Alkitab Mobile SABDA
[VER] : [BERIK]     [PL]  [PB] 
 <<  Wahyu 13 >> 

1(12-18) Ane bwildusa jeiserem finip ga aa fina. (13-1) Jepga twen kakala galserem ga ai domola, jei ga finiwer faanwetya. Jemna tanduku ga sepulu ga gemer ge tenibisini, ane jemna duka ga tuju. Tandukup seyafter gemerserem nabalsir rajamana jes galserem jeme gemer falibaanunnu. Ane jem dukap seyafter gemerserem jep ga bosna Uwa Sanbagiri jem imei-imeitalaiserem ga jes ne tulistababili.

2Twen kakala galserem ajes domolaram, jemna numu ga enggam falbili bibini unggwan-giri jemna numu galserem, ane jemna tufa sawegir tufa galserem, ane jemna aarema ga enggala wombata aarema galserem. Ane bwildusa jeiserem gwanan ajes domolaram, jeiba bawasam, ane jei baabeta jemna twen kakala galserem ga jep golbili, baabeta unggwandwasusu, ane jem taman nwini jes mese.

3Twen kakalmana duka tuju jeiserem, duka daamfenna jep ga enggam falbili, bubwana tamtamsusu, jengga bubwana jeiserem mes tere. Angtane seyafter ogiri gemerserem jei ga twen kakala jeiserem jem temawer ga jam ne bitbitwebili, ane jes ne onsobili.

4Angtane jei ga bwildusa jeiserem ga jes ne sembatana, aam temawer jei ga baabeta jemna twen kakala galserem jebe jeye golbili. Ane angtane jeme twen kakala galserem jes mese jes ne sembatana. Jei ga aa ge gubitena, "Twen kakala aas galserem gala afa fas! Angtane jebar jam ge erabayan!"

5Twen kakala galserem jei ga baabetabara taterisi kabwaksususerem ga jes nasipmini, ane Uwa Sanbagiri ga jam imei-imeitana, ane jei jener sanbakfe gase nwini nunu ga muara empat pulu dua.

6Ane jepga twen kakala galserem Uwa Sanbagiri ga aa towaitana jam babapsobafe, ane bosna Uwa Sanbagirmana, ane tampata Jei aa jep nwinirim jes mese jam babapsoimbene. Ane angtane seyafter taman waaken-giribe aa gemer ge nwinbenerem jeme jam babapsobabili.

7Ane twen kakala galserem jei baabetabara angtane Uwa Sanbagirmana jebar jam ge erabaf, ane angtane Uwa Sanbagirmana ga aa ge janbili, jengga twen kakala galserem jei jam jenyan. Ane twen kakala galserem jei baabetabara anggwabura seyafter gemerserem jem sanbakfe jei se nwini, ane negara seyafter gemerserem, ane ula seyafter gemerserem ga jese nwini sanbakef.

8Angtane seyafter ogiribe aa gemer ge nwinbenerem, jei ga twen kakala galserem ga jes ne pujiwulwena, ga enggam angtane seyafter bosna jam tulistabaipmiyen bukunu angtane bosna aa jep tulistababilirim, angtane Uwa Sanbagirfar aa jei naawelaiserem. Bosna jemna jam tulistabaipmiyen jebe nalef ogiri aaiserem jam etamweyan. Bukunu jeiserem jeba Domba Tanemana, aa Jei terem.

9Afa aamei imwanabara, aaiserem gasa sarbi!

10"Angtane bwiyip jam gaataantelaiserem, jei bunar sene gaataantena. Ane angtane jam ne munboloserem nombeyem tegila, jei bunar nombeyem sene tegila, futu. Jega jem temawer safna Uwa Sanbagirmana jei abakfer sene fibabili, ane kanaufer sene taabili."

11Jepga ai domola twen kakala galserem nafsi aa jei totintyerem ogiriwer. Jemna tanduku naura ga enggala domba tane tanduku galserem. Jengga bwildusa gamserem jei gam nasowena.

12Twen kakala aaiserem jam aa jep gam fortyaram twen kakala gwananmanaiserem jem tarnabe, jei baabeta unggwandwasusu twen kakala gwananmana jeiserem jemniwer ga gam domola. Jei baabeta jeiserem ga enggalf gam domola, jei ogiri seyafter gemerserem ane angtane ogiribe aa jei ge nwinbenerem, jei jem gam tergenbaabif twen kakala gwananaiserem jes ne pujiwulfe. Twen kakala gwananmanaiserem jemna bubwana tamtamsusu mesam terbilint.

13Twen kakala afelnaiserem jeme gemer bwembwema unggwandwasusu ga jes eyebaabili enggame, angtane seyafter jep gemerserem jem nwenap, jei tokwas gitmini winsiwer jam ne iryafe ogirip.

14Ane angtane seyafter ogiribe aa gemer ge nwinbenerem, jei gase afaf-afaftababili bwembwema aa jes eyebilirim, twen kakala gwananmanaiserem jam aa jep gam fortyaram jem tarnabe. Twen kakala afelnaiserem angtane seyafter ogiribe aa gemer ge nwinbenerem gase balbabili, jei tiborma jam gane kwirulu patunga gamserem, ane bosna twen kakala gwananaiserem jep jam golbif tiborma jam kwiruluserem jebe. Twen kakala gwananaiserem jeiba gwanan mesam targara nombeyeme tamtamsusu, jengga jei gemer gaarasini.

15Twen kakala afelnaiserem jebe baabeta ga gulbana enggalfe, jei mafnana jem gerasiliserem jem gam forolbitef patunga jeiserem jebe, bosna aa jei domolaram twen kakala gwananmanaiserem jemniwer, ane patunga jeiserem jei gam nasowef. Ane angtane seyafter jei jam pujiwulyonoserem gase munbobili.

16Twen kakala afelnaiserem jei angtane seyafter gemerserem, angtane bastouya ane sanbagiri, angtane galgalabara ane galgalyena, angtane aa jei armantanaram angtane nafsiminiwer ane angtane jafner gwela, ga jes tergenbaabili tandana jemna gane taayibef tafna taasfolawer afa mirip.

17Afa angtane tandana jeiserem jem tafnap afa mirip jam domolyan, jei apgal jigala fas jam ne armanulyon, afa jam jualulyon. Tandana jeiserem jeiba bosna twen kakalmanaiserem, afa hurufu nomorem aa jes gam tulistababilirim bosna jemnaiserem jebe.

18Angtane tousaiserem ga jam sene domola. Angtane tousaiserem aa jei ne domolaram jei samfer twen kakalmana nomora jamfener seiseyawuluserem jei gam eterbili, aam temawer nomor jeiserem jeba angtane bosesam. Nomora jeiserem ga 666.



 <<  Wahyu 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran