Alkitab Mobile SABDA
[VER] : [BAUZI]     [PL]  [PB] 
 <<  Matius 13 >> 

1Labi Yesus ame num lam vou esmozi itea valau obe laba lazi ab le nusuham.

2Laba lazi nusu modeha dam zi feà neo Aba valadam labe gi soat osiddume Aba ab li vabousuham. Labihàmu dam bisi duali Aba soat nutmamna zohàme Aho fa ihe vihitoi koena vou bu duzu afoezobe ab zisi nusuham. Labi Aba valadam dam zi lam fa valau obe laba dozeada.

3Labihazobe Yesusat im totobe tamehona ab faasi fi koadamam. “Nasi aimale. Dat utoho modemda nibe am na dem bak laba na oo neb ab le guladamam.

4Labi na dem bak laba le guladam di labe ame na oo neb totbaho gi damat lailaidam zie tomba laba ab biddaham. Labi modeha bume faobuda labe li visoi àme ab seteham. Lada lam labiha.

5Labi ame na oo neb totbaho lam ke baa bak laba ab biddaham. Labi modeha ke baa bak laba biddahada lam bak dua vab labe gi kehàm vaba ab loubedi usidaham.

6Lahana ala faasi gaimeolehe di labe et loubedehena laba belu ab aladaham. Ke baa usihi labe am omnao bak vaksa bake nom lailaiam vab labe ab belu aladaham. Lada lam labiha.

7Labi ame na oo neb totbaho lam aliho debu bak laba ab biddaham. Labi modeha na oo lamti alihosoti amediat usida. Amediat usihi labe na àm vabda labe nasi kilale. Labi kilalehe labe na àmda lam gi alihosot vi giame ab aladaham. Lada lam labiha.

8Lahana ame na oo neb totbaho lam fa bak neà bake bidda. Bak neà bake biddaha labe abo neàna usidume kilali abo oo duana ab vaedaham. Labi oo vaedaha di labe na oo neb totbaho oo seratus vaeda. Labi na oo neb totbaho enam puluh vaeda. Labi na oo neb totbaho tiga puluh vaeda. Labihada. Ame na oo neb gi koena gulahanat oo tamehona ab vaedaham. Labihada.”

9Lahame im totobe lada lam labihasu fi koadume neàdi Yesusat neo ab vi gagoham. “Um dogoi im aim bak ehena Eho etei lab vameadaha im lam mahate aime vi ozome ozobohudele,” lahame ab vi gagu esuham.

10Lahame labi vi gagu neàdi Aba vi tau meedam dam labe dam dua bak vaitesu Yesus bake le netàdi duzu vi ailo ab gagoham. “Ai oa, Oho dam dua bake im vameadam di akati modi ame im tombu Oho vameadam vaba vedi bisi im totobet fi koadàla?”

11Lahame vi ailo gagoha Yesusat fa neo ab vi vameadamam. “Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame dam amudate vastehe im lam Em Aiat Eba neha, ‘Eho ame im lam fa uba vameadume umota modi ozobohudi fi gatedase,’ lahame Eba labi gagohemu Eho im dedateli etei fa uba vameadume fi desi um ab ozobohudedamam bak. Lahana Eho dam giida abo Alam damalehe vab dam laba im vameadam di Eho gi ahit im totobet fi koadam bak.

12Neham bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlem bak lam, ‘Akatihasu modemna modela?’ lahame Eho vahokedam im nim meit iademe ozome vi ozobohudi meedamda lam Alat fa ame da laba tau modi aho duana vi ozobohudedam bak. Lahana Eho etei ame im lam vahokedam bak lam meit ame im lam iademe ozome vi ozobohudi meedam vabda lam abo aho amu koena ozobohudehe bak lam Alat fa faatoi vei seti ba ame da labe vi ozome ozobohudedam vabak.

13Neham labe Eho dam dua bake im vameadam di gi im totobet fi koadam bak. Ame dam labe iho aam bakta aa. Aim bakta ai. Lahana, ‘Iho etei aaha im nim akati modemna modela?’ Labi, ‘Iho etei aihi im nim akati modemna modela?’ laham bak lam ba fetehesu vi ozome ozobohudi meedam vab damat modem bak. Labihadam damat modem labe Eho ahit im totobet fi koadam bak.

14Ame dam duada labe labihadàmu dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham bak. ‘Alat Aho Israel dam bake neha, “Uho Ebe Eho meedam bak lam aam bakta aa. Lahana, ‘Uho etei aaha im nim akati modemna modela?’ laham bak lam ba vi ozome ozobohudedam vabak. Labi laha Em im uho aim bakta ai. Lahana, ‘Uho etei aihi im nim akati modemna modela?’ laham bak lam ba fetehesu vi ozome ozobohudedam vabak.

15Um nehaha labe labihaha bak. Um ahu tamzohobuli im Ebeda ba ozobohudem biem damat modem bak. Labi um dogoi faidi ba im Ebeda aim biem bak. Labi laha um fako faidi ba Ebe Eho meedam bak lam ba aam biem bak. Labihadam labe ahusobulehe damat modem bak. Labiham vabameam làhà um fakot gi fa Ebe Eho meedam bak vi aada. Labi um dogoit ulaihàbulehe vaba gi im Ebeda vi aida. Labi um ahulat im Ebeda vi ozobohudeda. Labiham labe ubu uho faina meedam bak lam voedume fa ahu neà bak vàmadi Eba tu vuzehedàmu Eho beolo meedam bak lam fa mu soat vausu fa vei neàdedam bak.” Lahame Alat Aho Israel dam bake ab gagoham.’ Lahame Yesayat aham di iube fet toedume esuhu im lam dam duada nibe modi fa ab imbodeham bak,” lahame Yesusat ab vameadaham.

16Labi im lada lam vameadume neàdi Yesus neo Aba vi tau meedam dam laba neo vi gago, “Lahana umota neàte. Um gi deelehe bohu vuusdam damat modem bak. Neham labe labiham bak. Fako ubuda im Ebe Eho meedam im nim um abo aada. Labi dogoi ubuda Ebe Eho vahokedam im nim um abo aida. Labihasu fetehesu vi ozome ozobohudi meedam labe um gi deelehe bohu vuusdam damat modem bak.

17Lahana im imbona nidi nim nasi ozomale. Eho bak niba li im meedaha vab diat dam ahamda Alat vameadaha im aime fa dam bake ahate vameaidaha dam zi lamti dam ahamda totbaho labe iho Alat gagoho im aime vuzehi vamdesu meedam dam totbaho lamti labihasu ubu uho etei aadam bak nim ame dam zi labe iho aalo àhàki vou faodaha vabamu gi aham di iube eloi sedda. Labi ubu uho etei aidam im nim ame dam zi labe laha ailo àhàki vou faodaha vabamu gi aham di iube eloi sedda. Ame dam labe lab vou faodaha di lam Alat ame im lam taho modi fi gatehe vab labe gi aham di iube elodume seddaha bak,” lahame Yesusat ab vameadaham.

18Labi Yesus Aba vi tau meedam dam laba aho neo vi vameada. “Um nasi aimale. Eho ame dat na oo neb gulaha bak laba vàlu totobet fi koadaha im labe am tombu uba fa ahate vameadalo mozo.

19Neha: na oo neb zie tomba biti bumet visoi àhàda lamti dam Alam im nehi aime meedam dam nimti uloho bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame meit vahokedaha Alam im lam ame dam labe iho aimta ai. Lahana ame im labe am tombu ba fetehesu vi ozome ozobohudi fi gatem vabak. Ame Bisi Faidatebo Iblis labe li ame dam labe ibi iho etei aihi im lam modi fa veioi setehe bak. Labiham bak.

20Labi na oo neb ke baa bake biteheda lamti dam Alam im nehi aime meedam dam nimti uloho bak. Dam nibe iho Alam im lam aime deeli gi àvodehat tu vuzehe. Lahana abo mahate tu vuzehe vaba gi fota tu vuzehe.

21Labi iho lab aihi im lam im ahu ad laba modesu teudi omnaoli abehamdehe vab labe naat iba vabidume geàdamna zi lam modeo, iho ame Alam im laba tu vuzehi meedàmu damat iba faki vabidamna modeo, labihasu iba meedam di labe iho Ala bake gi fota tuhu labe kehàm vaba ab mu voou seteham. Lada lam labiha.

22Labi na oo neb aliho debu bak laba biteheda lamti dam Alam im nehi aime meedam dam nimti uloho bak. Dam nibe iho Alam im deelehat aime ve àdesda. Lahana ba bak niba esdam di gi, ‘Iba modi neàdemna modem vabna ozomo?’ lahame bisi àvodi azi ozoda. Labi laha im nazoh dualelo àhàki neo azi vi ozome meeda. Labihadam damat modem labe ibi iho amu Alam im aime vaha bak lam gi fa iho ozome meedam im lamti valiheme ab vàhàdeme seteham bak. Abo na oo neb usime bu vali amdehe vaba gi alihosot ot giaiame alai setem bak lamti uloho bak. Labiha labe Alam im lam ba ab vi ozome modem bieham bak. Lada lam labiha.

23Labi na oo neb bak neà bake biti usihida lamti dam Alam im nehi aime meedam damti uloho bak. Dam nibe iho Alam im aim di abo gi ahu teudi ule neàt abo va. Abo vaha labe iho iademe ozome ozobohudi meeda. Labi damat ame Alam im lam lab aime ozobohudi meedam di labe gi veimdi veimdida. Neha: dam totbaho abo bisi duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho abo duana seratus vaedaha bak lamti uloho bak. Labi dam totbaho gi fota duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho fota duana enam puluh vaedaha bak lamti uloho bak. Labi dam totbaho gi koena ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho gi koena tiga puluh vaedaha bak lamti uloho bak,” lahame Yesusat Aba vi tau meedam dam laba ame im tombu lam ab vameadaham.

24Labi Yesus ame iheba nusu dam bake vahokedam lahasuhu di labe aho ame valau obe laba dozeadaha dam zi laba im totobe nidi nim neo nehame vi fi koada. “Alat Ahamo Boehàdateboli Am damalehe dam laba vuusu im vahokedam di Aho ba diamut Dam Bake Uloodume Vi Aime Ozobohudi Neàdi Fime Fahedam Digat feàda labe meedam im lamti fa dat nidi nibe aho utoho abadate dat gagu olu gandum oo neàna guladaha bak lamti ulohote.

25Neha: Ame da nibe aho utoho abada dam gagome le gandum oo neàna gulame esu fa aibuli num bake li ab beilame ab iddamam. Labi beilame iddam di labe dat utoho deda laba fakemoholeda labe aibut aa li iloho oo vou le dat naeda labe gandum oo gulaha bak laba aa vi tau gulame esmozi ab itaham.

26Labi ba gandum loubedi usidume kilali oo vaedume modeha gi iloho lamti ab usdume kilaleham.

27Labihàmu ame na meedam dam labe iho ame gandum dee laba le aaha bak lam fa iba na gagu meedamda laba fa ab li gagoham. ‘Aia, om gi gandum oo neàna iba lu iho gulahana taia? Ne, akati iho le aaha ilohoti usidume kilalehela?’

28Lahahat dat naeda labe gago, ‘Vabà! Gi eba fakemoholeheda labe aa li vi tau gulaha bak.’ Lahahat am na meedam dam labe fa gago, ‘Làhà oho iba gagome fa le ame iloho vaome voedào?’

29Lahahat dat gandum deda labet fa gago, ‘Vabà! Om iloho lam vaom di gi gandumti vaom bak.

30Gi labihasu ame iloho lamti gandum lamti amait behàsu kilali fa amdi modeme vahem di eho ame gandum modeme vahedam dam laba eho nehi gagom bak. “Uho amu nasi iloho fi kbodume afoezobe vaheme dombuli vua vahudale. Labi ame gandum neo modeme am oota vame na gihoemda vahedam num laba vahedale,” ’ lahame eho labi gago tame,” lahame Yesusat im totobe lada lam ab fi koadaham.

31Labi Alat Yesus bake gagu vimteme Aho Boehàdateboli dam bake deeli vame Am damali vuusu im vahokedam bak lam abo meit Aba tu vuzehi Am damalem bake vi taui vi tauidume dualem bak lam, “Akatihasu modem labe dam dualedàla?” laham bak lam damat ozobohudem bake Yesusat ame dam duada zi laba im totobe meida neo nehame ab vi fi koadamam. “Meit Ebe Eho vahokedam im tu vuzehi meedàmu Eho deeli vame Em damali vuusu im vahokedam bak lam gi dat nibe aho ut oo keobena rica oo vàmtea buà lam vou le am utoho laba dedesu esum bakti uloho bak.

32Ame ut oo keobena vàmtea buà lam iho ozom di keobeta keobet. Lahana meit am utoho laba dedesu esu faobe le aam di na àmna totbaho gi bak adba laba buaedam meot. Lahana ame ut oo keobe lam kilali utsoti uloholi bume faobuda zi labe ut aaso laba li nusualadume ila moadam meo bak.”

33Lahame ame im totobe lada lam fi koadume neàdi Yesusat gi meit Alat aba vuusu im vahokedam bak laba uledi meedamda laba meit vi aame fa vizedume dualedam bak lam vi ozome ame dam zi laba neo im totobe nidi nim vi vameada. Aho neha, “Alat Ahamo Boehàdateboli dam bake deeli vame Am damali vuusu im vahokedam bak lam gi nam nibe im nehasu meedam bakti ulohona modem bak. Nam nibe na ti fauti ulohona tepung ve afoezobe neo na ulasi fi kidemna keobena ragi lam laha laba vi tau esu valihedume seti vou faodameilahit deilemahi fi kidem bak lamti uloho bak. Dam Alat fa vahi vuusu im vahokedam dam amu debu koe bak lam fa dualem bak lamti ame na fi kidemna labe na ti fauti ulohoda laba modi vizi deilemahi fi kidi feà bak fum bak lamti uloho bak,” lahame ab vahokedaham.

34Yesusat dam dua bak laba im vahokedam di lam aho ba im totobet fi koadaha vaba alia vahokedam vabak. Abo gi im totobet fi koadume vahokedam bak tadehe bak.

35Yesus Aho ame dam dua bak laba labihasu vahokedam labet modi dat ahamda Alat vameadaha im aime fa dam bake ahate vameaidahada meida labe Alat aba vameadahana lam aho nehi fet toeme esuhu im nim Yesusat ab modi imbodeham bak. “Eho ame dam laba im vameadam di gi im totobet fi koada tame. Abo aham di iube Eho na ahebu modehe vab di iube Ehemo vastehena etei di nibe vou fuhuna Eho ame dam laba gi im totobet fi koada tame.” Lahame fet toeme esuhu im lam Yesusat Aba Aho etei lab meedaha bak labet modi ab imbodeham bak.

36Labi ame im zi lam Yesusat fi koadume neàdi aho amu zihi ihe lam fa vou zitu usi ame dam duada zi lam vou esmozi aho amu futoi laha num laba fa li ab oleham. Labi Aba vi tau meedam dam lam laha vi tau vahi oeda. Oedume neàdi Yesus bake ab gagoham. “Ai oa, Oho amu gandumti ilohoti bak vàmtea laba usihi bak lam dam duada zi laba fi koadaha im lam iba ame im tombu ahate vameadale.”

37Lahahat Yesusat fa ab vameadamam. “Lo, làhà nasi aimale. Ame gandum oo neàna gulahada lam Abo Asum Ahoba Iubet Bak Niba Li Dateleheda Em ame Da am bak.

38Labi ame utoho lam gi dam bakda ahebu azihi bak am. Labi ame gandum oo neàna lam dam gi etei Eba tu vuzehi vahi im Ebeda meedume Alam damali Aho faasi vuusu im vahokedalo modem dam am bak. Lahana ame iloho lam gi Iblisim damali aho vuusu im abada gagome meedam dam am bak.

39Labi dat utoho deda laba fakemoholeheda labe aibut aa li iloho oo neb vou le dat naeda labe amu gandum oo neb gulaha bak laba aa vi tau gulame esmozi itahada lam Iblis am. Labi ame gandum fa amdi modeme vahem di lam gi Alat ba diamut Dam Bake Uloodume Vi Aime Ozobohudi Neàdi Fime Fahedam Digat fusi meedam di am bak. Labi ame gandumti ilohoti fi kbodam dam lam gi Alat Am im gagu vou usem dam am bak.

40Neham bak. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fusi meedam di gi ame utoho deda labe aho iloho ateme vaheme vua vahudam bak lamti ulohona mode tame.

41Neham bak. Em Abo Asum Ahoba Iubet Bak Niba Li Dateleheda niba Alat ba diamut Eba gagu Eho im dedateli fa ot vai Am damalehe dam laba vuusu im vahokedam di lam Eho Em im gagu vou usem dam bake gagome dam Eho vuusdam dam niba li ootedume modi fa faina meedam dam lamti labi dam bisi faina meedam meo dam debu lamti labihasu fi me vame vahe vahedalo modem bak.

42Labi vahe vahedume neàdi ame dam zi lam fa vua elum sutem gikina laba voeda tame. Labi ame bak laba voedàmu ame dam labe kikezi geàdam labe ahu faidi meb dae feàna faasi meeda tame.

43Lahana Alat Ahamo ozo, ‘Dam nim Ebe Eho gagoho im vuzehi vamdesu meedam dam am tame,’ lahame Aho vadaha dam lam ba diamut Aho vuusu im vahokedam bak gàhà bak laba Aho ame dam laba ala digadda labe fauhaedam bakti ulohona modi feà damali im ee vousai vou baeda tame. Labiham bake um dogoi im aim bak ehena mahate aime vi ozobohudele,” lahame ab vameadaham.

44Labi Yesus ame dam duada zi laba neo im totobe meida nim neo nehame vi vameada. “Meit neha, ‘Alat eba deeli vame Am damali eba vuusu im vahokedam bak lam bisi eho modem im am bak. Ba akati eho im amomoi ozoe?’ lahame Alam damaleheda labe labihasu gagodamda lamti fa Eho etei neo vouholo modemda nimti uloho bak. Neha: Da meida nibe aho mei utoho laba le na meedameam aaha na soa maehena meit vastehena aho vi aame am ahu gelevai fa vasti esu fa am num bake li ab la ozoi le ozoidamam. ‘Eho akati modi na feàna nim taho và? Làhà em nazoh nim ahebu ozahit gelevai meia ot loidume fa doi vadume dualehezobe bak dedate le lu bak lam eho fa vase,’ lahame labi vi ozome deelehat vàhàdi ame baket ab meedaham. Na soa maehena vahemu am nazoh gelevai setehe bak laba ba vi ozoho vabak. Gi na feàna lam ab ve neàdeham bak.”

45Lahame ame im totobe lada lam fi koadume neàdi Yesusat gi ame bak lam vi ozome neàdi ame dam zi laba im totobe nidi nim neo vi vameada. Aho neha, “Meit neha, ‘Alat eba deeli vame Am damali eba vuusu im vahokedam bak lam bisi eho modem im am bak. Ba akati eho im amomoi ozoe?’ lahame Alam damaleheda labe labihasu gagodamda lamti fa Eho etei neo vouholo modemda nimti uloho bak. Neha: Ke alihi voena abo na doi duana vamna ee gagom mutiara laham ke vadam bos labe aba aho modem bakti ulohote. Ame bos lam la nabizi le nabizi lahadam di lam abo mutiara doi feàna vamda laba nabida. Labi le nabidume modeha ame na ab aaham. Labi aame ahu gelevai fa am num bake ab leham. Num bake fa li ab la ozoi le ozoidamam. ‘Eho akati modi ame na lam taho và? Làhà em nazoh nim ahebu ozahit gelevai meia ot loidume fa doi vadume dualehezobe ame mutiara dedate le lu ame na lam eho fa vase,’ lahame labi vi ozome neàdi ame baket ab le meedaham. Mutiara doi feàna vamda vahemu am nazoh gelevai setehe bak laba ba vi ozom vabak. Gi na feàna lam ab ve neàdeham bak,” lahame im totobe lam ab fi koadaham.

46(13:45)

47Labi im totobe lada lam fi koadume neàdi Yesusat im totobe meida neo nehame vi vameada. “Ba diamut Alat Ahamo Boehàdateboli Am damalehe dam laba Aho vuusu im vahokedam di lam gi nehasu modem bakti ulohona meeda tame. Neha: Damat bohe dek itea vou bu ziamoi valo esu neàdi fa ab vou kea ledamam. Vou kea ledameam bohe ab vadamam. Labi bohe dek asimbuli fa nohula vou zitu aaha bohe mei bohe meime vaha bak ab aaham. Labihàmu ame dam labe ibi ihimo modi baleàhà bak lam ab faasi meedamam. Iho nusualadume bohe neàda vihilame boloseh vaheda. Labi bohe àm vabda fa veimome voeda. Labihada.

48(13:47)

49Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di Aho gi ame baket neo mode tame. Aho Am im vou usem dam gagome bak niba olu dam ab fahedamam bak. ‘Dam nim Ebe Eho gagoho im vuzehi vamdesu meedam dam am tame,’ lahame Aho ule neàt vadaha dam lam Aho fi me vahe. Labi dam bisi faina meedam dam lada lam fi hasi vua eludamna sutem gikina bohu laba le ab voedamam. Labi ame bak laba voedàmu ame dam labe kikezi geàdam labe ahu faidi meb dae feàna faasi meeda tame,” lahame im totobe lam ab fi koadaham.

50(13:49)

51Lahame im lada lam labi vameadume neàdi Yesusat Aba vi tau meedam dam laba vi ailo ab gagoham. “Eho etei lab vameadaha im totobe zi lam um ozome ozobohudeheo?” Lahame gagoha Aba vi tau meedam dam labe fa gago, “Lo, im vi ozome ozobohudehe bak.”

52Làhàmu Aho fa neo gago, “Làhà Eho etei lab vameadaha im lam uho ame im labe am tombu lam um ozobohudehe bak lam abo neàte. Uho Alat Vameadaha Im Toedahana zi lam meit uba vahokedume um ozobohudehe bak. Labi laha Eho etei Alat Ahamo Boehàdateboli dam bake deeli vame Am damali vuusu im vahokedam bak lam, ‘Akatihasu modemna modela?’ laham bak lam um biem bake Eho uba vahokehena um laha ozobohudehe bak. Eho labihasu vahokedaha labe um im meida vàmtea ba vekehe vaba abo ozobohudehe labe fa dam im vekehe bak ehe dam laba uhumo fa vahokedam neà bak. Abo Alat Vameadaha Im Toedahana zi lamti Ebe Eho etei ba vahokeheda nimti fa vahi ame dam laba vahokedam neà bak. Abo dat na duada labe am soa maehe nazoh vahedam num oula labe vihilame vou futom di nazoh amu vahada lamti ba vahada lamti vame vou futodaha bak lamti ulohona meeda tame,” lahame ab vahokedume esuham.

53Labi Yesusat ame im totobe zi lam fi koadume neàdi bak lam vou esmozi fa neo Am budualehe num debu Nazaret laba fa ab laham. Labi fa le aidam di labe Aho Am Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ame dam laba Alat vameadaha im lam vahokeida. Labi ame im lam vahokeidume modeha damat ame im lam aidàmu ab àvodeham. Àvodi dam ihimo ot gagoidam labe ab tozodamam. “Aa làhà! Uho ozom, Da nim amat Aba modi Am ozobohudi fi gatei im dedateli iba li vahokedà? Aba amat am im vizi teudi na damat ihimo modem biem im feàna lam Aho meedà?

54(13:53)

55Ne, Da nim gi dat ut vame nazohaedamda labe am adat mode taia? Ne, labi laha Am oi gi Mariat mode taia? Labi Am vahadam zi abo Yakobus ame. Yusuf ame. Simon ame. Yudas ame. Labihasu ame dam zoho gi neam taia?

56Ne, labi laha Am nà zi gi neam taia? Ba amat Aba vizi Am fa feà dateli fa na damat ihimo modem biem im feàna labihasu meedàla?”

57Lahame Yesusat lab li vahokedaha im lam damat aim mu ab tozodamam. Labi mu tozodàmu Yesus fa ame dam laba ab gagoham. “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am vou budualehe bak modeo, am namti datati modeo, aho fa le vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ab gagoham.

58Yesus Am budualehe bak abo Nazaret laba azim dam labe Aba tu vuzehi meedaha vaba mu voohemu Aho ba ame bak laba na damat ihimo modem biem im feàna mahate duana meedaha vabak. Gi fota meeda.



 <<  Matius 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel