1Pauluso Silas ga kota Amfipoliso kota Apolonya jep jamer ge ayenni, ane ga aa ge forna kota Tesalonika je. Jes jepserem jena angtane Yahudimana aa jep ge betwebuwefaram ga jep tenmini.
2Gwanan gemerserem ga gemer, Paulus ga kawetena jena angtane Yahudimana aa jep ge betwebuwefaram jeiserem jebe. Nunu Sabat nawer-ningna Paulus jamer ge nasbawena jebar, ane Taterisi Uwa Sanbagirmana gane gerabistena.
3Jei waakenfer nasipmini ane aa ge saamini enggame Mesias jam aangeswena, ane se irwena angtane jam tereserem jemniwer. Ane Paulus enggam ga balbabili, "Yesus ai namwer isa ajes nasbaminirim ibe, Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif."
4Angtane afwer jei Yesus ga aane tebana, ane Pauluso Silas ga aane tikwemitini. Ane angtane Yunanimana unggwanfer Uwa Sanbagiri aa jei ne pujitawenaram jei mese aane tikwemitini, wini sanbak-sanbaka unggwanfer jei mese.
5Jega jem temawer angtane Yahudimana jei ga aa ge uskamswebili, ane angtane kapka jafner aa jei ge wofobuwenaram nelebe jei ga aane jenbebili, ane angtane nafsibar ga aa ge betwebili, ane jei ga enggalf ga aane eyebili angtane aa jei ge nwinbenerem kota Tesalonika je ini jemna kabwakfer gam ge folbamif. Ane angtane unggwanfer jeiserem ga aa ge tetenbinenne, ane ga aa ge erabana. Jei jena Yasonmana ga aane goronwebili enggalem temawer Pauluso Silas jep ne terelmif, gam ne gwesaastef sitabe angtane unggwanfer jem tarnabe.
6Jengga jei Pauluso Silas jebe jam ne domsoyan, jepga jei Yason ane angtane afwer Yesus aa jei ne tebanaram ga aane tebabili, ane onnap gane tinderbifele jamere angtane sanbak-sanbaka jepserem jemnibo. Jei ga jep ga aa ge gwarenbuwena enggame, "Angtane aaiserem jei kabwakfer jei ne eyebuwena aa jep ge wofobuwenaram, ane gamjon ga aaf ge jalbili.
7Ane Yason jei Pauluso Silas jep ga taamini jem jenap jam ge tabafe. Jei seyafter baif naawena jam ne sarbafe Angtane Sanbaksususerem Romamana aa gam gunurum. Jei enggam ge gubili, 'Raja nafsi aare, bosna Jemna Yesus.'"
8Taterisi jeiserem jame aa galap ne sarbilirim, angtane uskambar ane angtane sanbaka kotanabe seyafter jes gemerserem, jemna kakala jam tikwemiyen.
9Jepga angtane sanbaka jei Yasono angtane afweraiserem Yesus aa jei ne tebanaram ga balbabili, "Gwanan abe ase doisa gaarmini, jega ai aamei isa gam asa aftabunnu." Doini jeiserem jam ne gaarmilibe jamer taban, jei ga aane aftabunnu.
10Gwini jeiserem jem afelen mesna jep jeiserem jei Pauluso Silas jes ne gitmini kota Bereyawer ge gwife, aam temawer jei jam ge erebili angtane kapkaiserem jemnibe galap sene eyebili. Jame aa galap ge fornaram jebe, ga aa ge gwina jena angtane Yahudimana aa jep ge betwebuwefaram jebe.
11Angtane kota Bereyamanaiserem ini jemna ferfersusu, jengga angtane aa jei ge nwinbenerem kota Tesalonika je ini jemna waakenyan. Angtane kota Bereyamanaiserem jei Taterisi Uwa Sanbagirmanaiserem waakenfer jei ne saribene. Ane nunu jeber-jeber jei Taterisi Uwa Sanbagirmanaiserem jes ne gerabistowena enggalfe jei gam ge towaswebif Paulus aa gam gunurum je ke bunar afa fas.
12Angtane Yahudimana unggwanfer jebe aa gemer ge nwinbenerem jei Yesus ga aane tebana. Ane wini sanbak-sanbaka Yunanimana unggwanfer, ane anggwa Yunanimana unggwanfer jes mese, jei Yesus ga aane tebana.
13Jepga angtane Yahudimana Tesalonika je aa jei ge nwinbenerem jei aa galap ne sarbilirim enggame, Paulus jei mesam nasbili tateris Uwa Sanbagirmana Bereya je, jei Bereyawer ge sofobili. Ane jei kabwakfer ge nasbawena Paulusem temawer, jega Paulusfar ga sege doksobana, ane angtane Bereyamana unggwanfer ini jeman jeime kabwakfer ge folbamini.
14Jengga tatar-tatarmer jelem afelen mesna Paulus ga aane aftafala finibe, jengga Silaso Timotius jei Bereya je jeber ge nwini.
15Angtane afwenefener jei Paulus ga aane aftafala jamere kota Atenayo, ane jei gamjon ga aa ge waraubitne Bereyaminibe. Jei ula Paulusmana ga aane gwirinmiyele Silaso Timotius jebe. Paulus aa gam nasipmisiwenaram enggame, "Silaso Timotius jei ai ase tatarfer sege onsobana amnuwer."
16Paulus jei Silaso Timotius jes fimini kota Atena je. Ini jemna kabwakfer folbana, aam temawer jei tiborma jam kwirulu gamserem uskambar damtabili kotana jeiserem jebe.
17Jega jem temawer jena angtane Yahudimana aa jep ge betwebuwefaram, Paulus jei angtane Yahudimanaiserem jebar jep ge nasbawena, ane angtane Yunanimana Uwa Sanbagiri aa jei ne erebenerem jes mese. Ane nunu jeber-jeber Paulus jei ga angtane pasarap aaiserem ga jebar ge nasbawena.
18Ane guru-guru sekola Epikurosmana, ane guru-guru sekola Estoyamanaiserem jep aa jei ge nwinbenerem, jei Paulusfar jena ga aane taanamu-taanamuwena. Afwer jei enggam ge gubili, "Paulus aaiserem jei uskambar nasouna, jengga taterisi jemna igi fas." Ane afwer jeiserem enggam ge gubili, "Paulus aas gamserem gam nasbili, anggwafwar ai ajama towaswebiyen jem temawer." Angtane jeiserem jei gam ge gubili, aam temawer Paulus jei taterisi Yesusmanaiserem ga jes nasbili, ane Yesus terewer jam irwelaiserem.
19Jepga Paulus ga aane aftawena Areopagus je, tampata angtane aa jep ge betwebuwefaram, ane Paulus ga aane bala, "Ai enggam aya gunu taterisi ibirmi aaiserem aamei ijes nasbinennerem, ke samfer gamjon ap is towas-towasulmini?
20Taterisi aamei ijes nasbilirim, taterisi jeiserem gwanan ajama sarbiyen. Jega jem temawer ai taterisi imna jeiserem jem igi ajama towaswebif."
21(Angtane Atenamana seyafter, ane angtane nafis tamnawer aa jei ge jalbilirim ane jep aa jei ge nwinbenerem, jei seyafter enggam ge gubili jafner ge nasbayafef, ane taterisi ibirmi seyafter gemerserem gemer ne sarbabisiyafef.)
22Paulus ga gwina otum touya bosna Areopagus tampata angtane aa jep ge betwebuwefaram. Ane jep ga fina, ane ga balbabili, "Angtane Atena as imsa sarbasi. Ai isa mesam damtabili aamei seyafter ijesa eyebaabilirim, uskambarsus ga tiborma jam kwiruluserem ga ijesa pujitababili.
23Ai agalap wofenaram kotana imnaiserem jebe, ai tiborma jam kwirtabaabiliserem jena jemna unggwanfer ai amesam gerebaabisnenne. Ai jena daamfennaiserem jes mese ai domola, jena jeiserem jep ga enggam ne tulisulu, 'Ga ip, uwa sanbagiri ai gemerje is ajama towaswebayana.' Uwa Sanbagiri aamei ijesa pujitenerem Jei ijama towaswebayan, jengga namwer Uwa Sanbagiri jeiserem ai ip ga is ajes nasbamif.
24Uwa Sanbagiri Jei ogir aaiserem aa eyebal, ane seyafter jep gemerserem. Jeiba Tuhansam winsi yo ogiri aaiserem jebe, ane seyafter aa je naawenaram. Jei jena angtane aa jes gane eyebilirim, Jei jep Jam nwinyen.
25Ane tafna angtanemanaiserem jeme Uwa Sanbagirfe apgal jigala jam ne eyebiyen. Uwa Sanbagiri Jei apgal jigala afa Jam bilyen. Jei baabeta nebe nes Jei golmini, ane mafnan mese, ane seyafter nei nejesa damtabilirim.
26Angtane daamfennaiserem jemniwer Uwa Sanbagiri Jei anggwabura seyafter gemerserem ga eyebaabili, jega jei ogiri aaiserem seyafter jep gam naawef. Gwanan-gwanansus Jei mesam gul fonggalabara ane fwera angtane seyafter gemerserem ga jep sege nwinbene.
27Uwa Sanbagiri gam aa jewer eyebilirim, Jei ga enggalem temawer eyebili, jega angtane Jei ga sene terelbene, ane Jei ga sene tebana. Bunar-bunarsus Uwa Sanbagiri Jei bijauyan nemniwer.
28Angtane nafsi ga enggam gunu, 'Baabeta Jemnaiserem nei ga nejemfenera gwena, ane nei Jebanefenera wofena, ane nei ogir aaiserem nejeba nwini.' Ane im afelen mesna ga enggam ge nasbawena, 'Nei mese nei Jem tanen mesna.'
29Nengba Uwa Sanbagirem tanesam. Jega jem temawer nei enggam nejama guyon, Uwa Sanbagiri Jei patung emas galserem, afa perak, afa ton, angtane inip enggam aa jei gunurum, 'Ai as eyebili.', gamjon jei se eyebili.
30Gwanan aa jep falam angtane nalefe jei Uwa Sanbagiri jam ne towaswebayan, Uwa Sanbagiri Jei angtane Jam tamtamtababiyen. Jengga namwer Jei enggam gunu, 'Angtane seyafter gemerserem ogiri aaiserem jebe, jam sege tikwebili etam-etam jemnaiserem jewer.'
31Nunu daamfenna Jei Jener aa jes bilim, Jei angtane seyafter waakenfer jem tenebaabuwefe, afa jei waakenfer ne eyebili afa kabwakfer ne eyebili. Jei Angtane daamfenna mesam destabal seyafter jeiserem bunarsus Jei eyebife. Ane angtane seyafter jei Angtane jeiserem ga sene towaswebana, aam temawer Uwa Sanbagiri Jei Angtane jeiserem mesam irtenent terewer."
32Jame aa galap ne sarbilirim enggame angtane jam tereserem mes irwena terewer, angtane afwer jei Paulus jam ne bisobana. Jengga angtane afwer jei Paulus enggam ne bala, "Aamei taterisi jeiserem gamjon ap se nasipmi, galap ai agma sarbisif."
33Paulus ga aa sofwa ane angtane jeiserem ga mirtebitefala.
34Angtane afweraiserem jei Paulus ga aane tikwebaatini, ane jei Yesus ga aane tebana. Angtane Yesus aa jei ne tebanaram, angtane daamfenna jemniwer bosna jemna ga Diyonisyus. Jeiba angtane otumu Areopagus jep aa jei ge betwebuwenaram angtane afweraiserem jebar. Ane wini ga daamfenna aasaje bosna ga Damaris. Ane angtane nafis-nafsi jes mese Yesus gemer ne tebana.
<< Kisah Para Rasul 17 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel