1Iyanaé kaluwargana Harun sibawa Musa wettunna PUWANGNGE mabbicara lao ri Musa ri tompo’na Bulu Sinai.
2Harun mappunnai eppa ana’ worowané: Nadab iya macowaé, nainappa Abihu, Eléazar sibawa Itamar.
3Rilanti’i mennang mancaji imang sibawa upacara tirikiwi minnya tompo ulunna.
4Iyakiya Nadab sibawa Abihu matéi ri padang kessi Sinai, wettunna mennang mangolo ri PUWANGNGE sibawa api iya dé’é naadélé. Iya duwa dé’ nappunnai ana’. Jaji ri wettu tuwona mupa Harun, Eléazar sibawa Itamar majjamai selaku imang.
5Makkedai PUWANGNGE lao ri Musa,
6"Suroi suku Léwié polé mangolo, sibawa jello’i mennang mancaji sining pattumaninna Harun.
7Majjamai mennang ri Kéma-Ku sibawa harusu’i tumaningiwi sining imangngé enrengngé sininna umma’é sibawa jama-jamanna mennang ri Kéma-Kuro.
8Jamanna mennang iyanaritu murusu’i sininna passakke’na Kéma-Ku sibawa mappallaung ri Kéma-Kuro selaku passulléna sining tau Israélié.
9Polé ri bangsa Israélié, banna suku Léwié iya Utugaskangngé mancaji pattumani tette untu’ Harun sibawa wija-wijanna.
10Iyakiya Harun sibawa ana’-ana’na harusu’i muwakka untu’ pajoppai jamangngé selaku imang; rilainnaé mennang, nigi-nigi cobai pogau’i iyaro jamangngé harusu’i rihukkung maté."
11Makkedai PUWANGNGE lao ri Musa,
12"Makkekkuwangngé sining tau Léwié Upiléi mancaji appunnangek-Ku. Wettuk-Ku mpuno manengngi sininna ana’ macowana bangsa Maséré’é, Upallaingngi untu’ alé-Ku sininna ana’ worowané macowana tau Israélié sibawa olokolo piyarana mennang iya bunge jajiyé. Iya manennaro iyanaritu appunnangek-Ku. Selaku passulléna ana’ worowané macowana Israélié, uwalai tau Léwié untu’ alé-Ku, mancajiwi matu mennang appunnangek-Ku. Iyya’na PUWANG."
13(3:12)
14Ri padang kessi Sinai PUWANGNGE suroi Musa
15mébbui daftarna sining tau Léwié situru appang sibawa kaluwargana tungke-tungke; tungke ana’-ana’ worowané iya makkéumuru siulengngé liyasé harusu’i riyoki asenna.
16Nanapogau’ni Musa iyaro paréntana PUWANGNGE.
17Léwi mappunnaiwi tellu ana’ worowané: Gérson, Kéhat sibawa Mérari. Mennang iyanaritu toriyolona sining appang iya riteppué situru asenna mennang. Gérson mappunnai duwa ana’ worowané: Libni sibawa Siméi. Kéhat mappunnai eppa ana’ worowané: Amram, Yizhar, Hébron sibawa Uziél. Mérari mappunnai duwa ana’ worowané: Mahli sibawa Musi. Mennanro toriyolona polé risining kaluwarga iya riteppué situru asenna mennang.
18(3:17)
19(3:17)
20(3:17)
21Appanna Gérson iyanaritu kaluwarga Libni sibawa kaluwarga Siméi.
22Jumellana tau worowané ri laleng appanna Gérson iya makkéumuru siulengngé liyasé iyanaritu 7.500 tau.
23Elyasaf ana’ Laél kapalaiwi iyaro appangngé. Ri laleng appanna bangsa Israélié, iyaro appangngé malai onrong ri seddé yajang ri monrinna Kémana PUWANGNGE.
24(3:23)
25Ri laleng murusu’i Kémana PUWANGNGE, mattanggung jawa’i mennang ri Kémaé sibawa pattongkona, kaing pintu muttama’na,
26ténda seddéna iya mattulilingiyéngngi Kémaé sibawa mézbaé, enrengngé kaing pallawa sumpang seddé Kémaéro. Mattanggung jawa’i mennang lao ri sininna jama-jamang iya engkaé assisumpungenna sibawa barab-barangngéro.
27Appanna Kéhat iyanaritu kaluwarga Amram, Yizhar, Hébron sibawa Uziél.
28Worowané iya makkéumuru’é siuleng liyasé polé ri appangngéro iya manenna jumellana 8.600 tau. Tugasna mennang murusu’i barab-barangngé ri Kémana PUWANGNGE.
29Elisafan ana’ Uziél kapalaiwi iyaro appangngé. Ri laleng akkémangngé, iyaro appangngé malai onrong ri seddé yattanna Kémana PUWANGNGE.
30(3:29)
31Mattanggung jawa’i mennang ri Petti Assijancingngé, méjangngé, ajé lampué, mézba-mézbaé, sining pakkakkasa iya napaké sining imangngé ri Bili’ Mapaccingngé, sibawa kaing paddenring iya lawaéngngi Bili’ Mapaccingngé. Mattanggung jawa’i mennang risininna jama-jamang iya engkaé assisumpungenna sibawa barab-barangngéro.
32Kapalana suku Léwié iyanaritu Eléazar, ana’ Harun. Najagaiwi sining tau iya majjamaé ri Bili’ Mapaccingngé.
33Appanna Mérari iyanaritu kaluwargana Mahli sibawa kaluwargana Musi.
34Worowané iya makkéumurué siuleng liyasé polé ri appangngéro iya manenna jumellana 6.200 tau.
35Zuriél ana’ Abihail kapalaiwi iyaro appangngé. Ri laleng akkémangngé, iyaro appangngé malai onrong ri seddé manoranna Kémana PUWANGNGE.
36Mattanggung jawa’i mennang ri paréwanna Kémaéro, balo’-balo’na, alliri-allirinna, pallanggana sibawa sininna pakkakkasa’na enrengngé sininna jama-jamang iya engkaé assisumpungenna sibawa barab-barangngéro.
37Makkuwatoro lao ri alliri-allirié, sining pallanggana, patto-patto’na sibawa sining tulué untu’ seddéna ri saliweng.
38Ri laleng akkémangngé, Musa sibawa Harun nenniya ana’-ana’na harusu’i mala onrong ri yolona Kémana PUWANGNGE, ri seddé alauna. Mattanggung jawa’i mennang ri upacara assompangngé untu’ bangsa Israélié ri Bili’ Pommapaccingngé. Ri lainnaé mennang, nigi-nigi cobai pogau’i iyaro jama-jamangngé harusu’i rihukkung maté.
39Sininna worowané ri laleng suku Léwié iya makkéumuru siulengngé liyasé iya nacata’é Musa situru appanna tungke-tungke situru paréntana PUWANGNGE, iya manenna jumellana 22.000 tau.
40Makkedai PUWANGNGE lao ri Musa, "Sininna ana’-ana’ worowané macowana Israélié iyanaritu appunnangek-Ku. Riyokii aseng-ngasenna mennang iya makkéumuru siulengngé liyasé. Iyakiya selaku passulléna mennang, upannessai sininna tau Léwié iyanaritu appunnangek-Ku. Iyya’na PUWANG! Sibawa muwi olokolo piyarana tau Léwié Upannessai mancaji passulléna sininna olokolo iya bunge jajiyé ri yelle’na olokolo piyarana bangsa Israélié."
41(3:40)
42Napogau’ni Musa aga napparéntang PUWANGNGE; naokini asenna sininna ana’ worowané macowaé
43iya makkéumuru’é siulengngé liyasé. Iya manenna mennang 22.273 tau jumellana.
44Nainappa makkeda PUWANGNGE lao ri Musa,
45"Pallaingekka sining tau Léwié untu’-Ku selaku passulléna sining ana’ worowané macowana Israélié, kuwaéttopa olokolo’na tau Léwié selaku passulléna olokolo’na tau Israélié.
46Nasaba ana’-ana’ worowané macowana Israélié 273 tau lebbi éga polé rijumellana tau Léwié, naiya lebbinnaro harusu’i muwaja.
47Untu’ tungke ana’, harusu’ko wajai lima dowi péra’ situru elli iya takkennaé ri Kéma-Ku;
48abbéréngngi iyaro dowié lao ri Harun sibawa ana’-ana’na."
49Napogau’ni Musa iyaro paréntana PUWANGNGE.
50Malani 1.365 dowi péra’,
51nanabbéréyangngi lao ri Harun sibawa ana’-ana’na.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel