Alkitab Mobile SABDA
[VER] : [BERIK]     [PL]  [PB] 
 <<  Yohanes 6 >> 

1Nunu gamjon abakfer towaiyan, Yesus Fobogana Galileya jimwer ga aa ge awelbili. Angtane fobogana jeiserem afwer bosewer ga enggam gane bala Tiberyas.

2Yesus Jei jame aa galap ge forobilirim, angtane anesus ga aane onsobana, aam temawer jei bwembwema Yesusmana aa jes eyebaabuwenantam angtane bwernabarfe, bwembwema jeiserem ga mes ne domolant.

3Jepga ai angtane Yesus Jei ajeya tikwebaatinennerem ga aya tawena otumube, ane jep ga aya nwini Yesusfaner.

4Jewer ga nunu abakferyan anggwabura Yahudimana jei Masara Roti Tanyanaiserem ga aane eyebili.

5Yesus Jame aa galap anggasnennerem, Jei angtane unggwanfersus ga aa damtabili, jei Jemnip ga aa ge jalbili. Jega jem temawer Jei Filipus ga aa tenebana, "Nei tumilgala ga fof nesa armanulu, jega angtane seyafter aaiserem jem gasa dwena?"

6Yesus Jei bunarsusfer mes towaswena Jam jes eyebiliserem, jengga Jei Filipus jam unggwasbaf. Jei enggamfener ga aa tenebana, jam sarbaf Filipus jei fomfom se tamawolbana.

7Filipus ga aa tamawola, "Awelna doini nunu 200 jeme masef enggalfe rotini jeme jam armanulfe, ane angtane daamfen-daamfennem jes ne tombaabife safe bastantowaifer."

8Angtane nafsi Yesus aa jei ne tikwebaatinennerem, bosna Anderyas osona Simon Petrusmana, jei ga aa gutena,

9"Tane girtowai aaf aaiserem rotini jemna tafna gwiri, ane jigala bastowai nauna. Jengga angtane uskambar aaiserem jem ke nesa taayinbili tumilgala bastantowaifer aaiserem jeme?"

10Yesus ga as balbabili, "Angtane aaiserem sa balbabi gangge nwinbete." Jebe kakatar anesus, ane angtane jeiserem jei ga kakatara sagap ga aa ge nwinbitena. Anggwa teten seyafter jeiserem unggwanfer ga enggammer 5.000.

11Jepga Yesus ga rotini jeiserem ga aa goltena, ane Uwa Sanbagiri ga bala, "Ase samfer gulbana." Jepga Yesus ga rotini jeiserem ga aa syenulmini angtane jep aa jei ge nwinbenerem jebe. Ane jigal jegme gemer eyebili, ane angtane jeiserem gane tombaabili jamer jena aa jeber ge gubilirim.

12Jame aa dwenaram jamer unubuguf, Yesus ga ai angtane Jei ajeya tikwebaatinennerem ga as balbabili, "Tumilgal tomna bitbiti jeiserem ga jam isa dupdupbulu, jega tomna afa ijama fasawolyan."

13Jepga tumilgal bitbiti jeiserem ga aya dupdupbulu, ane ga aya bakbakulu burnabara ga dua belas, jamer tip. Tumilgal bitbiti jeiserem jei ga rotini tafna gwiri angtane uskambar aa jes ne tombaabilirim ga jem tomna.

14Angtane uskambar jeiserem jei bwembwema Yesusmana jame aane domolbanaram, jei ga aa ge gubili, "Angtane aaiserem Jei bunarsusfer ba Nabisam Nabi Musa aa jes balam Jei Jam foryafe ogiri aaiserem jebe."

15Yesus Jei mes towaswena enggame angtane uskambar jeiserem jei enggalf ge jalbili Yesus gane taatwebaf jem rajaf gam gwefe. Jengga Yesus Jei baif gwena ogiri aaiserem rajaf jep Jam gwefe. Jega jem temawer Yesus Jenfentowai gamjon ga aa tawena otumube.

16Ona safe aa gemer gigitswenaram, ai angtane Yesus Jei ajeya tikwebaatinennerem, ai ga foboganabe ga aya aartini.

17Jepga ai ga aya juwili atdusabe, ane aya sofwa jimwer ga aya awelna kota Kapernaum je. Ona je mes gigitswena, jengga Yesus Jei Jam foroyan amnibe.

18Nindaya je uskambar ne fibana, jepga fona muru ga aa gera.

19Ai jame agalaba awelnaram jemna bijauwer ga lima afa enam kilometer, ai Yesus ga aya damtana. Jei fo sagap wofentena, ga atdusap jela, ane ai angtane Jei ajeya tikwebaatinennerem ai uskambarsus aya erne.

20Jengga Yesus ga as enggam balbabili, "Ai aare. Ipsama ernerem!"

21Ane jepga ai ga ini saaser-saasermer ga aya gaarnnu jamer atdusabo, ane atdusa tatarfer ga aa forna tamna ajewera gunurum jam gwife.

22Nunu jeiserem jem gwirmer, angtane uskambar rotini aa jei ne tombaabilintim jei jeber ge nwinbene fobogana jeiserem jem jimwer. Ane jei ga aa ge gubili, "Ir dafefe atdusa aafe daamfennem tenant, ane angtane Yesus aa jei ne tikwebaatinennerem ga jenefener ge sofobilint, ane Yesus Jei aafer ne firtetefalant."

23Jepga atdusa nafsiserem ga aa ge forobitye kota Tiberyusminiwer, ane ga aa ge batobili tamna Tuhan Jei Uwa Sanbagiri aa jep balaram enggame, "Ase samfer gulbana.", ane angtane uskambar rotini aa jep ne tombaabilirim jebe.

24Angtane uskambar jeiserem jei aa galap ge towaswebilirim enggame, Yesus ane ai angtane Jei ajeya tikwebaatinennerem ai seyafter jebe fas, jei ga atdusa jeiserem jep ga aa ge jubiwena, jei ga kota Kapernaumwer ga aa ge sofobili enggalfe Yesus jep gam ne terelbene.

25Angtane uskambar jeiserem, jei Yesus fobogana jeiserem jem jimwer jame aa galap ne damtanaram, jei Yesus ga aane tenebana enggame, "Guru, Aamei aafe fonggalabar Im fortyant?"

26Yesus ga aa tamawolbaabili, "Ai isa bunarsusfer balbabili, aamei seyafter ba i Ams ima terelbene, jeke enggalem temawer aamei bwembwema Amnaiserem ijewera domolantam. Jengga aamei ijewera twenaram jamer unubugufsus, aamei ga Asi jem temawera terelbene.

27Sa gwe awelnabe, jega isa domola tumilgala kanawa aa jei gularam waakenfer gwelaiserem jamer abak-abaksus. Awelnabe ijama gweyan enggalfe tumilgala jam butswelaiserem, ane jem barwelaiserem, jewer igama domolf. Tumilgala kanawa jeiserem Ai Tane Angtanemana isAs kitulmini ibe. Uwa Sanbagiri Jei Am temawer enggame mesam gunu, 'Sya, Ai Imter bala.'"

28Jepga jei Yesus ga aane tenebana, "Ai bas asa eyebili, jega ini Uwa Sanbagirmana saaser-saaserfer gase folbana am temawer?"

29Yesus Jei ga aa tamawola, "Uwa Sanbagiri aamei ga is enggam balbabili aamei ga enggam isa eyebili: Aamei Ai As jam isa tebana, Uwa Sanbagiri Ajes baftatnurum."

30Jepga jei Yesus ga aane tenebana, "Wa gameye, Aamei abe ase bagal bwembwem Is golmini, jega ai gam asa domola, ane ai ga Is asa tebana? Aamei Ibas eyebifi?

31Asal-asal nemnaiserem jei tumilgala bosna 'mana' mes ne dumil dwisgiribe. Taterisi Uwa Sanbagirmana jep ga enggam baatultel: 'Jei rotini taman waaken-giriwer aaiserem ga jem taayinbili.'"

32Ane jepga Yesus jei ga aa balbabili, "Ai isa bunarsusfer balbabili, Nabi Musa jei asal-asala nemnaiserem rotini taman waaken-giriwer aaiserem jam golmiyen, jengga Uwa Amna Jei jep golmil. Ane namwer Jei rotini igsusu ip se golmini taman waaken-giriwer.

33Rotini Uwa Sanbagiri ibe is jes golminirim, Jeiba Jesam Jei taman waaken-giriwer aa Jei iretyaram, ane Jei waakenfer gwelaiserem jamer abak-abaksus angtane ogiribe Jei ga aa golmini."

34Jei ga aane bala, "Uwa, abe rotini jeiserem jeber-jeber as jam Is kitulmuwena."

35Yesus ga aa gutena, "Aiba rotisam, waakenfer gwelaiserem ibe is jeye golminirim jamer abak-abaksus. Angtane Amnip aa jei gam jelaram jei wisi jam bitayan jamer abak-abaksus, ane angtane Ams tebalaiserem jei fo botona gamjon jam folbayan.

36Jengga Ai gwanan is Amsam balbabilint, Ai Ajes eyebilirim aamei jeiserem safe imsa domolant, jengga aamei Ai As ijama tebayan.

37Angtane seyafter Uwa Sanbagiri Abe As gemer kitulbonorom, jei ga Amnibe sege jalbifi, ane Ai ga Asene tikwebaatifi. Ane angtane Ai aa jei ne tikwebaatinennerem, Ai jei Ajam balbabiyen enggame, 'Sa gwisi, As ijama tikwebaatiyen.'

38Ai As gutena, 'Sya Asa tikwebaati.', aam temawer Ai As eyebili Uwa Amnaiserem Ai aa Jei baftatnantam, Jei aa gam gunurum. Ai Ajam eyebiyen Ai Aner Agam gunurum. Aaiserem ba jem temaweram Ajewer iretyaram taman waaken-giriwer.

39Uwa Amna Jei Ai As mes baftatnant, ane Jei enggam gunu, 'Angtane seyafter Ai Is Ajes kitulbonorom, waakenfer Is gerebaabisnenne.' Nunu umwef jeiserem, Ai angtane seyafter jeiserem ga jem As irtebisi terewer.

40Aaiserem jeiba bunaram Uwa Amna gam gunurum: Angtane seyafter Tane aa jei ne damtanaram ane ga sene tebana, angtane jeiserem jei ga sene domola waakenfer gwelaiserem jamer abak-abaksus. Ane Ai angtane jeiserem ga As irtebisi terewer nunu umwef jepserem."

41Jepga angtane Yahudimana jei Yesusem temawer syefer ga aa ge nasbawena, aam temawer Yesus enggam aa jewer gunurum, "Aiba rotisam aa jei iretyaram taman waaken-giriwer."

42Jei ga aa ge gubitena, "Angtane aaiserem jei ke Yesus, tane Yusufmana, Jelem ene yo jeta gwanan nejesa domsonaram? Jei ga enggame baf gunu, 'Ai taman waaken-giriwer iritya?'"

43Yesus ga tamawolbaabili, "Aamei syefer ipsama nasowenaram!

44Afa angtane Amnip jelaiserem jener gam gunu Amnip jam foryafe, jei jam foroyan Amnibe. Jengga Uwa Ai As Jei baftannuntum, afa Jei angtane jeiserem jam gam jenbenerem Amnip jam foryafe, afa ga gam jes gamserem, angtane jeiserem ga As gam tikwebaatifi. Ane Ai angtane jeiserem ga As irtese terewer nunu umwef jepserem jeme.

45Bukunu nabi-nabimanaiserem jep enggam ne baatultel: 'Uwa Sanbagiri Jei angtane seyafter se towas-towastababili.' Angtane Uwa Sanbagiri aa jei ne sarbanaram ane aa jei ne tebanaram, bunar-bunarsus jei sege jalbili Amnibe ane ga As ne tikwebaatifi.

46Ai Uwaminiwer jelant, ane Ai Uwa Ames damtana. Angtane nafsi Uwa jam ne damtayan.

47Ai isa bunarsusfer balbabili, angtane Ams tebalaiserem jei gase domola waakenfer gwelaiserem jamer abak-abaksus.

48Aiba rotisam waakenfer gwelaiserem jamer abak-abaksus ibe isa je golminirim.

49Asal-asala imnaiserem jei tumilgala bosna 'mana' mes ne dumil dwisgiribe, jengga jei seyafter mes ge terbil.

50Jengga Ai Ajam nasowena rotim temawer aa jei iretyaram taman waaken-giriwer. Angtane rotini jeiserem aa jei dumilirim jei jam teryen.

51Aiba rotisam aa jei iretyaram taman waaken-giriwer. Ai waakenfer gwelaiserem jamer abak-abaksus is Ayam golmini. Afa angtane rotini aaiserem jei se tumili, jei waakenfer gwelaiserem jamer abak-abaksus jei se domola. Rotini aaiserem jeba nini Amnaiserem. Ai Ana jam As gera, jega angtane seyafter ogirip aa jei naawenaram, jei waakenfer gwelaiserem jamer abak-abaksus ga sene domola."

52Jepga angtane Yahudimana ga aa ge towaiwebili jena jam ne nasmife. Jei ga aa ge tenaabili, "Jeje fomfoma Angtane aaiserem Jei nini Jelemana nep se golmini, ane nei ga nesa tombaabili?"

53Jepga Yesus ga aa balbabili, "Ai isa bunarsusfer balbabili, Ai Tane Angtanemana Ajei iretyaram taman waaken-giriwer. Afa aamei nini Amna As ijama tumilbeyeneye, ane aawisi Amna As ijama telibeyeneye, gam jega aamei bunar-bunarsus waakenfer gwelaiserem ijama domolyan.

54Angtane nini Amna aa jei tumilbenerem, ane aawisi Amna aa jei telibenerem, jei waakenfer gwelaiserem jamer abak-abaksus ga jei gam domola. Ane Ai angtane jeiserem ga As irtese terewer nunu umwef jepserem jeme.

55Jei abaksusfer se gwena, aam temawer nini Amnaiserem je tumilgala waakena, ane aawisi Amnaiserem jei ga fona waakena jam telbiliserem.

56Angtane nini Amna aa jei tumilbenerem, ane aawisi Amna aa jei telibenerem, jei jeber-jeber Abar As ge nwini, ane Ai jeber-jeber jebar As ge nwini.

57Uwa Jei waakenfer gwelaiserem angtanef golmini. Jei Ams baftatnant ogiribe, ane Jei gwelaiserem Ap gulbana. Jes gemerserem Aime gemer, Ai waakenfer gwelaiserem jamer abak-abaksus angtanef Ai As golmini, angtane nini Amna aa jei ne tumilbenerem.

58Aaiserem jeba rotisam aa jei iresanyantam taman waaken-giriwer. Asal-asala imnaiserem jei rotini mes ne dumil, jengga jei seyafter mes ge terbili. Ai rotini jes galserem Ai galyan. Angtane rotini Amnaiserem aa jei gam tumilirim, angtane jeiserem jei ga gam gwena jamer abak-abaksus."

59Yesus taterisi jeiserem ga Jes nasipmini jena angtane Yahudimana aa jep ge betwebuwefaram kota Kapernaum je.

60Angtane unggwanfer Yesus aa jei ne tikwebaatinennerem jei taterisi jeiserem jame aa galap ne sarbilirim, jei ga aa ge gubili, "Taterisi aaiserem jame daran-daransusu. Nane se taabili taterisi aaiserem?"

61Yesus Jei tousa enggame angtane Jei aa jei ne tikwebaatinennerem jei syefer ge nasbawena taterisi aaiserem jem temawer, ane Yesus ga aa gutena, "Aamke ijama tikwena Amsa onsobafe taterisi aaiserem jem temawer?

62Afa aamei Ai As jam isa damtanaram Ai Tane Angtanemana gamjon jam As tawenaram tamna Ai gwanan Ajewer iretyantam jewer, aamei jep ke waakenfer ke As isa tebana?

63Mafnana Uwa Sanbagirmana Jei gwela angtanef jeya golmini, nini angtanemanaiserem je gwelaiserem is jam golmiyen. Taterisi Ai isa Ajes bilipminirim ibe, taterisi jeiserem jei Mafnana Uwa Sanbagirmanaiserem ga jewer jela, ane je waakenfer gwelaiserem jamer abak-abaksus jes golmini.

64Jengga aamei afwer Ai As ijeya onsobanaram, aamei As ijama tebayan." Yesus game aa jewer gunurum, jei ga aam temawer gunu Jei gwanan-gwanansus mes towaswena angtane jes tebayanaiserem. Ane Yesus Jeime gamjon mes towaswena angtane Jei aa jei geraiserem angtane kapkaiserem jem tafnabe.

65Ane jepga Yesus gamjon ga aa gutena, "Aamei As ijeya onsobanaram, aamei afwer Ai As ijama tebayan. Jega jem temawer Ai gwanan Ajes bilirim enggame, afa angtane Amnip jelaiserem jener gam gunu Amnip jam foryafe, jei jam foroyan Amnibe. Afa Uwa baabeta Jam gam gulbanaram jebe, jei galap ga gam fortya Amnibe, ane Ai ga As gam tikwebaatini."

66Ane jes jepserem angtane unggwanfer Yesus aa jei ne tikwebaatinennerem jepga Yesus ga aane mirtene, ane jei gamjon jam ne tikwebaatiyen.

67Jepga Yesus ai angtane dua belas Jei ajeya tikwebaatinennerem, Jei ga as tenebaabili, "Fomfoma, aamei mese ke Ase ijama mirtene?"

68Simon Petrus ga aa tamawolbana, "Tuhan, ai ga nanminip asa sofwa? Taterisi Imnaiserem waakenfer gwelaiserem jamer abak-abaksus as Im golmini.

69Ai taterisi Imnaiserem amsama taabili. Ane amsama towaswebili Aamei Angtane Waakenam, Uwa Sanbagiri Jei Imsam baftatnant."

70Yesus jepga as tamawolbaabili, "Aamei angtane dua belas isa Ames destabaabili, jengga daamfenna im nenennap jeiserem, jei bwata kapkaiserem jem sanbakef jei nwini."

71Yesus Jei Yudas tane Simon Iskaryotmana ga jes seisyatana. Jei jeiserem ga aa biltena, aam temawer Yudas safe daamfenna ai angtane dua belas Yesus Jei ajeya tikwebaatinennerem, jei Yesus ga jei se gera angtane kapkaiserem jem tafnabe.



 <<  Yohanes 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel