1Ga ip, aamei angtane Uwa Sanbagiri ijes destabaabilirim enggalfe Yesus gam tikwebaatif. Uwa Sanbagiri, Uwa nemna, Jei ims nesiktababili, ane Yesus Kristus Jei ims gerebaabisnenne. Surta aaiserem amniwer, Yudas. Ai Yakobusem osona, ane ai awelna Yesus Kristusmana gam gweyibene.
2Ai sembayanga as gwebabana Uwa Sanbagirfe, Jei aamei is gam se nesiktababili unggwanfer, ane Jei aamei uskambar is gase batobaabili, ane Jei ini imna is gase gwebabana jeber-jeber waakenfer is ga sege folbamini.
3Am afelen mesna ai isa ajes nesiktababilirim, ini amna ase unggwan-girem folbanant, ai safe surta ibe isa ajam tulisulmif enggame, Uwa Sanbagiri Jei nei nes jewer waakentababisinirim jem temawer, Yesus Kristus aa jes eyebilirim jeme. Jengga angtane afaf-afafa aasaje jep nwini im nenennabe. Jega jem temawer ini amna ase unggwan-girsusem folbana ai surta ibe isa ajam tulisulmif ga enggam, ai aamei isa ititmer balbabili, aamei Taterisi Waakena ga kanaufer jam isa taabili, taterisi angtane Uwa Sanbagirmana seyafter gemerserem ga jes ne taabili. Ini angtane afaf-afafaiserem jemna unggwan-girem ge folbamini Taterisi Waakena gase etamwena nafis-nafismer. Aamei angtane afaf-afafa jeiserem ga isa uftabili, jega jei taterisi nafis-nafsi jeiserem gamjon is jam ne towas-towastababiyen. Ane gamjon ga angtane jam isa balbabili, jei angtane afaf-afafa jeiserem safnant jam ne onsobaabiyen. Uwa Sanbagiri Jei Taterisi Waakena jeiserem gwanan mesam golmini angtane Jelemanaiserem jebe, jega Taterisi Waakena jeiserem nafismer namwer gamjon jam etamweyan.
4Angtane afaf-afafa jeiserem jei sege jalbili imnibe, sabanggwa manggen, ane jei safna daamfennaber ga isa gwena jebar. Jei Uwa Sanbagiri jam ne onsobayan. Jei ga angtane enggam syefer sene towas-towastababili, "Uwa Sanbagiri Jei nei nes mesam waakentababisini, ane Jei nei nese uskambar nesiktababili. Ga jem temawer, nei samfer negama eyebili kapkaiserem seyafter nei jes negama bilirim jam eyebife, ane Uwa Sanbagiri Jei nei nes jam tamtamtababiyen." Angtane afaf-afafa jeiserem jei ga jes gamserem ga gam ne towas-towastababili, ane jei etam-etama kapka nenes-nenesmer gane eyebili. Jei bunarsusfer Tuhan nemna, Yesus Kristus fas jam ne onsobayan. Yesus Jei Jam gweyan angtane jeiserem jem Sanbakfe. Jengga fwatersus galapserem jep ga enggam ne baatultel Taterisi Uwa Sanbagirmanaiserem jebe, "Uwa Sanbagiri Jei angtane jes galserem gam tamtamtababili."
5Aamei safe imsa towaswebili gwanan aa jei etamwelam, ai gamjon isa jam towas-towastababif taterisi gwanan jeiserem jem temawer. Sa sarbistaabon jeje fomfoma Tuhan Jei anggwabura Israelmana negeri Mesirwer ga aftabifel. Jengga jes jepserem Jei angtane afweraiserem ga munbobil, angtane Tuhan aa jes balbabilim jam tebayanaiserem.
6Ane gamjon sa sarbistaabon malaikata baabeta aa jei ne domolam Uwa Sanbagirminiwer. Jei bai Uwa Sanbagirem gwonap naawefe, ane jei tampata jelemana ga aane mirultefal, Uwa Sanbagirfer seyafter aa jep naawelam. Jega jem temawer Uwa Sanbagiri ga aa tafrebaabil jei jamer abak-abaksus, ane ga aftabifel tampata gwin-gwinsususerem jebe, enggalfe jei jep ge nwinbef. Jei ga jep sege nwinbene jamere nunu umwef jemserem Uwa Sanbagiri angtane seyafter gemerserem aa jem waksosisirim, angtane waakenfer eyebiliserem ane kabwakfer eyebiliserem. Uwa Sanbagiri Jei malaikata jeiserem gase tamtamtababisi.
7Ane gamjon sa sarbistaabon angtane aa jei ge nwinbelem kota Sodom je, ane kota Gomora je, ane angtane nafsi aa jei ge nwinbelem kotana naura jeiserem jem gwetmanabe. Angtane jeiserem jei kabwaksusu gane eyebil, malaikata kapka jes gemerserem. Angtane jeiserem jei maaryens ne eyebil; anggwa jei anggwa bosnabar gangge tana, ane wi jei wibosnabar gangge tana, maaryena ga gane eyebil. Ga jem temawer Uwa Sanbagiri Jei kotana jemna, Sodomo Gomora, ga dosomil tokwana unggwan-girsususerem jeme. Taterisi jeiserem jei ga enggalf nei negama towaswef enggame, angtane etam-etama kapka aa jei gam eyebilirim, jei tamtamtala ga enggals gam domola, jei tokwanap gam nwini jamer abak-abaksus.
8Angtane afaf-afafa jeiserem jeime gemer angtane kapka Sodomo Gomora jemna galserem. Jei eserem gane damtabisini etam-etama jei jes ne eyebiliserem, ane ga gane eyebili. Etam-etama kapka ga enggals gane eyebili: Jei kapka maaryena gamserem jelem tifinem gane eyebili. Jei bai Uwa Sanbagirem baabet gwonap naawefe, ane jei bai angtane sanbaka jem baabet gwonap naawef mese. Jei kapkaiserem jes gane nasbabili malaikata taman waaken-girip aaiserem jem temawer.
9Fwater galapserem malaikata sanbaka jemna bosna Mikayel, jei bawasfar jam ge doksobal Musam futunu jei nanse girinfele jem temawer. Jes jepserem Mikayel jei bai jena jem gaartefe enggalfe, bawasa jeiserem jam uftafe taterisi kapkaiserem jeme. Jengga Mikayel jei enggamfener gul, "Tuhan Jei aamei ise uftana!"
10Jengga angtane afaf-afafa jeiserem jei kapkaiserem jes ne nasbabili, seyafter jei waakenfer jam ne sarbiyeneiserem jem temawer. Ane angtane afaf-afafa jeiserem jei gwanan aa jep gane eyebilirim, jei nalefe jam ge gubiyen jelem inibe aaiserem waakena afa kapka, jes gemerserem gwalna jegme gemer jei fas jam guyon jelem inibe. Etam-etama aa jewer gane eyebilirim, Uwa Sanbagiri ga jem temawer gam tamtamtababili.
11Angtane afaf-afafa jeiserem galap kapka unggwandusa se etamwemisi jebe! Jei ga enggam naawena Kain fwater aa gam gwelam. Ane Bileyam gamserem, jegme gemer doini ga gemer ne nesiktababili. Ane jega jem temawer jei angtanes gane afaftababili, ane kapkaiserem ga gane towas-towastababili enggalfe doini gane tebafe. Ane Kora gemerserem, jei bai Uwa Sanbagirem baabet gwonap naawefe. Uwa Sanbagiri Jei angtane jeiserem se tamtamtababili, Kora aa gemer tamtamtalam.
12Aamei Kristus ijeya tebanaram, aamei jam igalaba betwenaram jam twenfe, angtane afaf-afafa jeiserem jei ga aa ge jalbili, aamei seyafter jebaner ga ima twena. Ane jes jepserem jei kapkaiserem ga enggam ne eyebili: Jei unggwanfer twentwene falmini, ane syefer ga gam nasounanna. Jei aa jes ne eyebilirim jeiserem kabwaksusu, jes gemerserem bubwa ninsini kapka galserem. Jei ga jes ne eyebili ini jelemana unggwan-giri aa gemer ge folbaminirim jam eyebife. Jei jen jena tefner gane egansosnenne seyafter gemerserem jem temawer, jei angtane nafsi jei jam ne egantababisiyen. Jei jam ge seferswebiyen kapkaiserem jam ne eyebife. Jei berek tetena galserem, igi jam falinonyan. Jei omyana galserem, nei omyana negama domsobana unggwanfer, jengga arouwa jam nyenyan, nindaya omyana jeiserem ga gam fonsobana jamer bijausus. Angtane afaf-afafa jeiserem jei tini ese unggwanfer galserem, jengga jei jam telabe tanna jemna fas. Ane jei ga tini seiye galserem jei ga gam kurutini, onnap gam jena.
13Angtane jeiserem jei enggala fona jam tili jepserem, ane gamjon ga gam aarwatini, oltunu ga gam sokotaabaabun se fala fo eyebe. Etam-etama kapkaiserem jei aa jes gane eyebilirim, etam-etama jeiserem ga enggala oltunu jeiserem jes galserem. Jei ga torbwana galserem aa jei gangge irwalwebilirim winsibe. Uwa Sanbagiri Jei tampata gwin-gwinsusu mes menetulsini enggalfe, angtane afaf-afafa jeiserem jep ge nwinbef jamer abak-abaksus.
14Gwanan-gwanansus galapserem, Henok jei asal-asala tujunubaraiserem Adamminiwer, jei taterisi Uwa Sanbagirmana ga aas nasbil angtane afaf-afafa jeiserem jemnip aa jei etamwemiliserem. Jei ga enggam gul, "Sa sarbi! Tuhan Jei malaikata unggwanfersus waakenaiserem jebar sege forobitye.
15Jei angtane seyafter gase tenebaabuwesa. Jei angtane etam-etamabaraiserem gase tamtamtababisi, aam temawer jei kapkaiserem aa jewer ne eyebilirim, ane taterisi kapkaiserem aa jewer ne nasbabilirim Tuhanem temawer." Jes gemerserem Henok aa gemer gulum enggame, Uwa Sanbagiri Jei angtane afaf-afafaiserem se tamtamtababisi.
16Angtane afaf-afafa jeiserem ini jemna jeber-jeber kabwaksusu, ini jemna fas jam ge saaser-saaserswebamiyen. Jei jeber-jeber enggammer gangge gubili, angtane nafsi jei kapka gane eyebili. Jei kapkaiserem seyafter gemerserem ga jes ne eyebili, ini jelemana unggwan-giri aa gemer ge folbaminirim jam eyebife. Jei ol dagam gangge nasbawena, ane jena ga gane detenanna, ane ga gangge gubili, "Ai angtane sanbak-sanbaka." Jei angtane nafsiserem jes gane malin-malintababili, jega enggalf angtane nafsi jeiserem jei fwaina waakenfer gam ne eyeipmif jebe.
17Am afelen mesna ai isa ajes nesiktababilirim, sa sarbistaabon rasulu Tuhan Yesus Kristusmana jei gwanan aa jes ne bilirim.
18Jei ga enggam ge gubili, "Nunu umwef aa jep falsaram, angtane afwer jei Taterisi Uwa Sanbagirmana jei sene imei-imeiwulboso. Jei Uwa Sanbagiri aa jes bilirim jeiserem fas jam ne eyebiyen. Jei kapkaiserem ini jemna unggwan-girfer ga jep ga folbamini jam ne eyebife, jei kapka jeiserem gane eyebisi."
19Angtane kapka jeiserem jei nele angtane ogirmanaiserem ga jes ne onsobana. Mafnana Uwa Sanbagirmanaiserem fas Jam nwinyen jem inibe. Jei kapkaiserem ga jes ne eyebili, ane angtane Kristus aa jei ne tebanaram, jei ga aa ge syensyanwebili.
20Jengga aamei am afelen mesna ai isa ajes nesiktababilirim, aamei taterisi Uwa Sanbagirmana ga kanaufer isa taabili, jega ini imna unggwan-giri is gam sege folbamini nele Uwa Sanbagirmanaiserem ga jetefener isa onsobana. Ane aamei sembayanga jeber-jeber isa gwebawena, baabeta Mafnana Uwa Sanbagirmanaiserem jeme.
21Aamei is sarbistaabonwena enggame, Uwa Sanbagiri Jei ims nesiktababili. Ane aamei Jei ga isa nesiktene, ane ga jeter isa eyebili Jei aa jes bilirim. Aamei ga gemer isa gwena jes gemerserem, gwela waakena abakfer gwelaiserem ijebara fibilirim. Aamei abakfer gwela jeiserem ga isa domolsa Yesus Kristusfar, Tuhan nemnaiserem Jebar, aam temawer Jemna waakenaiserem unggwandwasusum.
22Angtane afwer im nenennap jeiserem jei nele Uwa Sanbagirmana isar-isarmer ne tebana. Aamei ga angtane jeiserem jam isa batobaabili ini foler-folermer, jega jei nele Uwa Sanbagirmana ga sene onsobana.
23Angtane jeiserem ga jam isa batobaabili. Aamei ga enggam isa batobaabili, angtane tokwanawer jam dektesiwili gamserem. Angtane afwer jei jeber-jeber kapkaiserem jes ne eyebuwena. Ini jemna ga enggam ge folbamini fene nunggunubara galserem. Aamei angtane jeiserem ga jam isa nesiktababili, ane ga jam isa batobaabili. Jengga aamei ina ga jam isa gaaramisnenne, jega aamei etam-etama kapka jei aa jes ne eyebilirim, aamei ijama eyebiyen etam-etama jeiserem.
24Nei Uwa Sanbagiri ganma pujite! Jei aamei is Jei se gerebaabisnenne, jega aamei etam-etama kapkaiserem ijama eyebiyen, ane Kristus ijewera tikwebaatinirim aamei gamjon ijama irfweyan. Jei aamei is aftabifelse Jelem gwetmanabe, nafa Jelemana unggwandusa jepserem. Jes jepserem kapkaiserem imnibe fas, ane ini imna ga ise saaser-saaserfersus sege folbamisi.
25Nei bosna Jemna ganma gulbate uskambar. Jei jetefner Uwa Sanbagiri aa jei gwenaram bunarsusfer. Jei nei nes mes waakentababisini, tere Yesus Kristus Tuhan nemnaiserem Jeme. Uwa Sanbagiri Jei sanbaksusu seyafter afweraiserem jemniwer. Jei nafabara. Jei baabetabara. Jei ga gemer se gwena gwanan-gwanansus gemerserem, ane namwer mese, jamere abak-abaksus! Amin, taterisi jeiserem ba bunaram!
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel