1Am afelen mesna Uwa Sanbagiri ijes jenbebilirim, ane aamei ga Jemna, ai enggam ai gunu aamei waakenfer sa sarbistaabon Yesusem temawer. Jeiba Angtane Uwa Sanbagiri aa jes baftatnaram, jega enggalf Jei gam etamwef nem Imam Sanbagirsusfe. Jeiba Angtanesam nei nejesa tebasinirim, ane neya nasibene taterisi Jemnaiserem.
2Jei Jemna awelna mes gwebili waakenfer Uwa Sanbagirfe, Uwa Sanbagiri Jei aa Jes destabalam. Jei waakenfer aa eyebili Nabi Musa gamserem, awelna Uwa Sanbagirmana waakenfer aa gam gwebilim angtane Uwa Sanbagirmanaiserem jem nenennabe.
3Jengga Uwa Sanbagiri Jei Yesus pujitene uskambarsus Nabi Musaminiwer. Aamei imsa towaswena enggame angtane aa jei gam eyebilirim, angtane jeiserem bosna jemna unggwanfer gane gulbatenanna, jena jei aa jes gam eyebilirim jewer. Yesus Jei enggala angtane jena aa jei gam eyebilirim, ane Jei pujitalaiserem ga gam domola. Nabi Musa jei ga ja tini jes galserem, gam jega jei pujitele uskambar jam domolyan.
4Angtane aasaje jena gam eyebili, jena jeiserem jei ga jener jam etamweyan. Ane Jei, seyafter aa jei eyebaabilim, Jeiba Uwa Sanbagiriserem Jesam.
5Nabi Musa jei angtane awelna Uwa Sanbagirmana gam gwebil, ane jei awelna jemna waakensusu gam gweyibel angtane Uwa Sanbagirmanaiserem jem nenennabe. Jei taterisi aaiserem ga jes nasipmil jem temawer, taterisi Uwa Sanbagiri galap jes gwerauwulmiliserem bunarsusfer.
6Jengga Kristus Jeiba Tane Uwa Sanbagirmanam, ane Jei awelna Jemna waakenfersus gwebili, Jei angtane Uwa Sanbagirmanaiserem jem Sanbakef aa galap nwinirim. Ane angtane jam aa jem Sanbakef nwinirim, jei ga nei. Ane nei ga angtane Uwa Sanbagirmana, afa nei kanaufer nesa tebasinirim ini saaser-saasermer, gam jega nei nejama ereyen.
7Mafnana Uwa Sanbagirmana Jei ga enggam gunu: "Afa nunu namwer aaiserem aamei jam isa sararam Uwa Sanbagiri Jei ip jam is nasipminirim,
8ini imna ipsama kekeletababisinirim. Ipsama gwenaram enggala asal-asala imna dwisgiribe jam saryana galserem. Tahunu unggwanfer ga empat pulu, jei aane damtabil bwembwema Ai Ajes eyeipmuwelam, jengga jei Asa jam ne sarbayan. Jei Am tefner gane unggwasbana.
9(3:8)
10Jega jem temawer, Ai Ajam nasbabil angtane jeiserem, ane ga Ai gul, 'Jei baif naawena Ai Agam gunurum, ane jei jam ne sarbiyen Ai Ajes bilipmilim.'
11Ai bunarsusfer nasbabili, ane Ai ititmer balbabili, 'Jei fasfasus jam ge kabwiteyan tampata Amna waakena jei jep naawesiliserem.'"
12Am afelen mesna, aamei ina ga waakenfer isa gaaramisnenne, jega angtane afa fas im nenennabe ini kabwaksusu fas afa jam damtayan, ane Uwa Sanbagiri jam tebayan, Uwa Sanbagiri gemer aa Jei nwinirim abak-abaksusfer. Angtane jes galserem gam aa jei gam gwenaram, jepga jei ga aa tikwena Uwa Sanbagiri Jes onsobafe.
13Nunu Uwa Sanbagiri aa Jes bilirim Taterisi Jemnaiserem jebe, nunu jeiserem jeba nunu namwer aas jepserem nei nejeba gwenaram, jesam. Jega jem temawer, nunu jeber-jeber nei ga nennen waakenfer nesa kanausosiwena. Jam isa eyebili jeiserem, jega samfer angtane daamfenna im nenennabe etam-etama kapkaiserem jam towaiwulyon jam eyebife. Afa aamei gam jam is eyebilirim, gam jega aamei kapkaiserem jes igam eyebili, ane ini imna is mes gam kekeleswebana.
14Aaiserem gasa sarbistaabon, nei seyafter daamfennaber neya nwini Kristusfar, afa nei Kristus gemer nesa tebasinirim, nejama aftannuyon jamer nunu umwef jepserem, gwanan gamserem nei Jei negama tebasinintim.
15Taterisi is ajes bilipminirim, sa sarbisnenne gamjon: "Afa nunu namwer aaiserem aamei jam isa sararam Uwa Sanbagiri Jei ip jam is nasipminirim, ini imna ipsama kekeletababisinirim. Ipsama gwenaram asal-asala imna dwisgiribe jam saryana galserem."
16Nan angtanesa gwanan taterisi Uwa Sanbagirmana aa jei ne sarbilim, jengga jei jam ne onsobiyen? Jeiba angtane Israelsam, negara Mesir je aa jei ge nwinbelem, ane Nabi Musa aa jei ne onsobalam jewer ga totinyel.
17Ane Uwa Sanbagiri Jei ga nans nasbabuwel empat pulu tahunu jeiserem? Jei aa nasbabuwel angtane Israel jeiserem dwisgirip aa jei ge sofobuwelam, ane etam-etama kapka jep ga aane eyebuwel, ane jega jem temawer jei seyafter jep ga aa ge terbil jamer bar.
18Uwa Sanbagiri Jei nans balbabil enggame, "Jei fasfasus jam ge kabwiteyan tampata Amna waakena jei jep naawesiliserem."? Jei angtane taterisi Jemna jam ne onsobiyeneiserem ga jes balbabil.
19Ga jem temawer nei ga enggam nemsa towaswena, jei jep jam ge kabwiteyan tampata waakena jei jep naawesiliserem, aam temawer jei Uwa Sanbagiri jam ne tebasiyen.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel