1Im Ai Ala Aho deeli, “Am damalese,” lahame gagu fihasi esuhu dam abo Alat labaha bohu vuusu vabiedahit Yesus Kristus ba lehezobe Aba gut lolo modem dam oa, eho Yudasat sunit nim toedume uba oluho. Yesus Kristus labe Aho im gagu modiamda meida nibe abo eho Yakobus ba meida nibe sunit nim toedume uba oluho.
2Eho uba ozome neha, “Im Ai Alat Aho uba aam faimu ozahit deeli faobekesi im neà bak uba modi esuidase. Labi uba modi um ahu faheme figoaitom vaba gi vabademsuse,” lahame eho Ala bake labihasu tom gagodam bak.
3Eho deeli meedam dam oa, “Umti imti Alat iba vazisi soat vausu fa vei neàdedaha bak lam gi ulohona modeho,” lahambak lam, “Eho uba sunit toedume oluse,” lahame eho modelo àhàkedam bak lam modesome modeha modem bi fa im amomoi uba fa toedume oluho. “Yesusat Aba Aho meedaha Im Neàna abo imbona lam iho tu vuzehehe bak lam fa meit odosi veioi veimdem vabake uho mahate keàtet odosi meedale,” laham bak uba vi ootedalo ozome sunit nim toedume oluhu bak. Ame im imbona lam amu Yesusti labi Aho Am im gagu esmozi laiam dam lamti iba Alam damalehe dam niba modi ozobohudi fi gatehe bak. Labihàmu ame im imbona lam, “Meit ba a veimdi setemule,” lahame eho uba im labihasu vameadalo sunit nim toedume oluhu bak.
4Eho etei uba neha, “Mahate keàtet odosi meedale,” lahame lab gagoho bak lam gi neham bak ozome uba labi gagoho bak. Dam giida labe ahobat neàdi uba le tau azi im git vahokedam dam ehe bak. Ame dam labe Ala bake ozom vaba vedi uba im nehasu vahokeda. “Alat iba ozahit deeli im neà bak modi esuidam Alat modem labe Aho iba soat vausu fa vei neàdehemu ibi iho im ahu adat bisi faina modelo àhàki ozomna lam abo fi loholi ostame la modi le modidam bak lam fa meedam neàte. Alat ba iba fakem kaio,” lahame labihasu git vahokedam dam uba laba ehe bak. Labi laha im Boehàda Yesus Kristus lam abo ibi iho neha, “Iba vuusu im vahokedam neàte,” lahame ee vousahada vàmtea lam ame dam labe iho ba tu vuzehem vaba gi mu tozome moho damat modem bak. Ame dam lam Alat amu neha, “Beom neà bak,” lahame amu fet gagu esuhu bak lam meit Alat Vameadaha Im Toedahana laba toehe bak ehe bak.
5Eho etei uba vameadalo modem im nim um ba biem vabak. Um amu gi ahebu ozobohudehe bak. Lahana eho ozahit, “Bisi faina meedam dam lam Alat beoda tame,” laham bak lam um fa vabiemna zohàme eho ozahit uba neo modi vi ozobohudelo ame im nim uba vameadalo mozo. Nehaha bak. Aham di iube Mesir damat fa Yahudi dam simtedi geàdàmu im Boehàda Ala labe nom aaha faobekesi Aho Musa bake gagu olu ame Yahudi dam zi ahebu fa soat vausu ab vi vihitoham bak. Lahana amu soat vausu vi vihitoi vou ladahana vedi dam zoho labe ba ibi iho amu Ala bake tu vuzehehe bak lam fa mu voedàmu Alat fa vi beodume gi bak aotba baa bohu dam vaba alim bak laba vou voe ladaha bak.
6Im lada lam labiha. Labi uho im nidi nim laha vi ozomale. Aham di iube asum ahoba iuba Alat Am im gagu vou usemda zi laba, “Im dedamali im nehasu meedale,” lahame ahala faheme lu vuusiada. Lahana ame dam zi labe Alat iba ahamte gagu fi hasi esuhu im lamota meedaha vaba vazidazi fa mu im amomoi vi meedàmu ibi iho azi na im meedam bak lam mu fa ab vou esmoham. Labi ame di labe im Boehàda Alat ame dam zi laba modi nom ilu aibu bak feà laba voou bes botehà niz labe giame gi labaha simtedi bohu vuusdam bak. Abo gi labaha bohu vuusdahit ba diamut damat amu meedaha im Alat vi ozome ozobohudi fahedam digat feàda fusi Aho dam lam gagu beodam bake vou faodam bak.
7Im lada lam labiha. Labi uho im nidi nim laha vi ozomale. Num debu Sodomti Gomorati labi num debu netàda totbaho lamti labihasu azim dam zi labe ibi iho amu meedaha im laba uho laha vi ozomale. Nehaha bak. Ame dam zi labe gi eho etei lab vameadaha Alam im gagu vou usemda zi lamti uloholi faina meedaha bak. Ame dam zi labe iho Alat uledehe bak meedaha vaba vedi ihimo gi ostame fi loholi ot vai ot vaidam bak ahebu la modi le modida. Labihàmu Alat faki ame num debu laba esuhu dam zi ahebu im num zi lamti vuat beodume ab seddaham bak. Alat ame Sodom dam lamti Gomora dam lamti beodaha bak lam gi Aho ba diamut dam faina meedaha dam ahebu laba vua gi labaha elum sutem gikina bohu labe ba beodam bake ahit amu nasi iba dam badate fet vouhoho bak.
8Uho ozom, gi amu di lamota damat ame faina lamohona meedà? Vabà! Etei ba di nim ame im giomimna vahokedam guru lam etei uba li tau azihi dam labe laha gi ame baket meedam bak. Ame dam labe iho ulehe im laba neha, “Imbote,” lahame tu meedam labe gi im nehasu meeda. Filoholi ostame la modi le modidam bak labet modi im it vàhàdeme faididam bak ame. Labi laha Alat neha, “Aba Aho ozoho im lamota meedale,” laham im lam gi mu tozodam bak ame. Labi iho aam biemna asum ahoba iuba azimna feà zi laba feàtàdam bak ame. Labihasu meedam damat modem bak.
9Dam lada lam labihadamnàme ba Alat Am im gagu vou usemda zi labe im boehàda bisi feàda Mikael labe aho ba Iblis bake vàlu feàtàdaha vabak. Nehaha bak. Aham di iube dat ahamda Alat vameadaha im aime fa dam bake ahate vameaidahada Musa lam am eloho di labe am koeiso lam Mikaelti Iblisti, “Amat vàla?” lahame ototo vuusuiaha di lam Mikael ba ahamo ozome keàtedi Iblis bake vàlu feàtàdaha vabak. Aho gi neha, “Boehàda Alat ahamo fà oba faki beose,” lahame labi gagoho bak.
10Lahana ame im giomimna vahokedam guru labe iho vedi iho aam biemna asum ahoba iuba azimna feà zi laba abo im ozome ozobohudem biemna feàna zi laba vedi feàtàda. Abo gi na bake esumna zi labe ibi iho iademe ozome ozobohudi im meedam vaba vedi ihimo ibi iho modi baleàhà baket meedam bak lamti ulohona meedam damat modem bak. Ame guru labe vedi ihimo it ozom vabna modelo àhàki meedam labe ihimo it vàhàdem bak vabili gi ostame meeda.
11Aiee! Gi modeme vàhàdeme setem dam lam akati modela? Abo aham di iube Kain labe faina modelo am ahu gukeme modehe bak lamti ulohona meedam damat modem bak. Abo dat ahamda Alat vameadaha im aime fa dam bake ahate vameaidahada Bileam labe aho git modelo modem bak lam ozobohuna ahit, “Doi dualese,” lahame faina meedaha bakti uloholi ame guru zi labe iho ba it ozom vaba ahu bedi, “Im doi dualese,” lahame im vàmtea laba tombuli vahokedam damat modem bak. Labi laha aham di iube Alat gagu vahada Musa lam Korahat neha, “Ame da lam ba iba Israel dam a vuusdamule,” lahame mu dam zoho bake odoadume dae dou vahehe bak lamti uloholi ame guru zi labe iho Alat gagu fi hasi esuhu im mu voedam damat modem bak. Labihasu meedam damat modem labe Alat laha ba beodume sedda tame.
12Labi laha ubu uho im Boehàda Yesus iba deelehat meedaha bake vi ozome vazisi na àlo modem di ame im giomimna vahokedam guru labe iho ahobat neàdi umti deelehat vazisi na àdam meo bak. Labi na àlo modem di lam dam labe uba modi fa vàhàdem bak um vabili uho vahi meedam bak. Abo ke gat vao ad iuba boaedam bak lam kapal labe vabili belu vàhàdem bakti ulohona uho vabili meedam bak. Labi ame guru labe ibi iho lab neàdem bakta ozome àhàlahit geàmu neo vi àdume meedam bak lam ba it ladi iedem vabak. Ba ibi iho vuusdam dam laba ba iademe vou aasu vabiedam vab damat modem bak. Abo di neà faasi bak aotbali modesum di ulo labe abaalem vaba vageme nutabet vou le setem ulo lamti ulohona meedam gurut modem labe uba neha, “Uba im imbona vahokeda tame,” lahame vameadam damat ame bak meedaha vaba gi voedume seddam damat modem bak. Abo na amdi àdam bak fusi ame di labe le aaha ame ut ooalem vabak lamti uloholi ame guru zi labe ibi iho guruledaha bak lam gi ahobat neàdi guruledume ba ame baket meedaha vab damat modem bak. Abo ame ut labe am omnaoti valoi ala faam bake ahoba laba voou aotbali alai setem bakti uloholi meedam damat modem bak. Ame guru zi labe iho amu Ala bake tu vuzehi meedam bak lam vedi fa mu Alati vaitesuhu labe ba ibi iho amu guruledaha bak lam fa meedam vabili vooho damat modem bak.
13Ame dam labe laha gi im ahu ad labe faina meedalo àhàki ozodamna lam fa gi labaha ahate tombali bohu vuusdam labe ba it malem vab damat modem bak. Abo itea feàna vao foadam labe naubeti kehanabuati vou futodume auobe laba modealadume modesdam labe àbozna aadam bak lamti ulohona meedam damat modem bak. Abo gi falo aba amu modesu doudam bak laba modesuhu vabna fa veimdi bak mei bake le modesdam labe meit vabili git ladam bakti ulohona meedam damat modem bak. Ame guru labe vedi im fauha neà bak meeda tiba vabili meedam labe ibi iho vahokedam dam laba modi zie fàusi ub olem bak meedam damat modem bak. Ame guru lam Alat mu aibu feà bak laba voou seti gi labaha bohu vuusdam bak laba amu gi modi ahumdi esuhu bak.
14Ame im giomimna vahokedam guru lam etei uba tau vahi azihi dam lam Alat ba diamut beodam bak lam dat ahamda Henok labe amu aham di iube nasi fet ozobohudi vameadume esuhu im ehe bak. Ame da Henok lam ozom di gi nehaha bak. Adamat aba aho vou faat ledam debu gagu vàmteade. Labi neo vou ded ladume Henok aba aho vou faat ledam debu fusi gagu tujuhle. Labihaha bak. Ame da Henok labe aham di iube im nehasu fet vameadume esuhu bak. “Uba aimale. Eho fet aaha im neha. Im Boehàda labe Am im gagu vou usem dam zi abo dem biemna zi abo bisi neàbodeheda vou lelo modem bak eho fet aaha bak.
15Im dam bakda ahebu iho bak niba ahedi meedaha im lam, ‘Iho git meedào? Git meedam vabao?’ laham bak ozome ozobohudi dam vamda vada. Labi beodamda beoda. Abo Ala bake ozom vaba vedi gi ibi iho ozoho baket meedam dam laba abo ahu odohabuli meedam dam laba vàlu neha, ‘Um abo faina meedaho,’ lahame vàlu gagodume beodalo modem bak. Abo Am im aime uledem mu im Boehàda bake odosi neha, ‘Tufea. Giomim modem Boehàdat modem bak,’ lahame labi feàtàdam bake beodalo modem bak.” Laham im lam Henok aham di iube labi fet vameadume esuhu bak.
16Labi ame giomimna vahokedam guru lam laha gi meia ostame faki voe voedam bak tadem damat modem bak. Labi meia la feàtài le feàtàida. Abo im ahu adat modelo àhàki ozomna lam, “Iho gi nehi faina meedase. Iho gi nehi faina meedase,” lahame ozom di gi ame baket la modi le modida. Labi laha ibi iho meedaha im it ozome daetbada. Labi laha ame dam labe, “Dam amomoi fà iba na lodase,” lahame ahit keobaeda. Labihasu meedam damat modem bak.
17Um eho deeli meedam dam oa, ame guru labe labihasu meedamta meeda. Lahana um a labihamule. Uho gi im Boehàda Yesus Kristus labe Am im gagu esmozi laiam dam labe iho amu nasi ozobohudi uba fet vameadume esuhu im laba uho mahate vi ozodale.
18Ame dam labe amu uba neha, “Ba diamut digat folelo modem di labe dam Ala bake uledem vaba gi ibi iho ozoho bak abo im ahu adat faina modelo àhàki ozodam im lam bisi uledi meedam labe fa Yesus bake tu vuzehi meedam dam niba iba tozoda tame,” lahame amu labihasu fet vameadume esuhu im lam ab imbodi damat ab meedamam bak.
19Ame im giomimna vou li vahokedam guru zi labe ibi iho meedaha im gi nehame meedam bak. Uba modi um ahu fahedume daet ot beidume fa faheme fàsi meeda. Labi ame dam labe laha Alam Aha Nutabe Neàna labe iba vizi vuusdam vab labe gi ibi iho amu meedume baleàhà im lam abo im ahu adat modelo àhàki ozomna labet modi uledi meedam tadi meeda. Labihasu meedam damat modem bak.
20Eho deeli meedam dam oa, ame im giomimna vou li vahokedam guru zi labe ibi iho meedam bak laba uho ba a vi tau meedamule. Um gi fa im nehasu meedale. Alat amu uba modi um ozobohudi fi gatehe im imbona lam uho amu keàtet tu vuzehi meedam labe gi labaha bohu vuusu im meida aime vi mode. Im meida aime neo vi mode. Gi labihadume bohu vuusdume teudi neàbodedale. Abo damat num molo modem di amu nasi bao zisime neàde. Labi neo vagimso vaheme teude. Gi labihadume neàbodi teudem bakti ulohona meedale. Labi Alam Aha Nutabe Neàna labe uba vizi vuusdam labet modi uho Ala bake mahate tom gagodale.
21Labi Alat uba gi labaha deeli bohu vuusdam bak laba vi ozome gi Aba Aho ozome deelem im lamota uho meedale. Labi laha im Boehàda Yesus Kristus labe Aho meia faobekesi im neà bak meedam Dàt modem labe Aho ba li iba modi gi Amti vahi ahe neàna bohu vuusdam bak laba tu vou faodale.
22Uho laha im nehasu meedale. Dam Kristus bake tu vuzehemta vuzehe. Lahana fa bedi fa moeo, lahame ozodam dam laba uho ozahit im neà bak iademe vi vahokedale.
23Labi dam totbaho amu Kristus bake tu vuzehehena vedi fa vaktesi git ladam dam lam uho fa vi vuu vou li neàdele. Abo vua laba bitelo modemna ozomom bakti ulohona modi vi si vi vihitoi vei neàdele. Labi dam totbaho labe bisi im ahu adat modelo àhàki ozomna uledi meedam labe bisi faina meedam dam lam uho laha ame dam laba ozahit deeli im neà bak tau meedale. Lahana ame dam labe ibi iho faina meedam bak uba fa vizemna zohàme gi iademe meedale. Abo ame dam labe ibi iho faina meedaha bak labet modi im sueti vàhàdeme aotbali dum mom bak lamti ulohona uho ame dam labe ibi iho faina meedam bak laba faki moudale.
24Ala abo feàte. Imo Aba vou baedase. Am abo iho git ladam di iba vou aasu vabiedume fa neàdedamda Am am bak. Aho im vou le Aho avaesdam feà bak laba duzum di lam Aho iba vàlu gagom biemna abo gi neàbodi ahumdehena im ahu deelehat vou le duzum bak. Am gi iba labaha bohu vou aasu vabiedume neàbodi vou duzum meo Alat modem bak.
25Ibi iho vou baedam Ala gi vàmtea bak. Labi im Boehàda Yesus Kristus labe Aho iho faina meedam bake gohali ot vai eloho labe Alat iba soat vausu fa vei neàdehe bak. Labi Am laha abo bisi feà labe iba modi iho ozome àvodi, “Am abo feàte,” lahame meedam Ala Am am bak. Labi Am laha na ahebu im Aho modem meo bak tadi meedam Alat modem bak. Labi na im iho bak niba meedamna ahebu im deda Ala naeda Am am bak. Labihasu meedam bak lam gi amu aham di iube na modehe vab di iube faasi meedam labe etei nim meedam lahasu vou meedume ba neo diamut gi ame baket meedam Alat modem bak. Im labihasu meedam Ala laba imo Am ee vousai, “Am abo feàte,” lahame im ahu adat iedi vou baedase. Labihadase. Àhàm
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel