Alkitab Mobile SABDA
[VER] : [BERIK]     [PL]  [PB] 
 <<  Yohanes 18 >> 

1Yesus sembayanga jame aa galap tabantanaram, Jei ga ai angtane Jei ajeya tikwebaatinennerem abar ga Fona Kidron jimwer ga aya awelsiwili. Tampata aasaje ga jep fala, saitun ti teten aa jep ge tenbilirim, ane Yesuso ai angtane Jei ajeya tikwebaatinennerem Jei abaner jep ga aya kawena tampata jeiserem jebe.

2Yudas, Yesus aa jei geraram ginanggwaminibe, jei tampata jeiserem jei tousa, aam temawer Yesus ane ai angtane Jei ajeya tikwebaatinennerem ai Yesusfar abaka tampata jeiserem ajeba betwewefaram.

3Jepga Yudas tampata jeiserem jewer ga aa sofwa. Jei ginanggwana ga aftabifeltye, ane angtane Jena Uwa Sanbagirmana aa jei ne gaaraibesnennerem jes mese. Angtane imam-imam sanbakaiserem ane angtane safna Farisimana, jei angtane Jena Uwa Sanbagirmana aa jei ne gaaraibesnennerem, mes ne baftabili enggalfe tampata jeiserem jewer gam ge sofwebif. Jei lampu, ane jem amanti, ane gina mese nombe ga jes ne erbili.

4Yesus Jei mes towaswena seyafter aa jei etamwelaiserem Jemnibe, jewer ga Jei angtane jeiserem ga aa gwetmantababisini, ane ga aa tenebaabili, "Aamei inansa terelbene?"

5Jei enggam ga aane tamawolbana, "Ai Yesus, angtane tamna Nasaretmanaiserem ga ajesa terelbene." Yesus ga aa gutena, "Aiba Jesam." Ane Yudas Yesus aa jei geraram ginanggwaminibe, jei angtane jeiserem ga jebaner ge fibili.

6Yesus Jei gam jame balbabilirim enggame, "Aiba Jesam.", angtane seyafter jei ga aa ge agabistena, ane onnap ga aa ge janbili.

7Yesus Jei gamjon ga aa tenebaabili, "Aamei inansa terelbene?" Ane jei ga aane tamawolbana, "Yesus, angtane tamna Nasaretmanaiserem."

8Jepga Yesus jei ga aa balbabili enggame, "Aiba isa mesam balbabili Aiba Jesam. Wa, afa aamei bunarsusfer Amsa terelbeleye, gam jega angtane Ai aa jei ne tikwebaatinennerem jei jasa aftabunnu."

9(Yesus gam aa jewer nasounaram, taterisi Yesus fwater aa jes nasbilintim, namwer gase tabanswena. Jei fwater enggam aa jes nasbilintim, "O Uwa, angtane Abe As Ijes kitulbonorom enggalfe Ai waakenfer Ase jei ne gerebaasnenef, Ai daamfenna afa Ajam afaftaanuyon.")

10Simon Petrus jei nombeya ga jei gwirni, jei nombeya ga fotoltena, ane jei ga angtane awelna imam sanbagirsususerem jem jenap aa jei gweyibenerem, jei ga aa ge aafwebana jam tegilfe, jengga jemna imwana taasfolawer aaiserem ga jes targabaasini jamer te. Angtane jeiserem jemna bosna ga Malkus.

11Yesus Petrus ga aa bala, "Nombe imna gamjon jase gwetaante jelem golap! Aamke enggam im gunu ilem inibe, Ai tamtamtala aaiserem Ajam domolyan, Uwa Sanbagiri Abe aa jes menetulbaasinirim?"

12Jepga ginanggwa ane jem komandan, ane angtane Jena Uwa Sanbagirmana aa jei ne gaaraibesnennerem jes mese, jei ga Yesus ga aane tebana, ane naawem ga aane taferna.

13Yesus Jei nabala ga Hanasminip ne aftafala. Hanas jei imam sanbagirsususerem tahunu gwanan jepserem, ane jei Kayafasem ebona. Kayafas jeiba imam sanbagirsususerem tahunu jes jepserem jeme.

14Kayafas jei gwanan anggwabura Yahudimanaiserem esorola jebe jeyam nasipminint enggame, "Waakenfer ga enggam, angtane daamfennaiserem jei gam tere, angtane seyafter gemerserem jem temawer."

15Simon Petrus ane ai Yesus amnuwer ga ai ge onsobana. Ai imam sanbagirsususerem jebar ames ge mesmeswesini. Jega jem temawer Yesus aa galap ne katantenaram imam sanbagirsususerem jem ja sitabe, ai mese ai jon ga ai kautena.

16Jengga Petrus jei pagar mwa tarnap fina. Ai imam sanbagirsususerem jebar ajei ge meserem, ai jei gamjon ga ai warauwa pagar mwona jeiserem jebe. Ane ai ga yafonsiwiri mwona aa jei gerebaasnennerem gwanan ga ajebar ge nasowena. Jepga Petrusfaner ga ai ge kautena.

17Yafonsiwir jeiserem mwona aa jei gerebaasnennerem jei Petrus ga aa tenebana, "Wa, aamke Yesus ke aamei meseya tikwebaatinenewena?" Petrus ga enggam tamawola, "Wowo, aiyan."

18Jes jepserem, ona ga wisimim fala. Jega jem temawer angtane awelna jena jeiserem jebe aa jei ne gwebilirim, ane angtane jena jeiserem aa jei ne gaaraibesnennerem jes mese, jei ga mujan tokwana enggalf ga aane surna jei jep gam ge itswebif. Ane Petrus mese jei jebaner seyafter ge fibili jam ge itswebife.

19Ane jena jeiserem jem mwonabe, jep ga imam sanbagirsususerem jei ga Yesus ga tener-tenertana ai angtane Jei ajeya tikwebaatinennerem am temawer, ane Jei aa jes towas-towasulminennerem jem temawer mese.

20Jepga Yesus ga aa tamawola, "Ai taterisi jamer Agam nasbili angtane seyafter gemerserem jem tarnabe, taterisi Amna Ajam syawulsiyen. Ai taterisi jeber-jeber Agam nasbili jena angtane Yahudimana aa jep ge betwebuwefaram jebe, ane Jena Uwa Sanbagirmana jep mese angtane Yahudimana aa jep ge forobiwetyaram. Ai taterisi basyamer afa Ajam bilteyan.

21Jeje bafa aamei Ai ga As im tenebana? Waakenfer jese tenebaabi jei Ai ga Ase jei ne sarbasini. Bunarsusfer jei tousa taterisi Ai Ajes nasipminintim jebe."

22Yesus Jei game aa gutenaram, ginanggwa daamfenna Jem gwetmanap aaiserem, jei ga Yesus tafa felfeleme ga aa saftana, ane ga aa bala, "Jeje bafa Aam ga imam sanbagirsususerem gam ga Im tamawolbana?"

23Yesus ga aa tamawola, "Ai taterisi afa syefer Ajam nasbiliye, gam jega taterisi syefer Ai Ajes nasbilirim, taterisi jeiserem aamei se bilte. Afa Ai taterisi bunarsusfer nasbiliye, gam jega aamei Ai As ibaf saftana?"

24Jepga Hanas angtane ga balbabili enggalfe, Yesus gam aftawefe imam sanbagirsususerem bosna Kayafas jemnibe. Yesus Jei aa gemer ne tafernaram, ga gemer ne aftananna.

25Simon Petrus jei jes jepserem gemer fina aa jep ge itswebilirim. Jepga angtane ga aane tenebana, "Aamke Angtane aaiserem ke aamei meseya tikwebaatinenewena?" Jengga Petrus jei jam baanbaanwena, ane ga aa gutena, "Wowo, aiyan."

26Angtane daamfenna angtane awelna jena imam sanbagirsususerem jebe aa jei ne gwebilirim, angtane Petrus imwana aa jemna gam targabaasinirim ga jem afelnaiserem, jei Petrus ga tenebana, "Ai ke im domsona Angtane jeiserem Jebar, tampata ti tetena jeiserem jebe?"

27Jepga Petrus gamjon ga aa baanbaanwebana, ane jes jepserem ayanga giriserem ga aa gutena.

28Gwinibenersus angtane sanbak-sanbakaiserem Yahudimana jei Yesus ga aane aftafalsa Kayafasem jenawer, jamere jena unggwandusa Gubernur Pilatusem jenabo. Angtane sanbaka Yahudimana jeiserem jei jener jam ge kabwiteyan jena Gubernurmana jeiserem jebe, aam temawer jei angtane Yahudimanyan, ane jei waakenfer gam naawef hukum agama jelemanaiserem jeter gam ne tikwebitif. Afa jei jena Gubernurmanaiserem jep jam gangge kabwitenaram, jei Paska tumilgala jam ne tumilyen.

29Jega jem temawer Pilatus ga aa totintye jemnibe, ane ga aa tenebaabili, "Angtane aaiserem Jei kabwakfer bas eyebili? Jeje bafa aamei Angtane aaiserem ga ima aftafaltya amnibe?"

30Jei jepga aa ge tamawolbili, "Wa, afa Jemna kapka fasaye, gam jega ai ga Jei imnibe ajama aftayalyan."

31Jepga Pilatus ga aa balbabili, "Iner sa teba, ga isa tamtamtana hukumu ilemana gemerserem." Jengga angtane Yahudimana jeiserem jei ga enggam ge tamawolbili, "Ai angtane ajama tamtamtayan enggame jamer jei gam tere."

32(Jeiserem mesam etamwena, jega taterisi Yesus Jei aa jes bilintim Jelem terem temawer, taterisi jeiserem gase tabanwena.)

33Pilatus gamjon jelem jenap ga aa kawetena, ane Yesus ga aa jenbene, ane jepga aa tenebana, "Aamke anggwabura Yahudimanaiserem ke jem Raja?"

34Yesus ga aa tamawola, "Fomfoma taterisi jeiserem je ke ilem inipfener biltena, afa angtane nafsiserem aamei ke is jei ne towastana Am temawer?"

35Pilatus jei ga aa tamawola, "Ai gam ke angtane Yahudimana? Aamei Is jei ne geraram amnibe, angtane jeiserem jeiba anggwabura Ilemanam, ane angtane imam-imam sanbakaiserem jes mese. Aamei kapkaiserem afa Ibas eyebili?"

36Yesus ga aa gutena, "Tamna Ai Ajep gwenaram Sanbakfe, gam ke aaf ogiri aaiserem jebe. Afa Tamna Ai Ajep gwenaram Sanbakfe aaf ogiri aaiserem jewer, angtane Ai aa jei ne onsobanaram jei angtane sanbak-sanbaka Yahudimanaiserem ga jebar gangge erabana, jega Ai As jam ne geryan jemnibe. Jengga tamna Ai Ajep gwenaram Sanbakfe jei ogiri aaiserem jepyan."

37Ane Pilatus jei Yesus ga aa tenebana, "Wa gameye, Aam ke Raja?" Yesus jei ga aa tamawola, "Aamei game bunarsusfer im gutena Aiba Rajasam. Ai ogiri aaiserem jebe Ai jela, ane Ai ga Ai surnunt enggalfe ula igsusu daamfenna aaiserem: Ai taterisi bunarsusfer aaiserem Agam nasipminennef. Angtane taterisi bunarsusfer aaiserem aa jei ne taabilirim, jei ga Am sene sarbasini."

38Pilatus jei Yesus ga aa tenebana, "Taterisi bunarsusfer aaiserem jeje basa?" Jepga Pilatus jei jena unggwandusawer gamjon ga aa totintye, ane angtane sanbak-sanbaka Yahudimana ga balbabili, "Ai Angtane aaiserem Jemna kapka afa ajam domolbayan.

39Jengga osiri imna gamserem, Nunu Paska jam gam falaram, ai afa angtane jam agam balaram jam aftannufe, ai angtane bwiyip aa jei gam nwinirim ga jam agam aftannu. Fomfoma aamke bai, ai Angtane aaiserem Raja imna ai ip isa ajam aftamunnufe?"

40Angtane unggwanfer jeiserem jei ga uskambarsusfer ga aa ge tamawolbana, "Wowo, Jeiyan. Jengga Barabas is aftannu!" (Ga enggam, Barabas jei ga komkom anggwa.)



 <<  Yohanes 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel