Alkitab Mobile SABDA
[VER] : [BUGIS]     [PL]  [PB] 
 <<  2 Tawarikh 6 >> 

1Massempajanni Arung Salomo, "Oh PUWANG, lebbi Mupojiwi monro ri laleng apettangenna ellungngé.

2Upatettongenno makkekkuwangngé Bola iya magelloé, untu’ onrong Muwonroi mannennungeng."

3Puranana massempajang, gilinni arungngé lao ri sininna ra’ya’ iya mattengngangngé tettong kuwaro, nainappa méllauwi barakka’na Allataala untu’ mennang.

4Makkedani, "Riyolo purai majjanci PUWANGNGE lao ri ambo’ku Daud makkuwaé, ‘Sipongenna Utiwi umma’-Ku massu polé ri Maséré lettu essoéwé, ri wanuwanna Israélié dé’ gaga muwi séddi kota iya Upilé mancaji onrong kégi harusu ripatettong bola untu’ onrong assompangngé lao ri Iyya, sibawa dé’to muwi séddi tau iya Upilé untu’ pimpingngi umma’-Ku Israélié. Iyakiya makkekkuwangngé Upiléi Yérusalém selaku onrong assompang lao ri Iyya. Na iko Daud, Upilé untu’ paréntai umma’-Ku!’ Ripojiwi PUWANG Allataalana Israélié iya puraé rupaiwi jancin-Naro!"

5(6:4)

6(6:4)

7Namakkeda paimeng Salomo, "Ambo’ku Daud pura rancanai untu’ patettong bola onrong assompang lao ri PUWANG Allataalana Israélié.

8Iyakiya makkedai PUWANGNGE lao ri aléna, ‘Iyaro akkattamu makessing.

9Iyakiya tenniya iko, sangadinna ana’mu ritu patettongngi matu iyaro Bola-Ku!’

10Makkekkuwangngé purani narupai PUWANGNGE jancin-Na. Mancajina’ arunna Israélié sulléiwi ambo’ku, napura tona patettongngi bolaé untu’ assompang lao ri PUWANGNGE, Allataalana Israélié.

11Purani upassadiyangeng onrong ri laleng Bolana PUWANG-ngéro untu’ Petti Assijancingngé iya mallise’é batu assijancing ri yelle’na PUWANGNGE sibawa umma’na Israélié."

12Purai mébbu Salomo panggung gessa ri tengnga-tengngana seddéna Bolana PUWANGNGE. Lampéna sibawa sakkana 2,2 météré, sibawa tanréna 1,3 météré. Ri yolona ra’ya’ iya hadéré’é, naénrékini Salomo iyaro panggungngé, natettong mangolo ri mézbaé. Naullé maneng tauwé mitai. Nainappa makkaluttu, nanaakkai iya duwa limanna enrengngé pappale’i ménré ri langié sibawa massempajang,

13(6:12)

14"PUWANG Allataalana Israélié! Ri langié iyaré’ga ri linoé dé’gaga pada-padam-Mu! Murupaiwi jancim-Mu sibawa mappaitangngi pammasému lao ri umma’-Mu iya matinulué nenniya mapatoé sibawa sukku atinna lao ri Iko.

15Purani murupai jancim-Mu lao ri ambo’ku Daud. Aga iya Muwajjanciyangngéro purani Mupogau’ iyaé essoé.

16Pura tono majjanci lao ri ambo’ku makkedaé rékko tonget-tongengngi wija-wijanna mapato lao ri hukkum-Mu pada-pada aléna, na untu’ mannennungeng séddi polé ri wija-wijanna mapparéntai matu selaku arung ri Israélié. Makkekkuwangngé, oh PUWANG Allataalana Israélié, rupai maneng towi iya puraé Muwajjanciyang lao ri ambo’ku Daud, atam-Muro.

17(6:16)

18Iyakiya, oh Allataala, tongekkoga Maélo monro ri linoéwé ri yelle’na tolinoé? Muwi sininna langié dé’to nagenne lowanna untu’ alé-Mu, apalagi bola assompang iya upatettongngéwé!

19Oh PUWANG, Allataala, iyya atam-Mu! Iyakiya tennapodo éngkalingai sempajakku, sibawa tarimai paréllaukku.

20Tennapodo esso wenni Mulinrungiwi bolaéwé iya puraé Mupilé selaku onrong assompang lao ri Iko. Tennapodo polé ri onrong Muwonroiyé ri surugaé Muwéngkalingai sibawa maddampengekka enrengngé umma Israélié, umma’-Muro, rékko mangoloki ri bolaéwé sibawa massempajang lao ri Iko.

21(6:20)

22Rékko séddié tau ritenre pasala lao ri tau laingngé naritiwi ri mézba-Mu ri laleng Bola-Mué untu’ mattanro makkedaé dé’ napasala,

23oh PUWANG, sitinajako méngkalingai ri surugaé sibawa pettuiwi parakarana ata-atam-Mué. Hukkungngi iya pasalaé sibawa paleppe’i iya dé’é napasala.

24Rékko umma’-Mu Israélié ricaui risining balinna nasaba madosai mennang, nainappa massesse kalé sibawa pakalebbisi-Ko selaku PUWANG, nanapolé ri Bola-Mué enrengngé massempajang méllau addampeng ri Iko,

25tennapodo Muwéngkalingai mennang ri surugaé. Tennapodo Muwaddampengengngi dosana umma’-Mué, sibawa tiwii mennang lisu ri wanuwa iya puraé Muwabbéréyang lao ri mennang sibawa lao ri toriyolona.

26Rékko madosai umma’-Mu ri iko namuhukkungngi mennang sibawa dé’ mupateppai bosié, nanatoba’ mennang polé ri dosana sibawa pakalebbi-Ko selaku PUWANG, namangolo ri Bola-Mué enrengngé massempajang ri Iko,

27oh PUWANG, ri surugaé, éngkalingai mennang. Sibawa addampengengngi dosana ata-atam-Mu umma Israélié. Paggurui mennang pogau’i aga iya tongengngé. Purairo, oh PUWANG, pateppai bosié ri wanuwam-Mué, wanuwa iya Muwabbéréyangngé lao ri umma’-Mu untu’ mancaji appunnangenna mannennungeng.

28Rékko nakennai akkadéreng iyaré’ga sai iyaé wanuwaé, iyaré’ga tanet-tanengngé nasolangiwi anging pella, ule’ iyaré’ga incalé, iyaré’ga rékko umma’-Mu rigasai ri balié, iyaré’ga nakennai lasa,

29tennapodo Muwéngkalingai sempajanna mennang. Rékko polé ri yelle’na umma’-Mu Israélié iya massempajangngé sibawa masussa atinna lao ri Iko nanapappale’ towi limanna mattuju ri Bola-Mué,

30tennapodo Iko ri laleng onrom-Mu ri surugaé méngkalingai enrengngé maddampengengngi mennang. Banna Iko missengngi lise’ atinna tolinoé. Rimakkuwannanaro gaukenni tungke tauwé situru sining pangkaukenna,

31kuwammengngi natuli métau sibawa matinulu umma’-Mu lao ri Iko ri wettu monrona mennang ri wanuwa iya Muwabbéréyangngé lao ri toriyolota.

32Rékko séddié tau laing ri wanuwa iya mabélaé méngkalingai passalenna arajam-Mu sibawa awatangem-Mu, Namutuli sadiya untu’ mattulung, nanalao ri Bola-Mué untu’ massempajang ri Iko,

33tennapodo polé ri onrom-Mu ri surugaé Muwéngkalingai sempajanna sibawa tarimai paréllaunna. Nanallalengiwi sininna bangsaé ri sininna linoé missek-Ko sibawa mapatoi-Ko pada-pada umma’-Mu Israélié. Naissengngi matu makkedaé bola iya upatettongngé ritu onrong untu’ massompa ri Iko.

34Rékko Muparéntangngi umma’-Mu untu’ lao mammusu méwai balié, nainappa muwi kégi mennang monro, namangolo mennang ri kota Mupiléwé sibawa massempajang mattuju ri bolaéwé iya puraé upatettongek-Ko,

35tennapodo ri surugaé Muwéngkalingai sempajanna mennanro, sibawa mpéréngngi apakalang.

36Rékko madosai umma’-Mu lao ri Iko — sitongenna dé’ gaga séddi tau iya dé’é namadosa — nainappa nasaba cai-Mu, Muleppessangngi mennang ricau ri balié sibawa ritiwi selaku tawangeng lao ri séuwaé wanuwa iya mabélaé iyaré’ga macawé’é,

37tennapodo Muwéngkalingai sempajanna mennang. Rékko ri wanuwaéro nasalaiwi mennang dosa-dosana, namassempajang lao ri Iko sibawa mangakui towi makkedaé madosani sibawa pogau’i majaé, éngkalingai sempajanna mennang, oh PUWANG.

38Rékko ri wanuwaéro malempui mennang sibawa mattonget-tongengngi salaiwi dosa-dosana, sibawa massempajang lao ri Iko namangoloto ri wanuwaéwé iya Muwabbéréyangngé lao ri toriyolota, mattuju ri kota Mupilé sibawa bola assompang iya puraé upatettongek-Koé,

39na polé ri onrom-Mu ri surugaé sitinaja-Ko méngkalingai sempajanna sibawa mamaséiwi mennang. Addampengenni sininna dosana umma’mu.

40Makkekkuwangngé, oh Allataala, jampangiki sibawa éngkalingai sempajang iya ripalettu’é lao ri Iko polé ri onrongngéwé.

41Oto’no makkekkuwangngé, oh PUWANG Allataala! Nasibawang Petti Assijancingngé iya pulambangngéngngi akuwasam-Muro sitinajako Muttamakiwi Bola-Mué sibawa monro kuwaé untu’ mannennungeng. Barakkakiwi sininna jama-jamanna imangngé, sibawa tennapodo sininna umma’-Mu mariyo-riyoi nasaba makessik-Ko lao ri mennang.

42PUWANG Allataala, aja’ Musampéyangngi arung iya puraé Mupilé. Engngerangngi pammasé-Mu lao ri Daud atam-Mu."



 <<  2 Tawarikh 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel