Indik
1“Upaminipun wenten anak muani ngambil anak luh kanggen somah, raris wekasan ipun antuk nenten demen ring anake luh punika, santukan anak luh punika iwang tur laksanannyane ngawinang kimud. Duaning punika ipun raris makarya surat palas makurenan, raris kaserahang ring anake luh punika, tur anake luh punika raris katundung saking umahipune.
2Sapanglanturipun anake luh punika raris nganten ngajak anak muani lianan,
3tur anake muani punika taler nenten demen ring anake luh punika, raris anake muani punika taler makarya surat palas, tumuli kaserahang ring anake luh punika, tur ipun katundung saking umah anake muani punika. Wiadin kurenanipune sane kaping kalih punika padem.
4Sajeroning paindikane puniki, kenginan somahipune sane pangawit punika nenten dados malih nganten ngajak ipun. Anake muani punika patut nganggep anake luh punika sampun cemer. Yen anake muani punika malih nganten ngajak ipun, indike punika nganistayang Ida Sang Hyang Widi Wasa. Parasemeton nenten dados ngardi dosa sane jaat kadi asapunika ring jagat sane pacang kapaicayang antuk Ida Sang Hyang Widi Wasa, Widin semetone ring semeton.”
Pidab
5“Yening wenten anak wau makurenan, sampunang ipun pategenina tetegenan dados prajurit wiadin ayah-ayahan sane lianan. Ipun patut kicen luput ayah ataun suenipun, mangdane ipun mrasidayang nabdabang pumahanipune saha ngawinang liang manah somahipune.
6Yening semeton maselangang barang wiadin jinah ring anak lian, sampunangja semeton ngambil batu pangilesan jagungipune anggen semeton gegaden. Indike punika mapiteges semeton ngrampas prabot sane anggen ipun nyediang pakurenanipune pangan mangdane ipun prasida kantun urip.
7Sapasiraja ngejuk sesamanipune wong Israel tur kadadosang panjak wiadin kadol dados panjak, anake punika patut kapademang. Malantaran punika semeton prasida mrasta kajaatane punika.
8Yening semeton keni pinakit kulit sane mayanin, becikangja nglaksanayang pituduh parapandita Lewine ring semeton, tur tinutinja saananing pituduh sane sampun rauhang tiang ring dane sami.
9Elingangja paindikane sane sampun kamargiang antuk Ida Sang Hyang Widi Wasa, Widin semetone, marep ring Dane Miryam, duke semeton rarud saking Mesir.
10Yening semeton maselangang barang wiadin jinah ring anak lianan, sampunangja semeton ngranjing ka umah metenipune buat jaga ngambil pangangge sane jaga kanggen gegaden sane jaga kaserahang ring semeton,
11nanging jantosangja ring sisian tur banggayang ipun newek sane maktayang semeton.
12Yening ipun anak lacur, sampunangja inepanga gegadene punika jumah semetone,
13nanging ulihangja ring ipun sabilang sore, mangdane wenten anggen ipun pules. Kenginan ipun pacang marasa suksma ring manah, tur Ida Sang Hyang Widi Wasa, Widin semetone pacang ledang ring semeton.
14Sampunangja semeton melog-melog buruh sane tiwas tur kekirangan, yadian ipun wong Israel wiadin wong sunantara sane madunungan ring salah tunggil kotan semetone.
15Nyabran rahina, sadurung suryane surup, taurja upah pakaryanipune ring rahinane punika. Ipun merluang jinahe punika tur ngajap-ajap jagi polih upah. Yening semeton nenten naur upahipune, ipun jagi masesambatan ring ayun Ida Sang Hyang Widi Wasa, nguningayang indik semetone, tur semeton jaga kawastanin madosa.
16Sampunangja semeton ngamademang wong tuannyane ulihan pianakipune malaksana corah kadi asapunika taler sampunang semeton mademang pianaknyane, malantaran wong tuanipune sane malaksana corah. Asing-asing anak patut kadanda pati wantah malantaran kacorahane sane laksanayang ipun newek.
17Sampunangja semeton ngrampas hak wong sunantara miwah anak ubuh, samaliha sampunang semeton ngambil panganggen anak balu makadados gegaden.
18Elingangja mungguing semeton taler naenin dados panjak ring Mesir, tur Ida Sang Hyang Widi Wasa, Widin semetone sampun mebasang semeton. Punika awinanipun tiang ngaturin semeton pidabdabe puniki.
19Rikalaning semeton ngampung gandum semetone, raris wenten makutang apesel ring pategalane, sampunangja semeton malipetan ka tegale buat ngambil gandum sane makutang punika. Banggayangja gandume punika makutang pabuat parawong sunantara, anake ubuh-ubuh miwah anake balu-balu, mangdane Ida Sang Hyang Widi Wasa, Widin semetone ledang ngamertanin semeton ring saluiring pakibeh semetone.
20Rikalaning semeton ngalapin woh saitun semetone, sampunangja sliksika ngrereh woh saitun sane makutang. Banggayang punika pabuat parawong sunantara, anake ubuh-ubuh miwah anake balu-balu.
21Rikalaning semeton ngalapin anggur semetone, sampunangja malih wawanina ngrerehin woh anggur sane makutang. Banggayang woh anggur sane makutang punika pabuat parawong sunantara, anak ubuh-ubuh miwah anak balu-balu.
22Sampunang semeton kantos lali, mungguing semeton naenin dados panjak ring Mesir. Punika awinanipun tiang ngaturin semeton pidabdabe puniki.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel