Alkitab Mobile SABDA
[VER] : [BAUZI]     [PL]  [PB] 
 <<  Yohanes 1 >> 

1Bak nim na ahebu meedaha vab diat dat ee, “Alat Vameadaha Im,” lahamda Yesus lam ehe bak. Labi ame di labe, “Alat Vameadaha Im,” lahamda lam Alati ahili modesda. Labi, “Alat Vameadaha Im,” lahamda lam gi Ala am bak.

2Abo aham di iube ame Da lam gi Alati ahili esdam bak.

3Asum ahoba modealahana zi lamti labi bak adba niba modealahana zi nimti ahebu meedaha di lam Alat ame Da lamti ahili meedaha bak. Ba na vàmtea buà nim ame Da vab diat modeheda vabak.

4Im dam bakda ahedem bake debu ame Da am. Labi im aibu bake aidam dam nim iba modi Fauhaedamda ame Da am.

5Labi iba modi Fauhaedamda labe Aho dam aibu bak laba aidamna ozomom dam laba fi ddam labe modi fa fauhaedam bohu modesdam bak. Ba ame aibu bak lam bisi feà labe ame fi ddam bak lam ba mali sutem vabak. Gi bohu modesdam bak.

6Neha taia? Dat, “Yohanes,” lahamda laba, “Nehame modele,” lahame Alat ab gagu oluham.

7Ame Fauhaedamda lam damat biem bake, “Dam ahebu Yohanesat li vameadam im lam fà aime ame Fauhaedamdate tu vuzehese,” lahame ab gagu oluham bak.

8Ame da Yohanes lam ba ame Fauhaedamda modem vabak. Gi ame Fauhaedamda labet Aho meedaha im lam, “Yohanesat fa im dedateli vou vameatedale,” lahame Alat gagu oluhuda am am bak.

9Ame Da Fauhaedamda bisi imboda vàmtea labe, “ ‘Ala akatihasu meedam Alat modela?’ laham im imbona lam dam bakda ahebu fà ozobohudi fi gatedase,” lahame Aho dam bakdate ab li tàham.

10Alat ame Da modi Amti ahili asum ahoba modealahana zi lamti bak niba modealahana zi nimti alimeat modehenàme Aho dat aliholi bak niba li modeha dam bak damat, “Am amat modela?” laham bak damat ba vi ozobohudem bie.

11Abo gi Am Yahudi damat esdam bake li modeha Am damat Am mu vooho bak.

12Lahana meit Aba uledi tu vuzehi meedam dam lamota Aho naedat gagu ame dam laba modi fat ab Alam damalemam bak.

13Etei lab vameadaha im lam Alam damalehe bak lam ba ibi iho bak damat nam ve ozo, “Data faase,” lahame im nam modeme data faam bake gagoho vabak. Gi Alat Ahamo ozome ame dam laba meedume Am damalehe bak.

14Ame Da, “Alat Vameadaha Im,” lahamda lam fa dat aliholi iba dam bakdate tau vazisi aidaha bak. Abo Am Ai Alat Aho modehe Adat vàmtea lam oluhu labe imota Am feà bak aaha bak. Abo Aho iba ozahit deeli im neà bak meedam bak lam iho laha aaha bak. Labi, “Ala akatihasu meedam Alat modela?” laham im imbona ahebu lam im biem bake iba modi fi gateheda Am am bak. Ba im meida vastehe vabak.

15Ame Da lam damat biem bake Yohanes Mei Vuu Valo Baptisleiamda laba Alat modi ozobohudehe labe aho dam bake vameadaha bak. Aho dam bake vameadam di gi dae buduana nehi vameada. “Eho amu uba neha, ‘Dat em ohuse ba vulemda lam amu di ium gi Alati ahili aida. Em baat. Labihàmu emti ame Da lamti ozom di bisi feàda Am am bak,’ lahame eho uba lab vameadahada lam, ‘Alat Vameadaha Im,’ lahamda Am am bak.”

16Aho bisi iba ozahit deeli im neà bak meedam labe neà bak duana iba neo vi modidam bak.

17Nehaha bak. Alat aham di iube im Israel dam bake neha, “Nehame modem neàte. A nehame meedamule,” lahame gagu fi hasi esuhu Im Feàna zi lam gi Musa bake gagu aho fa vou vamea usdume iba vou fuhu im am bak. Lahana, “Ala akatihasu meedam Alat modela?” laham im imbona lamti Aho iba ozahit deeli im neà bak meedam bak lamti labihasu Yesus abo Alat Gagu Fihasi Vimteme Oluhu Dat Boehàda labe iba modi fi gatehe im am bak.

18Alam alihi ba meit aaha vabak. Gi Aho modehe Adat vàmteata abo Aba ahida Aho bisi deeleheda labe Ahamo, “Am Ai Ala akatihasu meedam Alat modela?” laham bak im biem bake iba modi im fi gateheda Am am bak.

19“Alat Gagu Fihasi Vimteme Oluhu Dat Boehàda lam amat mode?” laham bak lam Yohanes Mei Vuu Valo Baptisleiamda labe aho ozobohudi vameadaha bak gi neha: Yohanesat bak aotba baa bohu dam vaba alim bak laba dam bake im vahokedume dam vuu valo baptisleidam digat meida labe kota Yerusalem laba azihi Yahudi dam busaoda labe iho damat Ala bake lomna ve vua vahudam toheda zi totbaho lamti ame dam laba vi tau meedam dam abo Lewi dam totbaho lamti labihasu gagome Yohanes bake ab oluham. “Om ana dàt mode?” laham bak vi ailo ame dam laba gagu ab oluham.

20Labi ame dam labe Yohanes bake lafusi neha, “Alat Gagu Fihasi Vimteme Oluhu Dat Boehàda lam om ame Da modeo,” laham bak vi ailo gagoho di lam aho ba vastehe vaba abo ahate fa im nehasu vameadaha bak. “Alat Gagu Fihasi Vimteme Oluhu Dat Boehàda lam em ame Da modem kaio,” lahame ahate fa gagoho bak.

21Lahame labi gagoha ame dam labe neo vi ailo gago, “Làhà om ame Da modem vabameam làhà om ana dàt mode? Làhà om gi Alat Vameadaha Im Aime Fa Dam Bake Ahate Vameaidahada abo Alat aham di iube ahena asum ahoba vou tom iluhuda Eliat fa bak niba nom ilu mode moio?” Lahahat Yohanesat fa gago, “Vabà! Em ba ame da Eliat modem vabak.” Lahahat ame dam labe neo vi ailo gago, “Làhà om gi dat Alat vameadaha im aime fa dam bake ahate vameaidahada meida abo Alat neha, ‘Ba olu tame,’ lahame fet gagu esuhu Dàt mode moio?” Lahahat Yohanesat fa gago, “Vabà! Em ame Da modem kaio.”

22Gi labihadume ot gagoi ot gagoidaha vabamu ame dam etei leheda zi labe fa ab gagoham. “Làhà im bie. Om ana dàt mode? Oho iba fa gagom im ohomo ozome im imbo bak lam iba taho gagu iho ame im aime neàdi fa dam iba gagu oluhu dam laba fa le vameadase.”

23Lahame labi gagohemu Yohanesat gi dat ahamda Alat vameadaha im aime fa dam bake ahate vameaidahada Yesaya labe aho fet toeme esuhu im vi ozome fa ame dam laba ab gagoham. “Uho nasi Yesayat fet toeme esuhu im nim ozomale. ‘Dat bak aotba baa bohu dam vaba alim bak laba azi dam aba valadamda zi laba dae buduana nehi vameada. “Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese.” ’ Lahame Yesayat lab fet toeme esuhu im lam imbodi eho ame da nibe ab meedamam bak.”

24Lahame labi vameadume modeha Farisi dam labe ibi iho gagu Yohanes bake oudaha dam totbaho labe neo Yohanes bake vi ailo ab gagoham. “Oho amu neha, ‘Om ba Alat Gagu Fihasi Vimteme Oluhu Dat Boehàda modem kaio.’ Labi neo, ‘Eliat modem kaio.’ Labi neo, ‘Alat Vameadaha Im Aime Fa Dam Bake Ahate Vameaidahada Alat ba Olulo Modemda modem kaio,’ lahadam dàt ba oba amat gagu om im dedateli im Yahudi dam oho vuu valo baptisleidàla?”

25(1:24)

26Lahahat Yohanesat fa gago, “Dam giida labe iho meia aame ozo, ‘Da lam am ahu faina meedam bak lam aho voedume fa ahu neà bak meedalo vàmadi fa Ala bake tu vuzehe?’ laham bak aame ozobohudem bake eho dam bake gi vaota baptisleidam bak. Lahana em ohuse ba vi vulelo modemda lam gi etei uba tau vahi esdamda ame Da ehe bak um biem bak. Ame Da feàda labe Am naba dusumna lo tadehena lam eho feà vab dàt lo ziamom di em ba uloho vabak,” lahame ab gagoham.

27(1:26)

28Etei lab vameadaha im lam gi Yordan Soabo ala zizem totbaho Betania abo Yohanes Mei Vuu Valo Baptisleiamda labe aho dam vuu valo baptisleidam bak laba meedaha imot modem bak.

29Labihadume izi dihasi Yohanesat gut aaha Yesus aba ledam bak alimeat ab gut aame dam duada zi laba ab gagoham. “Iumeee! Uho nasi aamale. Alat modi ahumdi esuhu Domba Adatea iubet ab ledamam tame. Abo iho dam bakda ahebu iho faina meedàmu Alat iba beolo modem bak lam, ‘Fà faamome vei neàdedase,’ laham bak vi ozome ba ot vai eloi iba soat vausu fa vei neàdedalo modemda etei iubet ab ledamam tame.

30Eho amu uba neha, ‘Amu di ium Dat em ohuse ba vulemda nimti Alati ahili aida. Em baat. Labihàmu emti ame Da lamti ozom di bisi feàda Am am bak,’ lahame eho amu uba lab vameadaha Da lam iubet ab ledamam tame.

31Israel dam Soat Vausu Fa Vei Neàdemda lam, ‘Yesus ame Da modeo,’ laham bak lam ememe laha amu di iube ame bak lam biem bak. Lahana eho niba lehe bak debu gi nehaha bak. Alat Israel dam soat vausu fa vei neàdedam bak laba vi ozome Aho Gagu Fihasi Vimteme Olulo Modemda Boehàda lam Israel damat biem bake, ‘Eho ame dam laba modi fi gatedase,’ lahame eho ahit li dam bake vuu valo baptisleidam bak,” lahame aho dam bake labihasu ab vameadaham.

32Labi vameadume neàdi Yohanesat neo aho aaha im neo nehi vi vameada. “Israel dam Soat Vausu Fa Vei Neàdemda lam, ‘Yesus ame Da modeo,’ laham bak lam eho amu di ium bie. Lahana Alat amu eba neha, ‘Damat iho faina meedaha bak voou fa vei neàdedaha dam lam oho vuu valo baptisleidale. Labi oho ame bak lam vuusu meedam labe aameam Em Aha Nutabe Neàna labe fa bume doleti ulohonali nom oaedume Dat meida laba nom vou usi vizi abehamdemeam làhà ame Da am tame. Ame Da labe Aho ba damat Aba tu vuzehi meedam dam lam Em Aha Nutabe Neàna lam Aho ame dam laba modi vizi teudedamda Am am bak,’ lahame eba labi gagohemu eho ame bak lam ab aaham. Eho Yesus vuu valo baptislehe di labe tom aaha asum ahoba iube Alam Aha Nutabe Neàna labe fa bume doleti ulohonali nom vou oaedume Yesus bake nom vou usi vizi teudi abehamdehe bak lam em alimeat ab aame ozoham bak. ‘Aa làhà! Israel dam Soat Vausu Fa Vei Neàdemda ame?’ laham bak em ab aame ozobohudeham bak.

33(1:32)

34Làhàmu eho aame ozobohudehe im lam dam bake gi nehi vameadam bak. ‘Ame Da Yesus lam Alam Adat am bak,’ lahame ozobohudi gagodam bak,” lahame Yohanesat ab vameadaham.

35Labihadume izi dihasi Yohanesat neo aba aho meia vuu valo baptisleidam bak laba esda. Aba Aho vahokedam im ozobohudelo vi tau meedam dam behàsu laha ame bak laba tau aida.

36Labi aidume modeha Yesus lebohotelo modemu Yohanesat ab gagoham. “Um nasi aama. Alat modi ahumdi esuhu Domba Adatea iube iba ab lebohotelo modemam tame.”

37Lahaha bak lam ame da Yohanes bake vi tau meedam dam behàsu labe aime fa Yesus bake vule ab tau ladamam.

38Labi modeha Yesusat fa it vaktesi aaha ame dam behàsu Aba vuedàmu vi ailo ab gagoham. “Um Eba ana vi vuedà?” Lahahat ame dam behàsu labe fa gago, “Ai Rabi oa, Oho aidam bak akete?” (Ibrani dae Rabi gagom di gi, “Guru,” lahame gagom bak.)

39Lahahat Yesusat fa gago, “Uhumo Eba vuli aameam Ebe Eho aidam bak um ab aamam bak.” Làhàmu Yesus bake vuli Aho aidam bak aame neàdi modeha dimatali jam empat fuhemu gi ame digat zoho lam Yesus bake tau aidume vou disi aibule.

40Ame da Yohanes bake vi tau meedam dam behàsu labe iho fa Yesus bake vi tau meedaha debu gi neha: Yohanes Mei Vuu Valo Baptisleiamda labe aho amu Yesusat modelo modem im lam fet vameadamna im ahim nibe aime Yesus bake ab vi tau meedamam bak. Im ahim Aba vi tau meedamda meida ee gagom Andreas laham bak. Im ahim nibe iho Yesus bake vi tau meedam di labe Andreasta kehàm vaba am dubu Simon Petrus bake fa le ab nabidamam. Le nabidume aame neàdi ab gagoham. “Simon oa, Mesias abo iho amu di iube vou faodamda imota ame Da tàho. Eba nasi tau le aale.” (Ibrani dae, “Mesias,” laham di gi Yunani dae, “Kristus,” laham bak. Abo, “Alat Gagu Fihasi Vimteme Oluhu Dat Boehàda,” laham bak.)

41(1:40)

42Lahame labi gagu neàdi Andreasat Simon neo ve Yesus bake ab vou laham. “Simon ana dàt mode?” laham bak Yesus bake gagu ozobohudelo ahit Yesus bake ab vou laham. Vou le lafusi modeha Yesusat Simon bake gut aasumtedi ab gagoham. “Om Yonam adat ee gagom Simon laham bak. Lahana etei di nibe faasi om ee meida, ‘Kefas,’ lahame ee gàhàda neo vi talulo modem bak,” lahame Yesusat ab gagoham. (Etei ee, “Kefas,” lahame taluhu bak lam fa Yunani dae gagom di gi, “Petrus,” laham bak.)

43Labi izi dihasi Yesusat Aho ozo, “Em Galilea bak laba lase,” lahame fet vi ozome esuhemu ladam labe Filipus bake tàhi gago, “Om Ebe Eho vahokedam im ozobohudelo vi tau meedam datelele,” lahame labi gagohemu ame baket ab modeham.

44Ame da Filipus lam gi Andreasti Petrusti ibi iho azihi bak num debu Betsaida laba vahi azihi dàt moz.

45Laham dàt aho fa neo amti vou alemda ee gagom Natanael lahamdate tàhi im vameadalo ab laham. Le tàhi ab gagoham. “Alat Gagu Fihasi Vimteme Oluhu Dat Boehàda lam imota aaho. Abo dat ahamda Musat aho dam bake gagu fi hasi esuhu Im Feàna Toedahana zi lamti labi dam aham di iube Alat vameadaha im aime fa dam bake ahate vameaidaha dam labe ibi iho fet toedume esuhu im lamti nehasu toe, ‘Alat Gagu Fihasi Vimteme Olulo Modem Dat Boehàda olu tame,’ lahame amu fet gagoho Da lam imota aaho. Ame Da lam Am ee, ‘Yesus,’ lahamda num debu Nazaret laba vou budualehe dàt moz. Abo Yusufam adat moz.”

46Lahame labi gagu modeha Natanael gi tozome fa vi ailo gago, “Nazaret! Elaidam vab baket modem bak. Ba bak labet im feàna meedamda lehe bakvat im aihe?” Lahahat Filipus fa ab gagoham. “Lahamnàme gi ozahit ohomo eba tau vule aamale,” lahame gagohemu aho usai Filipus bake ab tau vulaham.

47Vuladam labe lafusi Yesusat Aho gut aaha Natanael Aba ledam bak aahemu, “Natanael akatihasu meedam dàt modela?” laham bak vi ozome ab gut vameadamam. “Etei ledamda nim ba meia vagem vab dàt modem bak. Labihàmu am abo Yahudi dàt am tai ahobada Israel labe vou faat leheda meida abo Israel da aabo am bak.”

48Lahaha bak lam Natanael aho aime vi ailo ab gagoham. “Ne, Om adi bake em aame ozobohudi labi gagodà?” Lahahat Yesusat fa gago, “Natanael oa, Filipus amu oba le gagoho vab di iube om ut araso adba nutabe bak laba nusdam bak lam Em ozobohudehe bak.”

49Lahahat Natanael àvodi ab gagoham. “Làhà, Ai Guru oa, Om abo Alam Adat am tame. Abo im Israel dam vuusu im vahokedam Boehàda iho vou faodamda Om am bak.”

50Lahame labi gagoha Yesusat fa gago, “Oo làhà! Om gi Eho om ut araso adba nutabe bak laba nusdam bak lam Ehemo ozobohudi oba gagoho bak om aihi labe oho Eba tu vuzehi labi gagoho taia? Lahana om ba aam di im bisi feàda abo oho etei aaha im nidi nim vafozi bisi feàda om ba aa tame.

51Lo, lamota imbot. Lahana Eho etei uba neo gagolo modem im imboda nim laha aimale. Ame im feàna lam uho ba aamna gi neha: ‘Em abo Alat Gagu Fihasi Vimteme Oluhu Dat Boehàda am tame,’ laham bak um biem bake um ba asum ahoba iube fatahivai bumatalehena ozomomna labet Alat Am im gagu vou usem dam labe Eba abo Asum Ahoba Iubet Bak Niba Li Dateleheda niba nom ilu fat tom iluiam bak uho aa tame,” lahame Yesusat labi fet ab gagu esuham.



 <<  Yohanes 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel