1Jes jepserem taban, Yesus kota Yerusalemwer ga aa sofwa, masara anggwabura Yahudimana jep ga aa falmini.
2Yerusalem je "Pintunu Dombamanaiserem" jem gwetmanabe, jep ga foboga touya aasaje ga jep fala, Ibrani oleme enggam gane bala Betesda. Foboga touya jeiserem jem eyebe ja tantane lima jep ga gemer ge tenbili.
3Jena jeiserem jebe angtane bwernabarfenna ga anesus jep ga gemer ge tabananna, afwer nwena kofa, afwer muli-mulni, afwer angtane tatal mesna jam gangge terebene. (Angtane jeiserem jei ga aas ne fibili, fona aa jep gin-ginwenaram.
4Galap-galap malaikata Tuhanmana afa jep jam gam iretyaram fona jeiserem jebe, foboga touya jeiserem ga gam gin-ginwena. Angtane bwernabara nabal-nabalsusu jeiserem jei fona jeiserem jep ga gam jutena afa fona jeiserem jam gam gin-ginwenaram, bwerna jemna seyafter aa jes gam domolaram ga gam barwebana.)
5Anggwana jebe aa jei tawenaram tahunu abakef tiga pulu delapan, bwerna jemna jamer taabilibe.
6Yesus Jei angtane bwernabara aa jei tanaram jes damtana, ane Yesus Jei tousa enggame jemna bwerna jamer taabilibe abaksusu. Yesus Jei angtane jeiserem ga tenebana, "Aamke bai jam waakenswefe?"
7Angtane bwernabara jeiserem ga aa tamawolbana, "Tuhan, fona aa galap gin-ginwenaram, angtane aafmanaiserem afa fas fona aaiserem jebe as jeye gaarantefe. Ane ai fonap safe agemer sofwenaram, angtane nafsi jei gwanan mes jutena."
8Yesus Jei angtane jeiserem ga aa bala, "Se irwe, tikar se golte, ane ga is wofena."
9Yesus jebe jame aa galap balaram, angtane bwernabara jeiserem jei ga waakenswena, ane tikara ga aa goltena, ga aa sofwa. Bwembwema jeiserem jei ga nunu Sabatem etamwena, nunu angtane Yahudimana aa jem ge nwinbisiwefaram.
10Jega jem temawer angtane sanbaka Yahudimana jei angtane aa jei waakenswenaram ga aane bala, "Nunu namwer aaiserem nunu Sabat, nunu nei awelna nejama gwebiyen. Hukumu nemna jep ga enggam tulisul, 'Tikara imna ijam golteyan.'"
11Jengga angtane jeiserem jei ga enggam tamawolbaabili, "Angtane ai as Jei waakentanaram namwer, Jei ai ase enggam bala, 'Tikar se golte, ga is sofwa!'"
12Jepga aane tenebana, "Angtane jeiserem Jei nansa is Jei balaram tikara imna jas golte, ga is sofwa?"
13Jengga angtane bwernawer aa jei waakenswenaram, jei teisyena jeje nan angtanesa, aam temawer Yesus Jei angtane uskambar jepserem Jei jewer ga samem-samem gwisini.
14Jewer ga Yesus gamjon angtane jeiserem jebar ga aa ge dorwena Jena Uwa Sanbagirmanaiserem jebe, ane jepga aa bala, "Namwer aamei ga imes waakenswena. Etam-etama kapka gamjon ijam eyebiyen, jega ula kabwaksusu gamjon ijam domolyan."
15Jepga angtane jeiserem ga aa sofwa, ane jei angtane sanbaka Yahudimana ga aa balbabili enggame, "Ai bwernawer ase Yesus se waakentana."
16Angtane sanbaka Yahudimana gane towaiwulu Yesusfe kapkaiserem jam ne eyeibefe, aam temawer Yesus Jei angtane bwernabara aa jewer waakentanaram nunu Sabateme, nunu angtane Yahudimana aa jem ge nwinbisiwefaram.
17Yesus Jei ga enggam balbabili, "Uwa Amna Jei Jam tikweyan awelnawer, ane Aime awelna jeber-jeber As gwebili."
18Angtane sanbaka Yahudimana, jei Yesus uskambarsus ga aane nasbana, ane jei nele ga aane terelbene Jei jam munbofe. Jei Yesus ga aane nasbana, aam temawer nunu angtane Yahudimana aa jem ge nwinbisiwefaram, nunu jeiserem Yesus Jei jem Jam gwesiyen awelnawer. Ane jei Yesus ga aam temawer nasbana Yesus enggam aa jewer gunurum, "Uwa Sanbagiri Jei Am Uwasam." Jei Jelem inip jem gam mwangbilirim Jei daamfennaber Uwa Sanbagirfar.
19Jepga Yesus Jei ga balbabili enggame, "Ai bunarsusfer ims towas-towastababili, Aiba Tane Uwa Sanbagirmanam, jengga Ai apgal jigala Aner afa Ajam eyebiyen. Ai Amsam damtanant Uwa Amna awelna aa jes eyebilirim, ane Ai ga jeter Ai eyebili. Jega jem temawer seyafter Uwa Amna aa jes eyebilirim, Aiba Tane Jemnam As eyebili.
20Uwa Amna Jei Ams nesiktene, ane seyafter Jei aa jes eyebilirim, Jei As jes ge saibaasini. Jei awelna unggwandusa nafis-nafsiserem Ase saibaasini, jamere aamei ga jam isa bitbitwesa.
21Uwa Amna Jei angtane futunu Jei gam irtebaabili, ane gwela gam golmini. Jes gamserem Aimba Tane Jemnam, Aime gwela As golmini angtanefe, angtane Ai Ajes balaram.
22Ane ga enggam, Uwa Amna Jei angtane kapka Jener Jam tamtamtababiyen, ane angtane waakena Jei fwaina waakenater Jam golmiyen, jengga Uwa Jei Ai As enggam bala, 'Ai baabeta IsAs gulbana Ibe, Tane Amna, seyafter jeiserem angtanefe ga Aamei Is eyeipmini.'
23Uwa Amna Jei jes gemerserem gam aa jewer bilirim, Jei ga enggalf bili angtane Ai As gane balf Aiba sanbagirem, jei Uwa Amna aa gemer ne balaram sanbagireme. Angtane enggam jam ge gubiyeneiserem Aiba sanbagirem, jes gemerserem jeime enggam jam ge gubiyen Uwa Amna Ai As Jei baftannuntum Jeiba sanbagirem.
24Taterisi Ai isa Ajes nasipminirim jeiba bunaram. Angtane taterisi Amna As jei saribenerem, ane Uwa Amna Ai As Jei baftannuntum Jei aa jei tebanaram, angtane jeiserem jei waakenfer gwelaiserem jamer abak-abaksus mes domola, ane Uwa Sanbagiri Jei angtane jeiserem Jam tamtamtayan. Jei nele termanaiserem mes mirtetefala, ane jei nele waakenfer gwelaiserem ga jes onsobana.
25Ai isa Ajes nasipminirim jeiba bunaram. Nunu aa jep falfaram, bunarsus nunu jeiserem ba mesam fal, angtane waakenfer gwelaiserem jam ne domolyanaiserem, jei taterisi Amna ga As jei sene saribene. Angtane taterisi Amna jeiserem aa jei ne taabilirim, jei waakenfer gwelaiserem jamer abak-abaksus ga jei sene domola.
26Jeiserem gase etamwesa, aam temawer Uwa Abe baabeta As mes gulbana, jega Ai waakenfer gwelaiserem gam As golmini angtanefe. Ai jeiserem As eyebili Uwa Amna Jei aa gemer eyebilirim. Gwela seyafter Jemnip, ane Jei waakenfer gwelaiserem angtanef gam golmini.
27Ane Jei ga Ams bala, 'Aamei angtane kapka Is tamtamtababili, ane angtane waakenater aa jei ne eyebilirim, Aamei fwaina jebe waakenater Is golmini.' Jei ga jes bili, aam temawer Aiba Tane Angtanemanam.
28Aamei ijama bitbitweyan Ai Ajes bilirim jem temawer. Nunu jeiserem aa jep falfaram, angtane seyafter aa jei ge terbuwenaram jei taterisi Amnaiserem Asene saribese,
29ane ga sege tobitisinye bitisiwer. Angtane waakenfer eyebiliserem ga sege irwebisi terewer, ane abakfer gwelaiserem ga sene domolsa. Angtane kabwakfer eyebiliserem jei mese sege irwebisi terewer, ane tamtamtalaiserem ga sene domolsa.
30Ai apgal jigala Aner Ajam eyebiyen, Aingga angtane jafner Agam teneba-tenebawena aa jes gam eyebilirim jem temawer. Uwa Sanbagiri Jei Ai As gemer balaram, Ai ga jeiserem Agam eyebili. Angtane kapka As tamtamtababili, ane angtane waakena Ai fwaina waakenater As golmini. Taterisi Ai Ajes nasbilirim angtane jeiserem jem temawer ba bunaram, aam temawer Ai Aner gam Agam bilirim Ai game Ajam eyebiyen. Jengga Ai As eyebili, Uwa Sanbagiri Ai As Jei baftannuntum Jei aa gemer gunurum, Ai ga gemer As eyebili."
31Yesus gamjon ga gutena, "Afa Ai Aner As gunurum enggame Ai sanbagiri, angtane jam ne taabiyen Ai Agam gunurum.
32Jengga Uwa Amna jegme mes gunu Aimba sanbagirem, ane Aimba Amsam towaswena Jei aa jes bilirim Am temawer jeba bunaram.
33Aamei angtane imsa baftabilint Yohanes Pembaptisminibe enggalfe Am temawer jes ne tenebaabif, ane jei taterisi bunarsusfer aaiserem mesam nasipmini.
34Ai ke taterisi angtanemana ke Ajam sarbif? Ai Yohanesem temawenefener gunu, jega Ai aamei isa gam As waakentababili.
35Yohanes jei ga lampunu gamserem jam ertele, ane ini imna saaser-saaserfer nomkef ga is gangge folbamini taterisi jemnaiserem jem temawer, lampu nafa galserem jeme.
36Yohanes aa jes bilintim Am temawer jeba igim. Ane awelna Ai namwer Ajes eyebilirim, jeiserem igsusu Ai As je gweretafe. Uwa Amna awelna jeiserem As mes gulbana Abe enggalfe Ai awelna jeiserem Agam tabanulsif. Ai awelna jeiserem Ajam gwebili. Aamei As imsa damtana awelna Ajes gwebilirim, ane imsa gunu, 'Uwa Jes baftannunt.'
37Uwa Amna Jei Ai As Jei baftannuntum, Jei mese Am temaweram nasowena. Aamei tateris gulu Jemna ijama saribeyen, ane aamei numu Jemna ijama domolbayan.
38Ane aamei taterisi Jemna waakenfer ijama waakennulsiyen ilem inibe. Aamei waakenfer ijama waakennulsiyen, aam temawer aamei Ai waakenfer As ijama tebayan. Aiba As Jeyam baftatnant.
39Aamei Taterisi Uwa Sanbagirmana waakenfer ima gerabistena, aam temawer aamei enggam ima gunu, waakenfer gwelaiserem jamer abak-abaksus jep gam isa domola. Jengga Taterisi jeiserem Am temawer jeteram nasbili.
40Jengga aamei bai Ai As ijama tebafe, jega waakenfer gwelaiserem jamer abak-abaksusu isa gam As golmini.
41Ai Ajam guyon Alem inibe enggame, angtane As ga sene bala, 'Aamei sanbagiri.'
42Ai isa mes towasweipmini aamei ilem inibe ijesa waakennulsinirim. Aamei Uwa Sanbagiri ijama nesikteyen.
43Uwa Amna Jei As mes baftannunt, ane Ai Jem baabetemam fortyant imnibe, jengga aamei As ijama tebayan. Jengga angtane nensa jam se fortyaram, Uwa Sanbagiri Jei Jam baftayan, aamei ga jes isa tebafa.
44Aamei As ijama tebayan, aam temawer aamei sarabosominiwer ijetera saripminirim enggame is jes ne balbabilirim, 'Aamei waakena!' Jengga aamei ijama terelbiyen taterisi Uwa Sanbagirminiwer aa gam gunurum enggame, 'Aamei waakena!'
45Aamei enggam ipsama gunurum ilem inibe, Ai Uwa Amna ga As bala etam-etama kapka ijesa eyebilirim jem temawer. Nabi Musa jeiba angtanesam, jei mesam tulistababil enggalem temawer etam-etama kapka ijesa eyebilintim jem temawer. Jei kapkaiserem jem temawer mesam tulistababil, ane aamei jei ga ima tebana.
46Nabi Musa jei Am temawer mesam tulistababil. Jega jem temawer afa aamei taterisi jemna jam isa taayibenerem, jes gamserem Aime As gemer isa tebana.
47Jengga aamei taterisi jeiserem ijama taabiyene, taterisi Nabi Musa jei aa jes tulistababilim, gam jega taterisi Ai Ajes bilirim ga fomfom isa taabisi?"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel