1Paulus jei Safna Angtane Yahudimana Sanbak-sanbaka Seyafter Gemerserem jeiserem ga gerebaabili, ane ga balbabili, "Am afelen mesna, jamere nunu namwer aaiserem ai kapka ajam eyebiyen Uwa Sanbagirfe, ane ini amna waakena gwela alemanaiserem jem temawer."
2Paulus jes gamserem game jam aa galap gunurum, imam sanbagirsususerem bosna Ananiyas jei angtane Paulusem gwetmanap aa jei ge fibilirim ga balbabili, "Paulus sa safta aaremap!"
3Paulus imam jeiserem ga bala, "Bunar Uwa Sanbagiri aamei ise saftana. Aamei angtane enggalaiserem tifni sagap waakena, jengga ini imna orolap kapka. Aamei aafe is nwini enggalfe, angtane igam balf afa jei waakena gam eyebili afa kapka gam eyebili, Hukumu Uwa Sanbagirmanaiserem jep aa gemer tulisulum. Jengga aamei Hukumu jeiserem iner im ayebinni, aam temawer aamei angtane im balbabili ai as jam ne saftafe."
4Angtane Paulusem gwetmanap aa jei ge fibilirim, jei Paulus ga aane bala, "Jeiserem kapka, aamei syefer nasouna imam sanbagirsususerem Uwa Sanbagirmana jebe."
5Paulus ga balbabili, "Am afelen mesna, ai teisyena enggame jeiba imam sanbagirsususerem. Ba bunaram Taterisi Uwa Sanbagirmana jep ga enggam baatultel: 'Aamei syefer ipsama nasounaram angtane sanbaka ilemanaiserem jemnibe.'"
6Paulus jei mesam towaswena enggame, angtane jep aa jei ge betwebilirim, afwer angtane safna Sadukimana, ane afwer jei angtane safna Farisimana. Jega jem temawer jei Safna Angtane Yahudimana Sanbak-sanbaka Seyafter Gemerserem jeiserem uskambar ga balbabili enggame, "Am afelen mesna, aiba angtane safna Farisimanam, asal-asala aman mesna jeimba angtane safna Farisimanam. Aamei ai aafe ase enggalf ima aftafaltya aamei ai as ijama teneba-tenebawef, aam temawer ai taterisi aaiserem ajewer taabilirim, angtane futunuserem gamjon sege irwebili terewer."
7Paulus jei jes gemerserem game aa jewer gunurum, angtane safna Farisimana ane angtane safna Sadukimana ga aane wagnetini, ane ga aa ge doksobana. Angtane safna Farisimana jei gam ge fibili, ane angtane Sadukimana jei gam ge fibili.
8(Angtane safna Sadukimana jei enggam ge gubili, angtane jam tereserem gamjon jam irweyan terewer. Ane jei enggam ge gubili malaikata fas ane bwata fas. Jengga angtane safna Farisimana jei enggam ge gubili, angtane jam tereserem gamjon sege irwebili terewer. Ane jei enggam ge gubili malaikata fasyan ane bwata fasyan, seyafter aare.)
9Jepga angtane jeiserem jei kakala uskambarsus ga aane towaiwulu, ane jei uskambarsus ga aa ge tetenbuwena. Ane guru-guru Hukumu Nabi Musamana aa jei ne towas-towastababuwenaram taterisi angtane Farisimana aa jei ne onsoipminirim, jei ga jep ge fibili ane jei angtane Sadukimanaiserem jebar ga aa ge doksobana enggame, "Ai enggam aya gunu, angtane aaiserem bosna Paulus jei kapka jam eyebiyen. Engbar ke enggam, bwata afa malaikat gwanan ga jebar ge nasouna."
10Jepga kakala jeiserem uskambar ga unggwandwaswena, jamere ginanggwam sanbaka jei ga aa erne enggalem temawer angtane Paulus jei uskambar ne safsaftana. Jepga ginanggwa jelemanaiserem ga balbabili, "Sa gwi, Paulus ga isa gaariufenne angtane unggwanfer jeiserem jemniwer, ane ga isa aftayala markas ginanggwamanaiserem jebe."
11Gwini jeiserem Tuhan ga fortya, Paulusem tarnap ga fina, ane ga bala, "Paulus, ilem inibe ipsam ernerem! Aamei Am temawer waakenfer imsam nasowena aaf kota Yerusalem je, gamjon jegme gemer is nasowena kota Roma je."
12Ane ona jame aa nafwelam, angtane Yahudimana jepga ula gane tagalsini, ane jena ga aane testenanna enggame, "Afa ai Paulus ajama munboyonoye, ai ajama twenyan, ane fona ajama telbiyen."
13Angtane ula aa jei ne tagalsinirim unggwanfer ga enggammer empat pulu.
14Jei imam-imam sanbakaiserem ane angtane sanbak Yahudimanaiserem jemnip ga aa ge gubili, enggam ga aane balbabili, "Ai bunar-bunarsusfer ana enggam amsama testenanna, tumilgala ajama tombaabiyen afa Paulus ajama munboyonoye.
15Jega jem temawer aamei, ane Safna Angtane Yahudimana Sanbak-sanbaka Seyafter Gemerserem, aamei seyafter ginanggwa sanbaka Romamanaiserem enggam isa bala, jei Paulus jam se aftayala imnibe. Aamei akar-akarem enggam isa bala, 'Ai gwanan taterisi Paulusem temawer waakenfer ajama damdamulsiyen, ane namwer ai Paulus gamjon ga ajama teneba-tenebawef.' Aamei ginanggwam sanbaka jeiserem ga jes gamserem ga gam isa bala, ane jei Paulus jam se aftafaltyaram, ai Paulus nelep asa sowebaasitne jam munbofe. Paulus jei aaf jam foroyan."
16Jengga nemel tane Paulusmanaiserem, ula jei aa jes ne tagalsinirim basyamer jam aa galap sarbilirim, jei markasap ga sofwa, ane ula jeiserem ga nasibene Paulusfe.
17Jepga Paulus angtane sanbaka 100 ginanggwa Romamanaiserem ga aa jenbene, ane ga aa bala, "Tane aaiserem se aftawe ginanggwam sanbakaiserem jemnip, jei jebar ge nasowef."
18Angtane sanbaka 100 ginanggwa Romamana jeiserem jei tane jeiserem ga aftawena ginanggwa sanbakaiserem jemnibe, ane ga bala, "Paulus aa jes ne gaataantenaram bwiyibe, jei ams jenbene ane ga as bala enggame, tane aaiserem ai ajam aftawef imnibe. Jei ibar ge nasowef."
19Ginanggwa sanbaka jeiserem jei tane jeiserem tafna jemna ga taayimbene, ane ga dektewili jem gwetmanap jam jalsife, ga aa tenebana, "Aamei abe ase ibas nasibefe?"
20Tane jeiserem ga enggam tamawolbana, "Angtane Yahudimana ula mes ne tagalsini jei ims ne balf enggame, 'Aamei gwirmer Paulus ijam aftawef Safna Angtane Yahudimana Sanbak-sanbaka Seyafter Gemerserem jemnibe enggalfe, jei Paulus waakensusfer gamjon jewer ne teneba-tenebawef.'
21Jengga aamei angtane jeiserem ijam sarbabiyen, aam temawer angtane unggwanfer ga empat pulu gemer sege sewebisini, nelep sege sowebisini Paulus jam ne munbofe. Jei jena fwater ne testenanna enggame, 'Ai ajama twenyan, fona ajama telbebiyen, afa ai Paulus ajama munboyonoye.' Jei namwer mes ge menetwebisini jei taterisi fwayena imniwenefener ne fibili."
22Ginanggwa sanbaka Romamanaiserem jei tane jeiserem enggam ga bala, "Aamei angtane nafsiserem ijam towastababiyen enggame, 'Ula angtane aa jes ne tagalsinirim Paulusem temawer, ula jeiserem ames nasibene ginanggwam sanbakfe.'" Jepga jei tane jeiserem ga bala se sofwe jenap.
23Jepga ginanggwa sanbaka Romamana jei angtane sanbak nauna 100 ginanggwamana ga jenmini, ane ga gitmini, "Seyafter ga enggammer is ge dupdupbulu: ginanggwa 200, ginanggwana kudanabara 70, ane ginanggwana tombakabara 200. Jam is ge menetababisini kota Kaisareyawer jam ge sofobife. Jem sembilan gwini namwer aaiserem aamei seyafter ga isa sofwa.
24Kudana ga naurater isa menetsobasini Paulusfe jei jep gase juswena, ane waakenfer ga isa aftawena jamere Gubernur Feliks jemnibo."
25Ane ginanggwa sanbaka Romamanaiserem jei surta ga enggam eyebili:
26Ga ip, Angtane sanbaka, Gubernur Feliks, kota Kaisareya je. Surta aaiserem amniwer, Klaudius Lisyas, kota Yerusalem je. Ai is enggam ai bala, waakenfer se nwin!
27Angtane aaiserem bosna Paulus, angtane Yahudimanaiserem mes ne tebanant, ane amkom saf mes ne munbonont. Jengga ai, ane ginanggwa amnaiserem jep tatarfer ga aya fortyant jemnibe, waakenfer ga aya tebanant, aam temawer ai enggam ai sarbanant jei warga negara Romamana.
28Angtane aaiserem ai aftawenant Angtane Yahudimana Sanbak-sanbaka Seyafter Gemerserem jemnibe, aam temawer ai agam towaswef angtane unggwanfer jei Paulus bagal temawer ne nasbanant.
29Jengga angtane aaiserem jei kapka afa jam eyebiyen enggalem temawer jam ne munbofe afa bwiyip ne gaataantef. Angtane Yahudimana jei enggam ge gubili Paulusem temawer, jei Hukumu agama jelemana jam tikwebitiyen, Hukumu Nabi Musa aa jes tulistababilim.
30Jepga angtane aasaje ga as towastanant enggame, angtane Yahudimana ula mes ne tagalsini Paulus jam ne munbofe. Jega jem temawer ai Paulus tatarfer ajam baftaf imnibe. Ane angtane kabwakfer aa jei ge nasbawenaram Paulusem temawer, ai angtane jeiserem enggam ga as balbabili, "Aamei sa sofwe Gubernur Feliksminip, ane ula aaiserem ga jep isa borola." Tabana ga aaf, amniwer Klaudius Lisyas.
31Jepga ginanggwana jeiserem jei Paulus gwinem ga aane aftawena, ginanggwa sanbaka jelemana aa gemer balbabilirim, ane Paulus jam ne gaarasiufenefe tamna Antipatriswer.
32Jem gwirmer ginanggwa kudanabaraiserem jei ga aa ge sofobili Paulusfaner, ane ginanggwana afweraiserem ga aa ge waraubitne jelem markasabe.
33Ginanggwa kudanabaraiserem jei jame aa galap ge forobilirim kota Kaisareya je, surta jeiserem Gubernurf ga aane gulbana, ane Paulus mese ga aane gerbana.
34Gubernur surta jeiserem jame aa galap gerabistenaram jamer taban, jei Paulus ga tenebana, "Aamei bunarsusfer fwermana?" Paulus ga bala, "Ai Kilikyamana." Jepga Gubernur ga towaswena enggame, Paulus jeiba ona Kilikyaman tanesam.
35Ane jei enggam ga bala, "Ula is jem temawer ne tebanantam, ula jeiserem im nasbi, ai agam sarbisif. Ai ula jeiserem agam sarbif, angtane taterisi kapka aa jei ne nasbilirim im temawer aafe aa jep ge forobityerem." Jepga Gubernur ga balbabili Paulus jam ne aftawefe, jena unggwandusa Raja Herodesmanaiserem jebe.
<< Kisah Para Rasul 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel