Kaula
1“Ida Sang Hyang Widi Wasa, Widin semetone jaga nantan parasemeton ka jagat sane pacang aug semeton, tur Ida pacang ngingsirang bangsa-bangsane saking irika. Ida jaga ngaonang saking ajeng semetone bangsa pepitu sane agengan tur kuatan ring semeton luiripun: Bangsa Het, Girgasi, Amori, Kanaan, Peris, Hewi miwah Yebus.
2Yening Ida Sang Hyang Widi Wasa, Widin semetone sampun nyerahang bangsa-bangsane punika ring kakuasan semetone tur semeton ngaonang ipun makasami, semeton patut ngamademang ipun makasami. Sampunang ngardi prajanjian ring ipun wiadin madalem ipun.
3Parasemeton nenten dados ngambil ipun dados rabin semetone, tur sampunang icena oka-okan semetone nganten ngajak salah tunggal saking pantaran ipune,
4mangda sampunang kantos ipun ngajak oka-okan semetone doh saking Ida Sang Hyang Widi Wasa raris nyungsung widi-widi sane tiosan. Ida Sang Hyang Widi Wasa pacang duka ring semeton, yening semeton nyungsung widi-widi sane tiosan tur digelis semeton pacang kasirnayang.
5Duaning punika semeton patut nguugang pamorboran aturan bangsa-bangsane punika, uugangja tugu-tugu batunnyane, miwah genahe sane anggep ipun tenget. Tuludangja arca-arcan Dewi Aserane, tur tunjelja arca-arcane sane sembah ipun.
6Margiangja indike punika duaning semeton puniki druen Ida Sang Hyang Widi Wasa, Widin semetone. Semeton sampun selik Ida saking pantaran parabangsane ring mrecapada, jaga dadosang Ida kaulan Idane sane istimewa.
7Parasemeton suecanin tur selik Ida, boyaja ulihan parasemeton agengan ring bangsa-bangsane sane tiosan, malahan semeton puniki dados bangsa sane pinih alita ring mrecapada.
8Nanging Ida Sang Hyang Widi Wasa nyuecanin semeton, tur Ida mapakayun jaga negepang prajanjian Idane marep ring leluur parasemeton. Punika awinanipun Ida sampun ngrahayuang semeton malantaran kakuasan sane ageng, tur mebasang semeton saking genah semetone mamanjak ring sang prabu Mesire.
9Elingangja Ida Sang Hyang Widi Wasa, Widin semetone punika Widi sane tunggal, tur Ida punika Ida Sang Hyang Widi Wasa sane satia. Pabuat anake sane astiti bakti tur nglaksanayang titah-titah Idane, Ida pacang negepang prajanjian Idane tur nyinahang pasuecan Idane sane langgeng kantos siu katurunan.
10Nanging Ida pacang tan urungan ngukum anake sane geting ring Ida.
11Duaning punika, parasemeton patut tuon nglaksanayang sakancan sane sampun kurukang ring semeton. Laksanayangja pidabdab-pidabdabe sane sampun aturang tiang ring parasemeton ring rahinane puniki.”
Merta
12“Yening parasemeton ngincepang titah-titahe punika tur tuon nglaksanayang, Ida Sang Hyang Widi Wasa, Widin semetone pacang satia ring prajanjian sane kardi Ida ring semeton. Ida pacang nyinahang pasuecan Idane sane langgeng ring parasemeton, sakadi sane sampun janjiang Ida ring leluur parasemetone.
13Parasemeton jaga suecanin miwah mertanin Ida, kantos semeton madue oka akeh tur sayan mawuwuh-wuwuh. Tegal-tegalan semetone jaga mertanin Ida kantos muponin gandum, anggur miwah minyak saitun. Parasemeton jaga kapaicain banteng miwah biri-biri akeh pisan. Mertane punika makasami pacang kapaicayang antuk Ida Sang Hyang Widi Wasa ring semeton ring jagate sane pacang paicayang Ida ring semeton, anut ring janjin Idane ring leluur parasemetone.
14Saking pantaran parabangsane ring mrecapada, angan asikiko nenten wenten sane polih merta sane maliah-liah sakadi semeton. Saking pantaran semetone tan wenten sane pacang bekung, miwah ingon-ingon semetone angan asikiko nenten wenten sane jubeng.
15Parasemeton pacang kasayubin antuk Ida Sang Hyang Widi Wasa saking saananing pinakit, tur kadohang saking grubug sane ageng sane aksi semeton ring Mesir, nanging sakancan bencanane punika jaga tiwakang Ida ring meseh-meseh semetone.
16Asing-asing bangsa sane kaserahang antuk Ida Sang Hyang Widi Wasa, Widin semetone ring semeton, ipun patut sirnayang semeton. Sampunang semeton madalem bangsane punika. Sampunang pisan semeton nyungsung widin bangsane punika, duaning indike punika pacang ngundang pati pabuat semeton.
17Sampunang semeton mapakayun mungguing bangsa-bangsane punika akehan ring semeton kantos semeton nenten nyidayang ngaonang ipun.
18Sampunang semeton ajerih ring ipun. Elingangja indik sane kamargiang antuk Ida Sang Hyang Widi Wasa, Widin semetone marep ring sang prabu Mesire miwah rakyat idane.
19Elingangja ring bencana-bencana ageng sane aksi semeton ngraga, katawahan-katawahan sane ngangobin miwah kawisesan sane ageng sane kanggen antuk Ida Sang Hyang Widi Wasa, Widin semetone buat mebasang parasemeton. Bangsa-bangsane makasami sane ajerihin semeton pacang kasirnayang antuk Ida Sang Hyang Widi Wasa, sakadi Ida sampun nyirnayang wong Mesire.
20Malahan Ida pacang ngawinang ipun pada bingung, tur sane malaib buat nyingidang deweknyane pacang kasirnayang.
21Dadosipun, sampunangja semeton ajerih ring bangsa-bangsane punika. Ida Sang Hyang Widi Wasa, Widin semetone ngiangin semeton. Ida punika Widi sane maha agung. Semeton patut ajerih ring Ida.
22Bangsa-bangsane punika pacang sirnayang Ida saka kidik saking ajeng parasemetone. Parasemeton nenten pacang nyidayang nyirnayang ipun apisan, mangda sampunang sato galake raris ngakehang tur dados pakewuh pabuat parasemeton.
23Ida Sang Hyang Widi Wasa pacang nyerahang meseh-meseh semetone ring semeton. Ida jaga ngardi ipun bingung kantos ipun sirna.
24Pararatunnyane jaga serahang Ida ring kakuasan parasemetone. Pararatune punika makasami jaga sedayang semeton tur pungkuran pacang kalaliang. Nenten wenten anak angan asiki sane jaga nyidayang nawengin semeton, makasami jaga sirnayang semeton.
25Arca-arcane sane sungsung ipun patut tunjel semeton. Sampunang semeton ngedotang perak wiadin mas sane madeket ring arca-arcane punika tur sampunang semeton ngambil perak wiadin mas punika pabuat ragan semetone. Yening parasemeton mamurug titahe punika, parasemeton pacang padem, duaning Ida Sang Hyang Widi Wasa duka ring indik nyumbah arca.
26Sampunang parasemeton raris makta arcane punika angan asiki kumah semetone, mangdane temah sane nibenin ipun sampunang nibenin parasemeton. Parasemeton patut geting tur nganistayang arca-arcane punika, duaning ipun sampun keni temah Ida Sang Hyang Widi Wasa.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel