Panga
1Ida Sang Hyang Widi Wasa ngandika ring tiang sapuniki:
2“Ih manusa, orahangja teken wong Israele pangandene ene,
3apang tawanga sabdan Ulun Sang Hyang Widi Wasa Sang Maha Luur, ane katiba teken ia, kene: Ada kedis garuda gede pesan, bulunne melah pesan muah kampidne makebat lumbang pesan. Kedise ento makeber ngungsi Gunung Libanone laut munggel muncuk kayu arase.
4Punggelane ento abana ka gumin soroh dagange, tur pejanga di kotan soroh sudagare.
5Sasubane keto, ia laut ngalih entik-entikan ane muda di gumin Israele, tumuli pulana di tegale ane mokoh ane tansah cokin yeh, ane ngranayang ia enggal mentik.
6Entik-entikane ento laut mentik dadi punyan anggur ane ipak tur endep. Carang-carangnyane tumbuh nyujuh kedis garudane ento, tur akahne tumbuh ngancan dalem. Punyan anggure ento kakaput baan carang muah donnyane.
7Laut ada buin kedis garuda ane lenan, kampidne lumbang muah bulunne tebel pesan. Ane jani punyan anggure ento mesuang akahne nyujuh kedis garudane ento, aketo masih donnyane nyujuh kedis garudane ento, tur ngati-ati apang ia maan yeh uli kedis garudane ento, lebihan teken yehe ane ada sig abiane tongosnyane mentik ento.
8Nanging punyan anggure ento suba kapula sig tanahe ane lemek, tegalan ane cukup yehnyane, kanti ia nyidayang numbuhang don tur mesuang buah, dadi punyan anggur ane melah.
9Sawireh keto, Ulun Sang Hyang Widi Wasa Sang Maha Luur matakon kene: Apake punyan anggure ene lakar idup tur tumbuh ngedenang? Singke kedis garudane ane simalu ento lakar ngabut ia kayang ka akahne, ngaasang buah tur ngelung carang-carangne, laut depinina kanti layu? Buat ngabut punyan anggure ento tusingja merluang bangsa ane kuat wiadin mawisesa.
10Nah, saja ia mula kapula, nanging apake ia lakar idup muah tumbuh ngedenang? Tusingke ia lakar layu dikalane ada angin uli kangin ane nempuh ia? Tusingke ia lakar layu sig tongosne mentik ento?”
Panga
11Ida Sang Hyang Widi Wasa ngandika ring tiang, sapuniki:
12“Takonang teken pembrontake ento, apake ia nawang artin pangandene ento? Orahang teken ia mungguing sang prabu uli Babel lakar teka ka Yerusalem, laut ngejuk sang prabu muah prakanggonnyane kajak ka Babel.
13Sang prabu uli Babel lakar nyemak kulawargan sang prabune adiri tumuli kajak ngae prajanjian tur tundene masumpah apanga satia teken ia. Ida ngejuk anak ane sulinggih kanggon sandera,
14apanga bangsane ento tusing nyidayang buin rajeg, tur apang sinah mungguing prajanjiane ento saja kamanggehang.
15Nanging sang prabune di Yehuda laut brontak tur ngutus utusan ka Mesir buat ngalih jaran muah wadua bala liu pesan. Apake ia lakar sida karya? Apake ia lakar nyidayang luput? Ia tusing nyidayang muungang prajanjiane ento laut bebas uli ukuman.”
16Ida Sang Hyang Widi Wasa Sane Maha Luur ngandika sapuniki: “Sasajaane Ulun ene Ida Sang Hyang Widi Wasa ane nyeneng. Sang prabune ento lakar mati di Babel, sawireh ia lompang teken sumpah muah prajanjian ane gaena ngajak sang prabu uli Babel, ane ngadegang ia jumeneng nata.
17Yadiastu wadua balan sang prabu Mesire ane mawisesako, tusing lakar nyidayang nulungin ia masiat, dikalan wong Babele ngwangun tembok-tembok buat ngurung kotane muah ngae bangbang anggona benteng, buat lakar ngamatiang jlema liu pesan.
18Ia lompang teken sumpah muah prajanjian ane gaena ia. Ia nglaksanayang unduke ento makejang tur ane jani ia tusing lakar nyidaang luput.”
19Ida Sang Hyang Widi Wasa Sane Maha Luur ngandika, sapuniki: “Sasajaane Ulun ene Widi ane nyeneng. Ulun lakar nyisipang ia, sawireh ia lompang teken prajanjian muah sumpah ane sumpahanga sajeroning parab Ulune.
20Ulun lakar masang jaring juru borose tur ngejuk ia aji jaringe ento. Ulun lakar ngajak ia ka Babel laut nyisipang ia ditu, sawireh ia tusing satia tuu teken Ulun.
21Prajurit-prajuritnyane ane paling sura dirana lakar kamatiang di pasiatan tur ane enu lakar sambeh pablesat milehan. Sasubane keto, kita lakar nawang, mungguing Ulun Sang Hyang Widi Wasa ane masabda buka keto.”
Janji
22Sapuniki sabdan Ida Sang Hyang Widi Wasa Sane Maha Luur: “Ulun lakar munggel muncuk punyan arase ane tegeh, tur ngempak carangne ane muda. Ulun lakar mamula carange ento di gununge ane tegeh,
23di gunung Israele ane paling tegehe. Punyan arase ento lakar numbuhang carang-carang muah buah, tur lakar dadi punyan aras melah. Soroh kedise lakar pada nongos ditu tur maan pasayuban sig punyannyane ane rob.
24Sakancan kayune ane di gumine ento lakar nawang, mungguing Ulun ene Ida Sang Hyang Widi Wasa. Ulun ngetep kayune ane tegeh muah ngadakang kayune ane endep apang dadi tegeh. Ulun ngadakang kayune ane gadang lumlum dadi layu muah ngadakang kayune ane tuh apang dadi gadang lumlum. Ulun Sang Hyang Widi Wasa ane masabda buka keto. Ulun lakar nglaksanayang sakancan ane suba nikayang Ulun ento.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel