Alkitab Mobile SABDA
[VER] : [BAUZI]     [PL]  [PB] 
 <<  Markus 8 >> 

1Labi ba di iube dam zi fai neo Yesus bake li vadokbueda. Ame dam zi fai labe na àmna vabalehemu Yesusat Aho Aba vi tau meedam dam laba gagome li dozeadume neàdi ab gagoham. “Dam duada zi nim iba tau iddume usi làteladi im na àmna folehe labe idoali feà bak fuhu bak lam aam faimu Em faobekeho. Em ba dam nim na àhà vabna ideia olum kaio. Dam zoho bak bohulana lehe bak. Laham bake zie bohu nim fa ladameam gi doni bake ahadou faa susume lam bili la biti le bitiam zohàme ba labihasu olum maleho.”

2(8:1)

3(8:1)

4Lahame labi gagoha Aba vi tau meedam dam labe fa ab vi gagoham. “Ne lahana dam vaba alim bak nim iho ake le na àmna aame vame fa vou li dam bake lodume uloholi àdàla?”

5Lahahat Yesusat fa vi ailo gago, “Rotibu ubuda amamo vou lehela?” Lahahat Am dam labe fa ab vi gagoham. “Im rotibu tujuh ehete. Labi bohe koena ame. Gi labihasu vou lehe bak.”

6Laham bak lam aime neàdi Yesusat fa ame dam duada zi laba gagome bak laba ab nusualadaham. Labi nusualadume neàdi Aho ame rotibu tujuh lam vuusu Ala bake, “Neàte,” lahame tom gagu neàdi fahedume Aba vi tau meedam dam laba lodume iho fa vame ame dam duada zi laba lodume ulohole.

7Labi neo Am dam labe iho vou lehe bohe koena lam laha Aho neo ve Ala bake, “Neàte,” lahame tom gagu neàdi neo ame baket ab modeham.

8Labihadume uloholehezobe ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh ab tujuhleham. Labi modeha ame boloseh lam ahebu ab bektoham.

9Dam etei lab nusualadume na àhà dam lam gi dam aabota dem di abo empat ribu fuhu bak. Ba lahiti datati tau dem kaio. Labi na lam àdume neàdi Yesusat ame dam duada zi lam gagome fa ibi bake ab oudaham.

10Labi dam lada lam oudume neàdi Yesus Aba vi tau meedam damti iheba ziddume bak ee gagom Dalmanuta laham bak laba ab ladamam.

11Labi Dalmanuta bak laba lafusi zitu azibe modeha Farisi dam totbaho labe vazisi, “Iho im nehasu Yesus bake modi aase,” lahame fet ozome Yesus bake netàdi ootedam labe ab gagodamam. “ ‘Om abo Alat Gagu Fihasi Vimteme Oluhu Dat Boehàda am tame,’ lahamda nasi na damat ihimo modem biem im feàna fet modemale. Labi im aame ozobohudese,” lahame ab gagodamam.

12Lahaha bak lam Yesusat vi aime ahu faidi bisteat ab omeham. Omeeme gago, “Um etei dam bada nim gi bisi faina meedam bak tadem damat moz. Um gi labihadam damat modem labe vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame Eba gagodam damat modem bak. Lahana imbote. Em ba uledi ame bak lam uba etei di nibe fet modem moho bak.”

13Lahame labi gagu neàdi ame Farisi dam lam vou esmozi Aba vi tau meedam damti ihe neo ziddume Itea Galilea labe ab biodamam.

14Labi biou ladameam Aba vi tau meedam dam labe iho it ozoha, im roti vou lehe vab damat modem bak ab it ozobohudeham.

15Labi vou biou ladam di labe Yesusat ozo, “Soo! Ame Farisi dam lamti Herodes Antipas lamti ibi iho ozom bak lam fa neo Eba vi tau meedam dam laba vizi vàhàdemna ozomo?” laham bak vi ozome vahokelo ahit Aba vi tau meedam dam laba im totobet ab fi koadamam. “Um iademe vou faovoehebeat meedale. Farisi dam lamti Boehàda Herodesti ibi iho vou lehe na abo na vizi fi kidemna ragi lam ba a vamule.”

16Lahame labi gagoha Aba vi tau meedam dam labe aime ihimo ab ot gagoidamam. “Uho ozom, iho roti vou lehe vabake Yesus iba labi gagohe?”

17Lahame ame dam labe ihimo lab ot gagoidam im lam Yesusat ahamo ozobohudi ab vi gagoham. “Um akati Eho etei im totobet lab fi koadaha bak lam uho vabili vedi Eho uho roti vou lehe vabak laba ozome uba gagoho tiba vabi vi ozodàla? Làhà um amu Ebe Eho meedam bak um vi ozome ozobohudehe vab labe fi gatehe vabali mode? Um akati bisi im ozom bak zohobuli mode?

18Làhà damat ihimo modem biem im feàna lam Eho modemna um fako ehena na aam bi mode? Um dogoi ehena Eho gagoho im uho aim bi mode? Akati um ahu zohobuli mahate Eba tu vuzehi meedam vab damat mode? Um gi ozobohuna ahit fa vabilehe damali mode?

19Eho amu dam lima ribu zi fai laba rotibu auohole faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?” Lahahat Aba vi tau meedam dam labe fa gago, “Boloseh dua belas vahehe bak.”

20Lahahat Yesusat neo vi gago, “Labi laha Eho amu dam empat ribu zi fai laba laha rotibu tujuh faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?” Lahahat Am dam labe fa neha, “Boloseh tujuh vahehe bak.”

21Lahame gagoha Yesusat neo vi gago, “Làhà Eho uba lab gagoho im lam um ozom biem lahasuhe?” lahame ab gagu esuham.

22Labi neo ladam labe fa num debu Betsaida laba ab lafuham. Lafusi modeha dam aheda labe fa dat fako faida na aam biemda lam anekehà vuusu Yesus bake ab vou leham. “Yesusat fà ulasi neàdese,” lahame ab vou li tauledamam.

23Labihàmu Yesusat ame dat fako faida lam neo anekehà vuusu num debu bak vou esmozi fa bàhàgo bak iuba ab vou laham. Labi vou le vou duzu neàdi Yesusat ame da labe am fakode laba keha ab doham. Keha dou neàdi Yesusat Am anekehà ahim ame da so laba odosu gago, “Om na aam neàdeheo?”

24Lahahat ame da labe am ohu vousai nabime gago, “Lo, em dam alihi vi aadalo. Lahana gi utsoti ulohona goom bakta aadalo.”

25Labi gagohemu Yesusat neo Am anekehà ahim fa ame da labe am fakode laba neo odosdume ab iteham. Labi modeha am fako keesi na aam bak ab neàdeham. Labi na ahebu ab aam tombali neàdeham.

26Labi neàdehemu Yesusat ab vi gagoham. “Om num bake fa nasi lale. Lahana om ba num debu bake vi oli om neàdehe bak lam a vameadamule. Gi labohoti om num bake lale,” lahame ab gagu mali oluham.

27Labi Yesus Aba vi tau meedam dam lamti iho Betsaida vou esmozi neo ladume num debu Kaisarea Filipi laba netàdesome modeha gi aba zoho laba modealaha num debu bak laba goda. Godam di labe Yesusat Aba vi tau meedam dam laba vi ailo ab gagoham. “Dam duada labe, ‘Em amat modela?’ lahame vameadaha bak uho akatihasu aidàla?”

28Lahame labi gagu aiha Aba vi tau meedam dam labe fa ab vi gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mozo,’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi dam zohot neo vedi neha, ‘Om gi dat ahamda Alat vameadaha im aime fa dam bake ahate vameaidahada meida amu eloho dàt fat ahedi lehe moio?’ lahame vameada. Dam zi labe Oba labihasu ozome otesi otesidam bak.”

29Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla?” Lahahat Petrusat fa ab vi gagoham. “Aia, Om abo Alat Gagu Fihasi Vimteme Oluhu Dat Boehàda am bak.”

30Lahame Petrusat labihasu gagohemu Yesusat Aho Aba vi tau meedam dam laba ab gagoham. “Petrusat etei lab gagu tombalehe bak lam, ‘Em abo Alat Gagu Fihasi Vimteme Oluhu Dat Boehàda am tame,’ lahaha bak lam uho meia a le fi demule,” lahame ab gagu mali esuham.

31Ame digat labe Yesusat damat Aba ba modelo modem im lam Aba vi tau meedam dam laba alimeat fet ab vameadamam. Aho neha, “Em Ai Alat fet gagu esuhemu Yahudi damat ibi iho tu vuzehi meedam im vuusdam tohe dam zi labe vahi Em abo Asum Ahoba Iubet Bak Niba Li Dateleheda niba mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame.”

32Lahame Yesusat gi damat Aba ba meedam im ahate fi desi vameadume ab tombaleham. Lahame labi vameadume modeha Petrusat Yesus vi vuu ubahi duzu gago, “Boehàda, ba a labi gagomule,” lahame gi ostame ab vi vabededamam.

33Lahame labi vabededume modeha Yesusat fa it vaktesi Aba vi tau meedam dam laba aasu Petrus bake ab gagoham. “Om gi Iblisit gagom im Eba gagohemu om fa Em ohuse duzule. Oho etei Eba lab gagoho bak lam gi dam bak damat ozom bak Eba gagoho bak. Ba Em Ai Alat Aba Aho fet ozoho bak gagoho vabak,” lahame Petrus bake im ab vahokeham.

34Labi Petrus bake gagu neàdi Yesusat fa Aba vi tau meedam dam lamti labi dam mei zi lamti gagome fa vazisi neo ab vi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam ba it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak.

35Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi Aba Aho Meedaha Im Neàna lam eho dam bake vou vameatedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am bak.

36Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak.

37Iho Alati ahili ahena aabo laba vuusdam bak lam iho ba anat vi lu và? Ba na ot loiam biem bak.

38Etei bak damat bisi faina meedume Eba mu tozodam di nibe meit neha, ‘Em abo Yesus bake tu vuzehi Aho vahokedaha im aime meedamda modem kaio,’ lahame ladi vei iedi Eba momeam làhà ba diamut Em Abo Asum Ahoba Iubet Bak Niba Li Dateleheda nibe Em Aiat Am na fauha meona fako iedemna ogatei modealaha bak lam fa Eba modi vizi feà Dateli Aho Am im gagu vou usem dam zi lamti ba neo amediat bak niba nom ilu meedam di lam Eho laha ame da laba neha, ‘Om Eba tu vuzehi Em damalehe vabda am tame,’ lahame mu voo tame,” lahame ab vameadaham.



 <<  Markus 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel