1Yesus angtane dua belas Jei aa jei ne tikwebaatinennerem ga jenbebili Jemnibe. Ane jep baabeta ga golmini enggalfe, bwat kapkaiserem jem surbif, ane angtane bwernabara ane tifin werna jeiserem seyafter ga waakentababili.
2Bosna angtane dua belas jeiserem Yesus aa jes baftabilirim rasulf gwefe ga enggam: nomor daamfenna, Simon (bosna nafsi Petrus) ane osona jemna Anderyas; Yakobus ane osona jemna Yohanes, tannawan Sebedeusmana;
3Filipuso Bartolomeus; Tomas, ane Matius, jeiba angtane pajak doini aa jei gam tebabilirim jei doini jeiserem pemerintafe ga gam kitulmini; Yakobus tane Alfeusmana, yo Tadeus;
4Simon angtane Patriot, ane Yudas Iskaryot angtane Yesus aa jei geram angtane kakalaiserem jemnibe.
5Yesus angtane dua belas jeiserem ga baftabili, ane enggam ga balbabili, "Ipsama sofwaram ona angtane Yahudimanyanaiserem jebe, ane aamei ijama sofweyan kotana angtane Samaryamana jewerserem!
6Jengga sa sofwe angtane Israelminip, jei Uwa Sanbagiri jam ne bijautana, dombana jam mumalwela gamserem.
7Sa sofwe, enggam ga isa towas-towastababili, 'Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga mes gwetmanswel.'
8Angtane bwernabara isa waakentababili, angtane futu isa nwesantababili. Angtane tifin bwernabaraiserem isa wirtabaabili, ane bwata kapkaiserem ga isa surbobili. Aamei unggwanfer imsa tebabili Uwa Sanbagirminiwer. Uwa Sanbagiri is jes kitulminirim ibe, seyafter jeiserem aamei ijama armanulyon. Gam jega sa kitulmi angtane nafisfe, gamfener.
9Doi emas, afa doi perak, afa doi tembaga ijama erbiyen!
10Funa ijama erbiyen! Fene naura jes mese sandal, ane dum mese ijama erbiyen! Angtane awelnap aa jei gam gweyibenerem, jei tumilgala gam tebabili fwainfe, ane seyafter jei aa jes gam balbabilirim, angtane jei aa jes gam batobaabilirim jemniwer.
11Aamei ijeba fornaram kota afa taman, isa terelbene aamei is jei ne tebabilirim, jebar ga isa nwini jamer aamei gamjon isa sofna jewer.
12Ijeba kautenaram jenabe, ga enggam isa gunu, 'Uwa Sanbagiri Jei ims waakentababisini.'
13Angtane jenap jeiserem aamei is jam sene tebabilirim, aamei ga enggam isa gunu jebe, 'Uwa Sanbagiri Jei ims waakentababisini.' Angtane jenap jeiserem jei is jam ne tebabiyeneiserem, je safnant, Uwa Sanbagiri Jei angtane jeiserem Jei Jam waakentababiyen.
14Afa aamei is jam ne tebabiyeneye, ane aamei is jam ne sarbabiyen, aamei ja mese ane tamna jeiserem jes mese ga isa mirtebitefala. Ane tufa onabaraiserem ga jam isa tentebaabisini enggalfe, angtane tamna jeiserem jep aaiserem jei gam gangge towaswebili enggame jei kapkaiserem ga jes ne eyebili.
15Ai bunarsus ims towas-towastababili, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri Jei angtane jeiserem uskambarsus jase tamtamtababisi angtane kota Sodom ane kota Gomora jemniwer." domola.
16Yesus gamjon ga balbabili, "Sa saar, Ai imter baftabili ginanggwaminip, ayang tanna gamserem matin somolem nenennabe. Ginanggwana imna ga enggala awas ufwaya galserem, ini jemna kakal-kakalsusu. Ga samem-samem angtane afa is galap sene afaf-afaftababili, jengga aamei kapka ijama eyebiyen angtanefe.
17Aayai, angtane kakala jeiserem galap isene tebabili, ga isene aftabifele angtane sanbakaiserem jemnibe. Angtane nafsi isene saftabana ban utuboroserem jeme, jena angtane Yahudimana aa jep ge betwebuwefaram jebe.
18Aamei isene aftabifele angtane sanbak-sanbaka ane raja jemnibe, enggalem temawer aamei Ams ima tikwebaatini. Jeiserem ga waakensusu, aam temawer jeiserem ba dwona aamei Am temawer isa nasipmitne jebe, ane angtane Yahudimanyanaiserem jes mese.
19Ane is jep ne tebabilirim, aamei safnant ijama ereyen ijesa nasbiliserem jem temawer, ane fomfoma isa nasowena. Jes jepserem aamei angtane sanbak jem tarnabe ijeba finaram, Uwa Sanbagiri Jei is golmini ula seyafter igemera balbabiwenaram.
20Gam ke aamei isa nasowena, jengga Mafnana Uwa imnaiserem ga Jei se nasowena im aaremabe.
21Jepga isa anggana, ayana jem osona jener gam gera jam ne munbofe. Osona jeme ayana gam gera, jeta tanem gam gera, ane tantantane jegme ene jeta gane nasmini ga gane dete jam ne munbif.
22Angtane seyafter gemerserem isene nasbabili kakalmer, aam temawer aamei Ai As ijewera tebanaram. Jengga aamei waakenfer Ai ijeya tebanaram, jamere se tabanwesini Uwa Sanbagiri aa jes bilirim, aamei abakef gwelaiserem ga isa domola.
23Afa angtane kapkaiserem ip is jam sene eyeipminirim tamna daamfennaiserem jebe, aamei jewer ga isa nunggiri tamna nafsiserem jebe! Ai bunarsus ims towas-towastababili, Ai Tane Angtanemana Ai Ajep jelaram, awelna imna kotana seyafter Israel je jam tabanweyan.
24Angtane kursus aa jei gam onsobilirim, jei sanbakyan guruminiwer. Angtane awelna angtanefe aa jei gam gweyibenerem, jei sanbakyan duka jelemanaiserem jemniwer.
25Samfer angtane aa jei ne tikwebaatinirim, jei ga galater guru jelemana galserem, ane angtane awelna angtanefe afa dwakf se gwena. Ai im Sanbaka, afa Ai As jam sene jenbenerem bwata kapkaiserem jem sanbakfe, afa bosna nafsi Belsebul, angtane jeime bosna kabwaksusu ip isene kitulmini."
26Yesus gamjon ga balbabili, "Ginanggwana ipsama erebaabilirim! Seyafter basyamer jam eyebiliserem ane basyamer nasoulaiserem, seyafter jeiserem angtane ga sene towaswebisi. Awelna ginanggwamana, ane awelna angtane waakenmana, seyafter jeiserem ga sene towaswebisi.
27Seyafter Ai ims towas-towastababili basyamer, aamei ga angtane seyafter gemerserem taterisi jeiserem jebe ga isa nasipminenne. Imwatanaber nastobanuwiliserem, seyafter jeiserem isa nasbinenne angtane seyafter gemerserem jem jenabe.
28Angtane safnant ijama erebaabiyen. Angtane tifni imna tefner is jei ne munbobiliserem, jei uwu imna fas is jam ne munboipmiyen. Jengga Uwa Sanbagiri isa erebene, Jei tifini seyafter imna samfer se munboipmisi, ane ga uwu imna gase giranbaabisisi taman tokwagiribe.
29Junu naura bastantowai nauna armansona hargana doini bastantouya. Afa Uwa imnaiserem Jam guyono, junu daamfenna bastantouya jam jenyan onabe, jam teryen.
30Uwa Sanbagiri Jei is nesiktababili unggwanfer, Jei nabal safna im dukabe Jei seyafter mesam eterbaabili.
31Ga jem temawer, ipsama ernerem! Uwa Sanbagiri Jei uskambarsus imse gerebaabisnenne junu bastantouya unggwanfer jeiserem jemniwer."
32Yesus gamjon ga balbabili, "Angtane afa enggam aa jei gunurum angtanem tarnabe, 'Yesus Jei am Sanbaka.', Ai Uwa Amna taman waaken-giribe enggam As bala, 'Angtane aaiserem jeiba Amnam.'
33Angtane afa enggam aa jei gunurum angtanem tarnabe, 'Yesus Jei am sanbakyan.', Ai Uwa Amna taman waaken-giribe enggam As bala, 'Angtane aaiserem jei Amanyan.'"
34Yesus gamjon ga balbabili, "Aamei ilem inibe ipsama gunurum, 'Yesus Jei enggalf fortya ogiribe, angtane waakenfer gam naawef, jei jam ge erabayan.' Fas, gamyan. Ai ga enggalf Ai fortya angtane Agam waksosif. Angtane nafsi jei Am sene tebana waakenfer, angtane nafsi jei Ai As jam ne tebayan waakenfer. Jepga sege erabasa.
35Ai enggalf Ai fortya, tane girtowaiserem jei jetabar gangge erna, tane yafontowaiserem jei eneber gangge erna, ane ginautouya jei ginaudusaiserem jei jebar gangge erna.
36Ginanggwa angtanemana jeiba jelem afelen mesna.
37Angtane ene jeta unggwanfer aa jei gam nesiksonaram, ane Ai bastantowaifer As jei gam nesiktenerem, angtane gala jei waakenyan Ams tikwebaatife. Angtane tane jelemana unggwanfer aa jei gam nesiktababilirim, ane Ai bastantowaifer As jei gam nesiktenerem, angtane gala jei waakenyan Ams tikwebaatife.
38Angtane Ai As jam tikwebaatife, angtane jeiserem jei gase menetwesini enggalfe, tamtama gam domolf jamer jei sene munbono, aam temawer jei Ams tikwebaatini.
39Angtane afa jei jelem temawenefener gam gwena, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, jei waakenfer gwelaiserem jamer abak-abaksus ga jei gam domola."
40Yesus gamjon ga balbabili, "Angtane aamei is jei kitulwilirim, jei Ams gaarwili. Angtane Ai aa jei ne gaarwilirim, jei ga Uwa Amna jes gaarwili, Jei As Jei baftatnantam.
41Angtane nabi aa jei gaarwilirim aam temawer jeiba nabisam, jei fwaina nabimana se taabili. Angtane, angtane waakena aa jei ne gaarwilirim aam temawer jei angtane waakena, jei fwaina angtane waakenmana se taabili.
42Afa angtane fo wisim diwiribere jem gam gulbanaram angtane bastantowaife aam temawer jei Ams tikwebaatini, bunarsus Ai ims towastababili, jei fwaina galap se taabili Uwa Sanbagirminiwer."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel