1Ga ip, Wini Uwa Sanbagiri aa jes destabilirim, ane tane imna. Ai bunarsus ims nesiktababili. Ai anfentowaiyan, jengga angtane seyafter taterisi Uwa Sanbagirmana bunarsusferaiserem aa jei ne towaswebilirim, ane ga aane onsobili, jei ims ne nesiktababili. Ai seyafter imsa nesiktababili, aam temawer aamei abaner taterisi bunarsusfer aaiserem Uwa Sanbagirmanaiserem nemsa taabili ginggitfer, ane aam temawer taterisi bunarsusfer aaiserem Uwa Sanbagirmanaiserem aamei abaner nesa taabili jamer abak-abaksus. Ai angtane sanbaka jemata ajei tebabilirim, ai surta aaiserem ga ip tulisulmini.
2(1:1)
3Ai sembayanga as gwebana Uwa Sanbagirfe, Uwa nemna, ane Yesus Kristusfe, Tane Jelemana, jega Jei nawersamer waakena Jelemanaiserem nebe nes ga sege golmini jeber-jeber, ane Jei nawersamer nesikteleiserem nebe nes ga sege golmini, ane Jei ini nemna nes sege gwebaipmini waakenfer ga nesege folbamini. Uwa Sanbagiri jeiserem gase eyebili, ane nei seyafter jeiserem ga nesa domola, aam temawer nei taterisi bunarsusfer aaiserem Uwa Sanbagirmanaiserem nemsa taabili, ane nei nena nesa nesiksonanna.
4Ini amna saaser-saasersus, aam temawer ai enggam sara, tane imna afwenefener jei taterisi bunarsusfer aaiserem Uwa Sanbagirmanaiserem jei mes ne tikwebitini. Jei enggam naawena, waakenaiserem jetefener ne eyebili, Uwa Sanbagiri Jei nei nes gemer balbabilirim nei nejesa eyebife.
5Jega jem temawer Wini ai ajes nesikulurum, ai taterisi aaiserem ga ip tulisulbili: nei seyafter nena ga jam nesa nesiksonanna. Taterisi aaiserem ai namwer ibe isa ajes tulisulminirim, aamei fwater gwanan imsama sarbili. Taterisi aaiserem Uwa Sanbagiri nebe nes mesam bilipmini nei nejesa eyebife. Taterisi aaiserem Jei nebe gwanan nes mesam bilipmini, nei negalaba towaiwenaram taterisi Jemna jam taayibefe.
6Afa nei seyafter nena jam nesa nesiksonannaram, nei ga taterisi Uwa Sanbagirmana aa jes bilirim nei ga jes nesa eyebili, nei taterisi jeiserem ga waakenfer nesa sarbili, ane ga nesa tikwebitini. Ane taterisi Uwa Sanbagirmana aa jes balbabilirim nei nejesa eyebife, aamei taterisi jeiserem imsama sarbili, gwanan ijewera towaiwenantam taterisi Jemna jam taayibefe. Taterisi jeiserem ga enggam: aamei seyafter enggam isa gwena, aamei ina jam isa nesiksonanna jeber-jeber.
7Aamei ina jam isa nesiksonanna, aam temawer angtane afaf-afafaiserem ga anesus ogiri seyafter gemerserem gemer ge wofebili. Angtane afaf-afafa jeiserem jei angtane ga enggam ne towas-towastababili, "Yesus Jei Jam foroyan ogiri aaiserem jebe, angtane tifinibener galserem." Angtane game aa jei towas-towastababilirim, jeiba angtane afaf-afafaiserem, ane jei ga Ginanggwana Kristusmana.
8Ga jem temawer, aamei ina ga waakenfer isa gaaramisnenne, jega aamei enggam ijama gweyan angtane afaf-afafaiserem jes galserem. Afa aamei enggam jam isa gwenaram jei galserem, gam jega aamei fwaina waakena Uwa Sanbagirminiwer ijama taabiyen. Aamei awelna uskambar imsa gwebili, jega enggalf fwaina Uwa Sanbagiri ibe aa jes menetulmisinirim, aamei fwaina jeiserem gam isa taabili. Jega jem temawer aamei ina ga waakenfer isa gaaramisnenne, jega fwaina ip jeiserem seyafter gam isa taabili.
9Afa angtane taterisi Kristusmana bunarsusferaiserem jei jam gam mirultefalaram, ane jei taterisi jelemana ga gam tambawulu, taterisi Kristusmanyanaiserem, ane afa jei taterisi jeiserem jam gam nasipminirim angtanefe, afa ga gam jes gemerserem, angtane jes galserem jei Uwa Sanbagirfar daamfennaber jam ge gweyan. Jengga angtane taterisi Kristusmana bunarsusferaiserem aa jei nasipminirim jeber-jeber, ane jam mirulyon, angtane jes galserem jei Uwa Sanbagirfar daamfennaber gam gangge gwena, ane Jelem Tane mese.
10Ga jem temawer, angtane afa jam gam fortyaram imnibe, ane taterisi Kristusmana bunarsusfer aaiserem jei jam towas-towastababiyen, jengga jei taterisi nafsiserem ga jes gam towas-towasulu, angtane jes galserem jei ijama balyan im jenap jei jam kautefe. Safnant angtane jes galserem ijama tebayan, jega angtane nafsi gam sege towaswebili enggame, angtane jes galserem aamei ijama batobayan, angtane jeiserem jei taterisi Kristusmana jam towas-towastababiyen.
11Afa aamei angtane jeiserem jam isa tebabilirim waakenfer, gam jega aamei angtane jeiserem imsa batobaabili angtanes afaf-afaftababife. Angtane taterisi Kristusmana jam ne towastababiyeneye, ane angtane jei aa jei ne tebabilirim, jei seyafter kapkaiserem ga jes gangge eyebili.
12Taterisi amniwer safe anesus ai ibe isa ajes towasulmife, jengga ai surta aaiserem jebe seyafter ajam tulisulyon. Ini amna ga as enggam folbana, ai aner as gwina imnibe, ane ibar seyafter ga nesne nasowena, jega enggalf ini nemna seyafter uskambar saaser-saaserfersus nes ga sege folbamini.
13Somoltanna imnaiserem tantantane jemnaiserem, jeime Uwa Sanbagiri aa jes destabaabilirim, jei is enggam ne balbabili, "Kelek, waakenfer sa gwe!"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel