1Ane nei ga fomfoma? Sa sarbistaabon angtane unggwanfersus Uwa Sanbagiri gwanan aa jei ne tebalam, jei nem sene gerebaabili. Gam jega au, nei galgala daran-darnaiserem ganma fasawol, ane etam-etama kapka nei jeber-jeber nes je daran-darantababuwenaram jes mese. Au, nei nele Uwa Sanbagiri nep nes jes destabaaminirim jetefener ga nesa onsoba.
2Afa nei nele jeiserem jam nesa onsobanaram, nwena nemna ga Yesusminip fener sege folbamifele. Jeiba Angtanesam nele nep aa jei sartaminirim, ane Jei ga nes jei se aftabifele jamer fwesabo. Jei ga gununt, "Ai tamtamtala As domola, jamer As tere ti salibibe, safe angtane nensaiserem enggam ge gubili je seferabara." Jei Jam irfweyan angtane Jei aa jei ne daktanswefe ti salibibe jemniwer, aam temawer Jei mes towaswena enggame, Jei ini galap se saaserswebana. Jepga Jei ga terewer ga aa irwenant, ane namwer ga aa nwini Uwa Sanbagirem taasfolawer.
3Yesus sa sarbastaabon, ane etam-etama kakalaiserem angtane kapkaiserem Jep ga jes ne eyeibene, jengga Jei kanaufer fina. Jei sa sarbastaabon, jega aamei ijama ereyen, ane ijama tikweyan Jei jam onsobalawer.
4Jengga aamei enggam ima gunu, "Etam-etama kapkaiserem ajama mirtebif." Jengga jes gamserem jem temawer, aamei gemerje ijama domolyan enggame bubwana unggwandusa, ane aawisi jes mese.
5Aamke imsa dirinswebili taterisi Uwa Sanbagiri is jes nasipminirim enggalfe ini ilemana ijama kanautababife? Jei aamei is enggam balbabili tane Jelemana gamserem: "O tane Amna, Tuhan Jei ibe tamtamtala is galap gulbanaram enggalfe, aamei igam tikwef etam-etamawer, waakenfer se sarsi! Ane ini imna is jam jenbayan Jei aamei enggam is jep balaram, aamei etam-etama imes eyebili.
6Jeiserem sa eyebi, aam temawer Tuhan Jei tamtamtala se golmini angtane seyafter aa jes nesiktababilirim jebe. Ane angtane Jei enggam aa jes balbabilirim tane Jemna gamserem, jei etam-etama kapkaiserem aa galap ne eyebilirim, Jei ga aa balbabili ane tamtamtala jep ga aa golmini."
7Kanaufer sa fya, tamtamtala jam ijeba domolaram Uwa Sanbagirminiwer. Enggam sa sarbistaabon, neiba tane Uwa Sanbagirmanam. Jei tamtamtala nebe nes golmini, jega nei etam-etama nejama eyebiyen. Aamei ke ijama towasweyan enggame uwa jei tamtamtala gam gulbana tane jelemanaiserem jebe, jega enggalf jei etam-etamawer gam tikwef.
8Afa aamei tamtamtala ijama domolyanaye enggame tane seyafter Uwa Sanbagirmana nafsiserem jes gamserem, gam jega aamei tane Uwa Sanbagirmanyan. Aamei ga maaryen tane gamserem, tane jetyena gamserem.
9Sa gu ilem inibe uwa ilemanaiserem jem temawer ogirip aaiserem aa jei naawenaram. Nei etam-etama kapka negalaba eyebilirim, jei nei nes mes ne tamtamtababili. Ane nei ga jes nesa erebaabili, ane nei ga nesa eyebili jei aa gam ge gubilirim. Afa nei uwa nemna ogirip aaiserem jam nesa erebaabilirim, gam jega nei ga jamersus nesa erebene Uwa nemna taman waaken-girip aaiserem. Jei tamtamtala nep jam ne jep golminirim, nei ga jes nesa onsobana, ane waakenfer ga nesa gwena.
10Uwa nemnaiserem jei mese tamtamtala nes mes ne golmini jelem inip aa gane mwangbisinirim, nei basantantana galapserem. Jengga Uwa Sanbagiri Jei nes mes tamtamtababili enggalfe nes gam batobaabif, jega nei negama waakenswef Jei waakena gamserem.
11Ane nei tamtamtala negalaba domolaram, ini nemna jei nes jam ge saasersobamiyen, nei siginiserem nemsa enola. Jengga nei galap sa gunu enggame, "Jeiserem ba waakenam." Nei seyafter tamtamtala nejeya domolaram, nei waakenfer nesa gwena, ane ini nemna nes samfer sege folbamini.
12Tafam mese tof imna is jei ge werensweipminirim jam sa kanautababi, ane ga isa onsobana nele Uwa Sanbagirmanaiserem!
13Nele aarekaiserem jesa eyeba, jega angtane tof muli-mulni baabetyenaiserem Uwa Sanbagiri jam onsobafe, jei jam jenyan, jengga jei jam sene waakentana.
14Waakenfer isa gwena angtane seyafter gemerserem jebar, ane sa gwe tane Uwa Sanbagirmana gamserem! Afa aamei ijama gweyanaye Tuhan aa gam gunurum, gam jega aamei Tuhan ijama damtayan.
15In ina ga jam isa geraamisnenne, jega angtane afa fas jam tikweyan waakena Uwa Sanbagirminiwer jam taabife, waakena Uwa Sanbagiri nep nes Jei golminirim. Gamjon in ina ga jam isa geraamisnenne, jega angtane afa fas tini syelabara gamserem aa je gam kokosaram, ane jemna syelaiserem jei ga angtane unggwanfer jem ga gam kabwaktababili.
16Ane in ina ga jam isa geraamisnenne, jega angtane afa maaryena jam gwebiyen, ane jei jam tikweyan Uwa Sanbagirs onsobafe. Ijama eyebiyen Esau, tane ayansusu jei gamserem jei aa gam eyebilim. Jei baabeta jelemanaiserem aa jes taabilim uwa jelemanaiserem jemniwer, jei ga aa jualwul enggalfe tumilgal touya jem gam domolfe.
17Ane aamei imsa towaswena enggam, jes galapserem jei baabeta jeiserem gamjon taabif, jengga jeta jelemanaiserem jei baif gwebana. Ane jei safe uskambar aa bal ane ga aa syel, jengga jei nele jei jam damtayan.
18Aameiba angtane Kristensam, ane taarena aamei ijeba fornantam, taarena jeiserem enggalyan taarena aamei igala gama damtanaram, ane entenerem, aam temawer aamei angtane Israelmana gamserem gamyan. Jei Taarena Sinaiminip ge forobiyel, ane jes galapserem iris, ane tokwagir, gwin kakat, ane jem deigir mese jep ga aa ge etamwebil.
19Ane angtane jep aaiserem jei trompet tisana ga aane sarbabil, ane taterisi Uwa Sanbagirmana jes mese. Ane jei taterisi jeiserem aa galap ne sarbilim, jei ga uskambar ga aane bal enggame Jei ga aa tikwel jam nasowelabe, aam temawer jei uskambarsus ge erebil.
20Jei jam ge erebil taterisi enggam aa jei gulum, "Afa angtane, afa domba tane, afa nenes-nensa taarena aaiserem jep aa jei jutenaram, jepga jei ga sege terbili, tonem ne munbobili jamer futu."
21Seyafter jep aa jei ge etamwebilim, jei angtane Israelmana enggam eyebaabil jei jam ge erebil jamere Nabi Musa ga aa gutel, "Ai ajamersus erne, ane ajam egegwena!"
22Jengga aamei ijeya gwenaram angtane Kristenfe, aamei imsa fortya Taarena Siyonminibe. Jeiserem kotana Yerusalem winsiwer; jeiserem kotana Uwa Sanbagirmana nwinsanaiserem taman waaken-girip aaiserem. Ane jep ga malaikata ane-anesus jep aa jei ge betwebilirim, ini jemna saaser-saaserfer aa jei ge folbaminirim.
23Ane aamei imsa foryalaye, aamei angtane Uwa Sanbagirmanaiserem jebar ga imsa betwesini, angtane bosna aa jemanem ge batobaminirim taman waaken-giribe. Aamei Uwa Sanbagirminibe imsa fortya, Jei enggam aa jei gunurum angtane waakenayo afa kapka. Ane Jem eyewer ga uwu angtane Uwa Sanbagiri waakenem aa jes balbabilirim, ane jei ga waakenfer ge nwinbene Uwa Sanbagirfar jamer abak-abaksus.
24Ane aamei Yesusminip ga imsa fortya. Jeiba Imam Sanbagirsususerem taterisi ibirmiserem Uwa Sanbagiri aa jes bilipminirim angtanefe. Aamei aawisi Jemnaiserem jeme is mes wirtabaabili. Aawisi Jemnaiserem jei aawisi Habelmana mes ayebenni, aam temawer aawisi Habelmanaiserem jei nes jafner ge saamisini fwaina etam-etama kapkaiserem jem temawer, jengga aawisi Yesusmanaiserem jei etam-etama kapka nemna nes mes wirtabaipmisini.
25Taterisi Uwa Sanbagirmanaiserem bunarsusfer gasa sarbisi, ane aamei enggam ijama guyon, "Taterisi jeiserem ai baifa gwebili jam sarbisife." Nabi Musa jei fwater Taterisi Uwa Sanbagirmanaiserem jei mes nasbinennel ogiri aaiserem jebe, jengga angtane jepmanaiserem jei taterisi jeiserem baif ne gwebil jam sarbisife, ane jei ga tamtamtala ga aane domol. Ane namwer aas jepserem aamei fomfoma? Aamei bunarsusfer tamtamtala ga isa domola, afa aamei taterisi Uwa Sanbagiri aa jes nasbilirim taman waaken-giriwer jeiserem ijama sarbiyeneye.
26Gwanan jes jepserem Uwa Sanbagiri Jei ga aa gutel, ane Jemna tateris gulu jeiserem jem ga ogiri ga jam gin-gintel. Jengga namwer Jei gamjon taterisi nafsiserem ga mwangbisini enggame, "Ai gamjon ogiri aaiserem ga As gin-gintese, gam ke ogiri aaiserem jetefener, jengga winis mese, gwer, muar, ane torbwana mese ga As gin-gintababisi."
27Jei jam aa galap gutenaram enggame, "Ai gamjon ogiri aaiserem ga As gin-gintese.", nei bunarsusfer nemsa towaswena enggame, seyafter Jei aa jes eyebaabilim, seyafter jeiserem Jei se gin-gintababisi, ane gase bartabaabisi. Jengga jeiserem jam gin-ginweyan aaiserem ga jenefener sege falbisi.
28Ga jem temawer, au, nei Uwa Sanbagiri jeber-jeber ga enggam nesa pujitawena, "Ase samfer golmini" jesma bilibene, aam temawer Jei tampata nep nes Jei golmini, tampata Jei Sanbakfe aa jep nwinirim, ane tampata jeiserem jei jam ne gin-ginweyan. Ane nei Uwa Sanbagiri ga jam nesa erebene, ane gwela nemna ga nes waakenfer sege folbamini, jega ini Jemna jem ga nesa saaser-saasertabana.
29Nei ga jes gemerserem ga gemer nesa eyebili, aam temawer Uwa Sanbagiri nemnaiserem Jei ga tokwana jam ertele gamserem, apgal jigala jep ge taabisife jamer fusfusus.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel