Panga
1Duh Ratu Widin titiange, luputangja titiang saking meseh-meseh titiange. Sayubinja titiang saking jadmane sane nglawan titiang!
2Rahayuangja titiang saking jadmane sane corah, tur luputangja titiang saking jadmane sane amati-mati!
3Indayangja suryanin, ipun pada ngantosang jaga ngamademang titiang. Jadmane angkara murka pada mapunduh jaga nglawan titiang. Indike punika boyaja malantaran dosa wiadin kiwangan sane sampun laksanayang titiang.
4Oduh Ratu Sang Hyang Widi Wasa, boyaja malantaran kiwangan titiange ngantos ipun pada gegison ngungsi genahipune nyadang titiang.
5Duh Ratu Sang Hyang Widi Wasa, Widi Sane Maha Wisesa, rarisangja matangi, tur tulunginja titiang. Palungguh IRatu ngraga makadados Widin Israele. Rarisangja matangi tur sisipangja jadmane sane tan pawidi punika. Sampunangja Palungguh IRatu nyinahang sih pasuecan ring jadmane sane dura cara.
6Ipun pada mawali rikalaning wengi, tur ipun pada aung-aung sakadi asune rikala ipun milehan ring kota.
7Pirengangja baosnyane sane nganistayang tur ngancam. Layahipune sakadi pedang ring bungutipune, yadiastu ipun uning mungguing nenten wenten anak sane miragiang suaranipune.
8Nanging Palungguh IRatu ica nyingak ipun, duh Ratu Sang Hyang Widi Wasa! Palungguh IRatu nganistayang sakancan jadmane sane tan pawidi punika.
9Duh Ratu Sang Hyang Widi Wasa, titiang andel pisan ring kakuatan Palungguh IRatu. Palungguh IRatu dados pasayuban titiange.
10Widin titiange sueca ring titiang tur Ida ledang ngrauhin titiang. Ida jaga nglugrain titiang ngeton meseh-meseh titiange kakaonang.
11Duh Ratu Sang Hyang Widi Wasa, sampunang Palungguh IRatu ngamademang ipun mangda sampunang bangsan titiange lali. Duh Ratu Panembahan pasayuban titiange, sambehangja ipun antuk kawisesan Palungguh IRatune, tur kaonangja ipun.
12Bibihipune bek ngemu dosa tur baos ipune makasami bek madaging dosa. Dumadak mangda ipun kejuk malantaran kasumbungan ipune! Santukan ipun demen nemah misuh miwah mobab,
13sirnayangja ipun antuk pidukan Palungguh IRatune. Sirnayangja ipun kantos basmi kerta. Sasampune punika sakancan anake jaga uning, mungguing Ida Sang Hyang Widi Wasa sane mrentah ring Israel, tur pamrentahan Idane nguub jagate makasami.
14Meseh-meseh titiange pada mawali rikalaning wengi, tur ipun aung-aung sakadi asune rikala ipun milehan ring kota.
15Ipun waluya sakadi asune sane nglelana milehan ngrereh teda, tur ipun gereng-gereng yening ipun nenten jangkep polih tetedan.
16Nanging titiang jaga makidung ngeniang indik kakuatan Palungguh IRatu. Nyabran semeng titiang jaga makidung gelar-gelur ngeniang indik sih pasuecan Palungguh IRatune sane nenten rered-rered punika. Palungguh IRatu sampun dados pasayuban titiange rikalaning titiang nemu kamewehan.
17Titiang jaga muji Palungguh IRatu, duh Ratu patindih titiange. Genah pasayuban titiange punika Ida Sang Hyang Widi Wasa, Widi sane asih sueca ring titiang.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel