Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 21 >> 

1Angtane sanbaka jemat Kristen kota Efesusmana jebar aya syensyanwena jamer taban, jewer ga aya sofwa atdusame jamere naantei bosna Kos jebo. Nunu gamjon jem gwirmer aaiserem naantei Rodos je, ga ajema forna. Naantei Rodoswer ga aya sofwa jamere kota Patarayo.

2Atdusa ona Fenisyawer aa jei sofwaram, atdusa jeiserem ga kota Patara jep ga aya domola. Ai ga atdusa jeiserem ga ajeba juwili, ga aya sofwa.

3Aya sofwa jamere naantei Siprus gwejawer ga aya damtana, jebe ajamera ayenni, ane propinsi Siryawer ga aya sofwa. Kota Tiruso aya batona enggalfe, angtane atdusap aa jei ne gwebilirim jei galgala kota Tirusmana jep gane gwaasaasif.

4Kota Tirus je angtane Yesus aa jei ne tebanaram ai ga jemnip aya sofwa jam damtabinenefe. Ane jes jepserem ai ga jebar ga aya nwini nunu ga tuju. Mafnana Uwa Sanbagirmanaiserem ini ga gaarmini angtane jepmanaiserem jebe, ane jei Paulus enggam ga aane bala, "Aamei kota Yerusalemwer ijam gwiyan!"

5Jengga nunu tuju jeiserem taban, ai jei ga ai ge mirtebitefala, ane ai ge sofwa. Angtane Yesus aa jei ne tebanaram seyafter jei wi tane mese jebaner ga asene aftabifele jamere kota sitabo. Ane dwisip ga somwan dumem aya nwini, sembayanga Uwa Sanbagirfe ga aya gwebabana.

6Angtane seyafter jeiserem jebar aya syensyanwenaram jamer taban, atdusap ga aya juswena, ane jei ga aa ge waraubili jelem jenabe.

7Kota Tiruswer ga aya sofwa atdusame jamere naantei Tolemaiso. Jes jepserem ai ga angtane Yesus aa jei ne tebanaram jemnip ga aya sofwa jei jam damtabinenefe. Ane ai jebar waakenfer ga aya nasbawena, jebar aya nwinirim nunu ga daamfenna.

8Nunu jeiserem jem gwirmer jon jewer ga aya sofwa jamere kota Kaisareya yo. Kaisareya je angtane Taterisi Waakena jei nasbiliserem bosna jemna ga Filipus jei ga jep nwini. Ai jem jenap ga aya sofwa, jep ga aya nwini. Filipus jeiba angtane daamfennam, angtane tuju aa jes ne destabaabinintim kota Yerusalem je.

9Filipusmana yafom mesna ga nawer-naura, jei gemerje anggwana jam ne ketayan. Jei taterisi Uwa Sanbagirmana jeber-jeber ne nasibenenewena.

10Jes jepserem ai abakfer towai ajebara nwinirim, angtane nabi aasaje ga Yudeyawer jela, bosna jemna ga Agabus.

11Jei amnip jela, ane bana Paulusmana ga goltena. Ane jei tufa yo tafna jelemana jem ga faarena bana jeiserem jeme. Jepga jei enggam ga gunu, "Mafnana Uwa Sanbagirmana ga enggam gunu, 'Aas gemerserem, angtane bana jemanserem, angtane Yahudimana jei ga angtane jeiserem ga enggam sene taferna Yerusalem je, ane jei ga sene gera angtane Yahudimanyanaiserem jem tafnabe.'"

12Ula jeiserem jame agalaba sarbilirim, ai mese ane angtane Yesus aa jei ne tebanaram seyafter jep aa jei ge nwinbenerem, ai Paulus ga uskambar aya bala, "Aamei kota Yerusalemwer ipsam sofnaram!"

13Jengga Paulus jei enggam tamawolbaabili, "Aamei game ijewera syenaram, gam jega ini amnaiserem ga as ijesa kabwaktabana. Ai ames menetwesini, afa angtane as jam ne tafref, sya as saf sene taferna. Ane aime amsam menetwesini Yesusem temawer jam terfe."

14Jeiserem taban, Paulus jei gamjon ai as jam sarbabiyen. Jega jem temawer ai gamjon aima nasoweyan taterisi jeiserem jem temawer. Jengga aya gunu, "Safnant, Tuhan aa jes bilirim, jeiserem gase etamwena."

15Kota Kaisareya je aya nwinirim jamer taban, galgala aya menetababisini, ane kota Yerusalemwer ga aya sofwa.

16Angtane Yesus aa jei ne tikwebaatinennerem afwer ga ajebara sofwa Kaisareyawer jamere Yerusalemo. Jei ga asene aftabifele jamere angtane bosna Manason jem jenabo. Manason jei angtane naantei Siprusmana. Jei Yesus fwater tebanant. Ai ga jem jenap aya nwini.

17Ai jame agalaba fornaram kota Yerusalem je, am afelen mesna Yesus aa jei ne tebanaram jebe, jei ai as waakenfer ne tebabili.

18Nunu jeiserem jem gwirmer jon, ai Paulusfaner ga aya sofwa, Yakobus jam damtafe. Angtane sanbaka jemata aa jei ne tebabilirim seyafter gemerserem jei mes ge forobitye, ane ga as jep ne fibabili.

19Paulus jebe aa galap ge forobilirim, jei ga gutena, "Ai namwer asa foryal." Jepga Paulus ga nasipmini seyafter Uwa Sanbagiri aa jes eyeipminintim angtane Yahudimanyanaiserem jebe, ga enggam Paulus aa jes eyebilirim baabeta Uwa Sanbagirmanaiserem jeme.

20Taterisi Paulus aa jes nasbilirim jei jame aa galap ne saribaasinirim jamer taban, jei Uwa Sanbagiri ga aane pujitene. Jepga jei Paulus ga aane bala, "Am afelna gase sarbi, angtane Yahudimana unggwanfer Yesus mes ne tebana, ane jei Hukumu seyafter Nabi Musa aa jes tulistababilim jei gemer ne tikwebitini.

21Jengga jei im temawer enggam ge sarbili, aamei angtane Yahudimana seyafter aa jei ge nwinbenerem anggwabura nafsiserem jem nenennabe, aamei angtane jeiserem igemer towas-towastababilirim taterisi Nabi Musa aa jes tulistababilim jam ne aafulnufe. Jei enggam ge sarbabili aamei enggam im gunu, 'Tane imna ijama sunattababiyen, ane osiri asal-asala nemnaiserem nep ne jes ne towas-towasulmilim game ijama gweyan.'

22Namwer nei ga enggam nesa eyebili. Angtane Yahudimana Yesus aa jei ne tebanaram jei sege sarbili enggame, aamei imsam jela.

23Waakenfer ga enggam, ai aamei isa gemera balaram ga gemer is eyebili. Angtane aaf ga nawer-naura jena aa jei ne testenannaram Tuhanminibe.

24Sya, sa sofwe angtane jeiserem jebar Jena Uwa Sanbagirmanaiserem jebe, Uwa Sanbagirem nwenabe ini ilemana iner ga isa wirtabaabili. Ane gwanan dois is kitulmini, jega nabal safna jemna ga sene gutunbaipmisini. Jepga angtane Yahudimana seyafter ga sege towaswebili enggame, taterisi jei aa jes ne sarbilirim im temawer, taterisi seyafter jeiserem ol kabwaksam, jengga aamei Hukumu Nabi Musa aa jes tulistababilim igemer eyebili.

25Jengga angtane Yahudimanyan Yesus aa jei ne tebanaram jem temawer, ai surta jebe amsama baafulmini. Surta jeiserem jemna igiserem ga enggam: Ipsama tumilirim tumilgala angtane jam tumilyeneiserem, aa jes ne bunulntenaram falnabe. Aawisi ijama telbiyen. Ane jigal nin aawisibere ijama tumilyen. Ane maaryen ijama gwebiyen."

26Gam jamer ge nasbawelabe taban, Paulus ga angtane nawer-naura jeiserem jebar ga aa ge sofobili. Ane nunu gamjon aaiserem jem gwirmer jei Uwa Sanbagirem nwenabe ini jelemana jener jam ne wirtabaabife gane eyebili. Jei jeiserem jam ne eyebilibe nunu unggwanfer ga tuju. Jepga jei ga aa ge kabwitena Jena Uwa Sanbagirmanaiserem jebe enggalfe, imam jam ne towastafe nunu ga fomera nunu tuju jeiserem gase tabanwena, ane imam-imam jei angtane nawer-naura jeiserem galgala jemna ga sene bunulntena Uwa Sanbagirf jam kitulbofe.

27Nunu tuju jeiserem amkom fom barwela, angtane Yahudimana propinsi Asyawer aa jei ge jalbilirim, Jena Uwa Sanbagirmanaiserem Paulus ga jep ne damtana. Jepga angtane jeiserem jei angtane unggwanfer ga aane balbabili Paulus ga aane temila.

28Jepga jei enggam ga aa ge tetenbuwena, "Angtane Israelmana, au angtane aaiserem ganma temil! Angtane aaiserem jei anggwabura nafsi seyafter gemerserem ga enggam towas-towastababinenne anggwabura Israel nemnaiserem jei kapka. Ane jei enggam towastababinenne Hukumu Nabi Musa aa jes tulistababilim je waakenyan, ane Jena Uwa Sanbagirmanaiserem jes mese kapka. Ane angtane Yahudimanyan jei safe aaf jam ge kabwiteyan Jena Uwa Sanbagirmanaiserem jebe, jengga Paulus angtane Yahudimanyanaiserem jebar aaf mes ge kabwitetya jena waakenaiserem jebe."

29(Jei jes gamserem gam aa jewer ge gubilirim jei ga aam temawer ge gubili, jei Trofimus tane Efesusmana gwanan mes ne damtana, jei Paulusfar ge wofena kotanabe. Ane jei ga enggammer ge gubili, Paulus mesam aftawena Jena Uwa Sanbagirmanaiserem jebe.)

30Jepga angtane kotana jeiserem jepmanaiserem jei seyafter kabwakfer ga aane enola, ane angtane seyafter gemerserem ga aa ge nunggirbifelwetya Paulus ga aane temila, ane Jena Uwa Sanbagirmanaiserem jem mwonawer ga aane tinderfele jamere sitabo. Jes jeberserem Jena Uwa Sanbagirmana jem pintunuserem ga aane matabaabisnenne.

31Angtane jeiserem Paulus jame aa galap ne towaitanaram jam ne munbofe, angtane aasaje ga sofwa ginanggwana sanbaka Romamanaiserem jemnibe enggalfe jei gam towastaf, angtane kota Yerusalemmana jei seyafter uskambarsus kabwakfer ne enola.

32Ginanggwam sanbaka jeiserem jei tatarfer ga aa ge jalbili jelem safnabaner, jamer tampata angtane uskambar jepserem jebo. Angtane uskambar jei ginanggwam sanbaka jelem safnabaner aa galap ne damtabilirim, jei Paulus ga aane aftannu jam saftalawer.

33Ginanggwa sanbaka jeiserem Paulus ga gwetmantaasini, ane ga tebana, safna jelemana ga balbabili Paulus jam tafrefe rantena nauraiserem jeme. Jepga jei Paulus ga tenebana, "Aam jei nansa? Gwanan ibas eyebili?"

34Angtane unggwanfer jeiserem afwer jei ga aa ge tamawolbili, ane afwer jei ge gubitena, ane tetene jep ga uskambar ga aane eyebana, jepga ginanggwa sanbaka jeiserem jam towasweyan aa je bagal kakalsa. Jega jem temawer jei safna jelemana ga balbabili, "Paulus sa aftafal markasap."

35Jei Paulus ga aane aftafala jamere tutubwai tarnabo, angtane unggwanfer jei Paulus uskambar gane nasbana. Jega jem temawer ginanggwana Paulus ga aane gaartena, tafam ga aane girni.

36Angtane uskambarsus aa jei ne onsobaabilirim amnuwer, ga aa ge tetenbifele enggame, "Jasa munbo!"

37Amkom fom ge kabwitela markasabe, Paulus ginanggwa sanbaka jeiserem ga tenebana, "Ai ke samfer ibar ge nasowefe?" Ginanggwa sanbaka jeiserem jei Paulus ga bala, "Wa, aamei Yunani ula samfer im nasbili.

38Gam jega enggam, aamei angtane negeri Mesirmanyan, muara gwananaiserem kabwakfer aa jei eyebuwenantam. Jei angtane kapka ginnabaraiserem unggwanfer ga enggammer 4.000 gemer aftabifelent taman dwisgiribe. Ai enggam ai gunu aamei angtane jeiserem jesyan."

39Paulus ga tamawola, "Aiba angtane Yahudimanam. Ai kota Tarsus je ai surnunt, ona Kilikya je. Kotana jeiserem angtane unggwanfer tousa. Ke samfer ai angtane aaiserem ajebara nasowef?"

40Ginanggwa sanbaka ga aa gunu, sya. Paulus ga tutubwaiyap fina, ane tafna ga aa jawolmini jamere angtane aa jei tikwebili jam nasbawelawer. Jepga Paulus ga balbabili Ibrani oleme.



 <<  Kisah Para Rasul 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran