Ida S
1Ida Sang Hyang Widi Wasa ngandika sapuniki: “Ih manusa, ngraosja kita teken gunung-gunung Israele. Tunden ia madingehang pawarah Ulun,
2Ida Sang Hyang Widi Wasa Sang Maha Luur ane katiba teken ia, kene: Musuh-musuh Israele pada demen atinne, sambilanga pada ngucap kene: ‘Ane jani bukit-bukite ane lawas ento suba dadi gelah iragane.’
3Sawireh keto ramalangja, tur warah-warahangja sabdan Ulun Sang Hyang Widi Wasa Sang Maha Luur kene: Dikalan bangsa-bangsane ane di kiwa tengennyane ngalahang tur ngrampas gunung-gunung Israele, ia ajaka makejang pada nganistayang bangsa Israel.
4Sawireh keto, ane jani padingehangja sabdan Ulun Sang Hyang Widi Wasa Sang Maha Luur ane katiba teken iba, ih soroh gunung-gunung muah bukit-bukit, soroh tukad muah lebake, soroh tongos-tongose ane enu uug, sakancan kota-kota ane karampas muah kewerin baan bangsa-bangsa ane di kiwa tengennyane.
5Ulun Sang Hyang Widi Wasa Sang Maha Luur, sajeroning Ulun duka angarab-arab, Ulun ngandika teken bangsane ane di kiwa tengennyane, pamekasne pesan teken bangsa Edome. Saking liang ia nganistayang tur ngalahang gumin Ulune laut nyuang tegal pangonane dadi gelahne.
6Sawireh keto ramalangja gumi Israele. Orahang teken gunung-gununge, bukit-bukite, tukad-tukade muah lebake makejang, mungguing Ulun Sang Hyang Widi Wasa Sang Maha Luur ane masabda sajeroning duka kamerang-merang, sawireh parabangsane suba pada nganistayang muah nemberang bangsa Israele.
7Ulun Sang Hyang Widi Wasa Sang Maha Luur masumpah mungguing bangsa-bangsane ane di kiwa tengennyane ento lakar kanistayang.
8Nanging di gunung-gunung Israele punyan kayune lakar pada buin tumbuh don tur mabuah buat kita, kaulan Ulune Israel. Kita lakar dienggal majalan mulih.
9Ulun ane ngiangin kita, mungguing sasajaane tanah kitane lakar buin katenggala muah kasambehin bibit.
10Ulun lakar ngawanang kita sayan endah-gumendah. Kita lakar pada nongos di kota-kota, tur buin ngwangun sakancan ane laad kadepinin uug.
11Ulun lakar ngawanang manusa muah ingon-ingone sayan endah-gumendah. Gebogan kitane lakar liunan teken dugase imaluan, tur kita lakar liu ngelah pianak. Ulun lakar nglugrain kita magumana ditu, tur Ulun lakar ngawanang kita muponin gemuh landuh lebihan teken ane suba-suba. Ditu kita lakar nawang, mungguing Ulun ene Ida Sang Hyang Widi Wasa.
12Ih kaulan Ulun Israel, Ulun lakar ngamulihang kita, buat nongos buin di gumine ene. Gumine ene lakar dadi gumi gelah kitane, tur pianak-pianak kitane tusing taen buin nemu sayah gede.”
13Ida Sang Hyang Widi Wasa Sane Maha Luur ngandika sapuniki: “Saja pesan munyin anake ane ngorahang gumine ene kereng ngamah jlema muah ngrampas pianak-pianak bangsane ene.
14Nanging ngawit uli jani di gumine ene tusing enu buin ada anak ngamah jlema, ane ngrampas pianak-pianak kitane. Ulun Sang Hyang Widi Wasa Sang Maha Luur ane ngandika buka keto.
15Gumine ene tusing buin lakar madingehang panyacad parabangsane ane katiba teken ia muah tusing buin nepukin anake ane ngadesemin ia. Gumine ene tusing enu buin ngrampas pianak-pianak bangsane ene. Ulun Sang Hyang Widi Wasa Sang Maha Luur ane suba ngandika buka keto.”
Wong
16Ida Sang Hyang Widi Wasa ngandika ring tiang sapuniki:
17“Ih manusa, dugas wong Israele nongos di guminnyane, ia pada ngletehin gumine ento malantaran bikas muah laksanannyane. Ulun nganggep solahnyane ento patuh buka cemer anake luh ane nuju sebel di awak.
18Ulun nepang ia ngrasayang kawisesan pidukan Ulune, uli krana ia suba nyalanang unduk mamati-mati di gumine ento muah malantaran arca-arcane ento muah malantaran arca-arca ane suba anggona ngletehin gumine ento.
19Ulun nyisipang ia malantaran parisolah muah laksanannyane, tur Ulun nyambehang ia di sawewengkon gumi sunantarane.
20Saparan-parannyane ia ngawanang cemer parab Ulune ane suci, sawireh anake lakar pada ngucap kene: Bangsane ene katundung uli tanahnyane ane kapaicayang baan Widinnyane.
21Unduke ento ngawanang Ulun sakit ati ulihan parab Ulune ane suci, sawireh bangsa Israele ngawanang cemer parab Ulune ento saparan-parannyane.
22Wireh keto ane jani tekedangja teken wong Israele pawarah-warah Ulune Sang Hyang Widi Wasa Sang Maha Luur ane katiba teken ia kene: Unduk ane lakar laksanayang Ulun ene, tusingja ulihan kita bangsa Israel, nanging ulihan parab Ulune ane suci, ane suba letehin kita di sakancan gumine ane suba entap kita.
23Dikalan Ulune ngedengang kasucian parab Ulune ane luih teken parabangsane, nah ento parab Ulune ane cemerang kita di pantaran bangsa-bangsane ento, ditu bangsa-bangsane ento lakar nawang, mungguing Ulun ene Sang Hyang Widi Wasa. Ulun Sang Hyang Widi Wasa Sang Maha Luur ane suba ngandika buka keto. Ulun lakar mrabotang kita buat ngedengang teken bangsa-bangsane ento, mungguing Ulun ene suci.
24Ulun lakar mancut kita uli pantaran sakancan bangsa muah gumine, laut ngajak kita mulih ka gumin kitane.
25Ulun lakar nyriokin kita baan yeh ening ane nyuciang kita uli sakancan arca muah saluiring paundukan ane lenan ane suba ngletehin kita.
26Ulun lakar ngicen kita keneh muah ati ane anyar. Ulun lakar ngentungang pepineh kitane ane bengkung buka batune, laut ngicen kita pepineh ane tansah satinut.
27Ulun lakar nglinggihang roh Ulune di keneh kitane tur Ulun lakar macingak teken rohe ento, apanga kita ninutin pidabdab-pidabdab Ulune muah ngamanggehang sapatitah ane suba titahang Ulun teken kita.
28Ditu kita lakar nongos di gumi ane paicayang Ulun teken leluur kitane. Kita lakar dadi kaulan Ulune, tur Ulun lakar dadi Widin kitane.
29Ulun lakar mebasang kita uli sakancan paundukan ane ngletehin kita. Ulun lakar nguduhang gandume apanga mupu melah, apanga kita tusing buin nandang sayah gede.
30Ulun lakar ngimbuhin pamupon buah punyan woh-wohan muah pamupon tegalan kitane apanga tusing enu ada sayah ane lakar ngawanang kita nista di pantaran bangsa-bangsane.
31Kita lakar inget teken solah kitane ane jaat muah laksanan kitane ane pelih, tur kita lakar geting teken dewek kitane padidi malantaran dosa-dosa muah kadursilan kitane.
32Ih wong Israel, Ulun mapakayun apang kita nawang, mungguing Ulun nglaksanayang sakancan unduke ene, tusingja ulihan kita. Ulun mapakayun apang kita ngrasayang kimud muah kanistan ane gae kita. Ulun Sang Hyang Widi Wasa Sang Maha Luur ane suba masabda buka keto.”
33Ida Sang Hyang Widi Wasa Sane Maha Luur ngandika, sapuniki: “Dikalan Ulune mresihin kita uli sakancan dosa-dosan kitane, Ulun lakar nglugrain kita buin nongos di kota-kotan kitane tur buin ngwangun ane suba uug.
34Sakancan anake ane biasa mentas di tegalan kitane lakar nepukin ambate bet muah melakang tegale totonan, nanging Ulun lakar nglugrain kita buin ngarap tegale ento.
35Sakancan anake lakar pada ngucap kene: ‘Kenkenke unduk tanahe ene, ane suba laad dadi tegal melakang, ane jani dadi buka Taman Edene. Buina kenkenke unduk kota-kotane ene, ane suba laad uug maglaturan, laad kajarahin tur kadepinin uug, ane jani buin ka tongosin tur kabentengin?’
36Ditu bangsa-bangsane ane di kiwa tengennyane, ane enu idup lakar nawang, Ulun ene Sang Hyang Widi Wasa, ane buin ngwangun kota-kotane ane uug muah nanemin buin tegale ane nengan. Ulun Sang Hyang Widi Wasa ane suba majanji tur Ulun lakar nglaksanayang unduke ento, sawireh Ulun mapakayun buka keto.”
37Ida Sang Hyang Widi Wasa Sane Maha Luur ngandika sapuniki: “Buina Ulun lakar nglugrain wong Israele nunas pitulungan teken Ulun, tur Ulun lakar nglugrain ia endah-gumendah buka biri-birine abada.
38Kota-kotane ane jani uug lakar buin bek misi jlema, buka kota Yerusaleme tansah bek misi biri-biri ane lakar anggona aturan di nujune ada rerainan. Ditu ia lakar nawang, mungguing Ulun ene Sang Hyang Widi Wasa.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel