ring ayun Ida Sang Hyang Widi Wasa, semeton pada yatna jaga mayuda.

21Sawatek anak sane nyidayang mayuda ring pantaran semetone, patut sareng nglintangin Tukad Yordane, tur malantaran tantanan Ida Sang Hyang Widi Wasa semeton patut nglawan meseh-meseh iragane, kantos Ida Sang Hyang Widi Wasa ngaonang ipun,

22tur ngrampas jagate punika. Sasampune punika wau semeton dados mawali, santukan semeton sampun muputang ayah semetone marep ring Ida Sang Hyang Widi Wasa miwah ring bangsan semetone. Irika Ida Sang Hyang Widi Wasa jaga ngamanggehang, mungguing tanahe sane dangin tukad punika taler dados paderbean semetone.

23Nanging elingangja, yening semeton lompang ring janji, semeton madosa ring ayun Ida Sang Hyang Widi Wasa. Duaning punika sampunangja malaksana iwang, mangda sampunang semeton kukum malantaran dosan semetone.

24Sane mangkin rarisang ngwangun kota-kota miwah kandang-kandang buat biri-birin semetone, nanging elingang pisan, semeton patut tuon ring janjin semetone.”

25Irika wong Gad miwah wong Rubene, sami pada matur sapuniki: “Inggih semeton, tiang sareng sami jaga nglaksanayang sapangandikan semetone punika.

26Pianak somah tiange miwah ingon-ingon tiange, banteng lan biri-birin tiange jaga banggayang tiang iriki ring kota-kota Gilead.

27Nanging tiang sareng sami sayaga jaga mayuda sajeroning pimpinan Ida Sang Hyang Widi Wasa. Tiang jaga nglintangin Tukad Yordane tur pacang mayuda sakadi sane sampun baosang semeton.”

28Dane Musa tumuli ngwedalang prentah ring Dane Eleasar, Yosua miwah ring parapamimpin Israele, sapuniki:

29“Yening suku Gad miwah Rubene punika satinut ring titah Ida Sang Hyang Widi Wasa, tur sareng-sareng nglintangin Tukad Yordane buat jaga mayuda, samaliha yening malantaran pitulungannyane semeton mrasidayang ngaonang jagate punika, semeton patut ngwehin ipun sareng sami tanah Gileade makadados paderbean ipune.

30Nanging yening ipun nenten sareng nglintangin Tukad Yordane, buat mayuda nyarengin semeton, ipun patut polih duman waris ring jagat Kanaan, pateh sakadi semeton.”

31Wong Gad miwah Rubene sami pada masaur, sapuniki: “Inggih semeton tiang sareng sami jagi nglaksanayang sapatitah Ida Sang Hyang Widi Wasa.

32Sajeroning pimpinan Ida Sang Hyang Widi Wasa tiang jaga nglintangin Tukad Yordane ngungsi jagat Kanaan, tur mangseh mayuda, mangda tiang mrasidayang ngamanggehang paderbean tiange iriki, ring dangin Tukad Yordane.”

33Irika Dane Musa tumuli nyerahang ring suku Gad, suku Ruben miwah ring suku Manasene atenga, tanah-tanah sane pecak dados wewidangan Sang Prabu Sihon, ratun wong Amorine, miwah wewidangan Sang Prabu Og saking Basan, rauh ring kota-kota miwah tanah sane wenten ring kiwa tengennyane.

34Suku Gad raris ngwangun malih kota Dibon, Atarot, Aroer,

35Atarot-Sopan, Yaeser, Yogbeha,

36Bet-Nimra, miwah Bet-Haran.

37Suku Ruben ngwangun malih kota-kota: Hesbon, Eleale, Kiryataim,

38Nebo, Baal-Meon (wastan kotane puniki kesehin) miwah Sibma. Wastan kota sane kawangun malih punika kesehin antuk wasta sane anyar.

39Palingsehan Dane Makir, okan Dane Manase, raris ngebug tanah Gileade tumuli ngaug tur ngulah wong Amorine sane wenten irika.

40Duaning punika Dane Musa raris maicayang tanah Gilead punika ring palingsehan Dane Makir, tur dane raris jenek irika.

41Dane Yair saking suku Manase, taler ngebug tur ngrampas makudang-kudang desa. Desa-desane punika raris kawastanin “Desa Yair”.

42Dane Nobah raris ngebug tur ngrampas kota Kenat miwah desa-desannyane. Kotane punika raris kawastanin Nobah, manut pesengannyane.



 <<  Bilangan 32 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel