Panga
1Duh Ratu Sang Hyang Widi Wasa, titiang rauh nunas pasayuban ring ayun Palungguh IRatu. Sampunangja banggayanga titiang kantos kakaonang!
2Santukan Palungguh IRatu maraga adil, tulungin tur luputangja titiang. Pirengangja atur titiange, tur rahayuangja titiang!
3Dadosja genah pasayuban titiange sane kukuh miwah benteng sane kukuh bakuh buat nyayubin titiang. Palungguh IRatu dados pasayuban miwah benteng titiange.
4Duh Ratu Widin titiange, luputangja titiang saking jadmane dursila miwah saking kawisesan jadmane sane wirosa miwah corah.
5Duh Ratu Sang Hyang Widi Wasa, titiang wantah ngajap-ajap Palungguh IRatu. Titiang sampun suksrah ring Palungguh IRatu ngawit saking titiang kantun wimuda.
6Titiang sampun nyuksrahang urip titiange ring ayun Palungguh IRatu. Palungguh IRatu sampun nyayubin titiang ngawit saking titiang wau lekad. Titiang setata jaga muji Palungguh IRatu.
7Urip titiange sampun dados conto pabuat anake akeh, santukan Palungguh IRatu sampun dados patindih titiange sane kukuh bakuh.
8Arahina mepek titiang muji Palungguh IRatu tur nglumbrahang kaluihan Palungguh IRatune.
9Sane mangkin sasampune titiang tua, sampunangja titiang tulaka. Sampunangja Palungguh IRatu nilar titiang sasampune titiang tan pabayu.
10Meseh-meseh titiange mamanah jaga ngamademang titiang. Ipun pada mabebaosan miwah mapiguman jaga nglawan titiang.
11Ipun pada mabaos sapuniki: “Ida Sang Hyang Widi Wasa suba ngutang ia. Jalan jani kepung tur juk ia, sinah tusing ada anak ane lakar ngluputang ia.”
12Duh Ratu Sang Hyang Widi Wasa, sampunangja Palungguh IRatu ngedoh saking titiang. Duh Widin titiange, tulunginja titiang digelis!
13Dumadakja jadmane sane nyengkalen titiang pada kakaonang tur kasirnayang. Dumadakja jadmane sane mamanah nyakitin titiang pada nandang kimud miwah kanistan.
14Titiang jaga tansah ngajap-ajap Palungguh IRatu, titiang jaga muji Palungguh IRatu mawanti-wanti.
15Titiang jaga nuturang kabecikan Palungguh IRatune tur arahina mepek titiang jaga maosang karahayuan paican Palungguh IRatune, yadiastun indike punika nglangkungin pangresepan titiange.
16Duh Ratu Sang Hyang Widi Wasa, Widi Sang Murbengrat, titiang jaga muji kawisesan Palungguh IRatune. Titiang jaga nglumbrahang kabecikan Palungguh IRatune kewanten.
17Palungguh IRatu sampun nguruk titiang ngawit saking titiang kantun muda, tur titiang tetep nuturang indik pamargin Palungguh IRatune sane ngangobin.
18Sane mangkin sasampun titiange tua tur bok titiange sampun uban, duh Ratu Sang Hyang Widi Wasa, sampunangja Palungguh IRatu nilar titiang. Sarenginja titiang risedek titiang nglumbrahang kakuatan miwah kawisesan Palungguh IRatu, ring katurunan jadmane sane pacang rauh.
19Duh Ratu Sang Hyang Widi Wasa, kadilan Palungguh IRatune rauh ka langite. Palungguh IRatu sampun ngardi paindikan-paindikan sane ageng. Nenten wenten anak sane nyamenin Palungguh IRatu.
20Palungguh IRatu sampun niwakang kamewehan miwah kasangsaran ring titiang, nanging Palungguh IRatu jaga ngwaliang kakuatan titiange. Palungguh IRatu jaga ngraksa titiang mangda titiang nenten labuh ka bangbang patine.
21Palungguh IRatu jaga nadosang titiang agungan ring sane sampun-sampun. Palungguh IRatu jaga malih nglipurang titiang.
22Saking wiakti titiang jaga muji Palungguh IRatu antuk suaran rebab. Duh Ratu Sane Maha Sucin Israele, titiang jaga nyuarayang kidung antuk rebab pabuat Palungguh IRatu.
23Titiang jaga masuryak-suryak malantaran bungah ring manah rikalaning titiang matetabuhan muji Palungguh IRatu. Antuk bayu sabda idep titiange, titiang jaga makidung, santukan Palungguh IRatu sampun ngrahayuang titiang.
24Arahina mepek titiang jaga maosang indik kadilan Palungguh IRatune, santukan jadmane sane mamanah nyengkalen titiang sampun kakaonang tur kanistayang.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel