1Mabbicarasi PUWANGNGE lao ri iyya, adan-Na,
2"Eh tolino dé’é namannennungeng, monroko ri tengnga-tengngana bangsa parronta’é. Mappunnaiwi mennang mata, iyakiya dé’ nakkita; mappunnai daucculing, iyakiya dé’ namaréngkalinga, saba’ napojiwi mennang maronta.
3Rimakkuwannanaro, éh tolino dé’é namannennungeng, ri wettu essona mupa, pangujui sining barammu ri laleng séddié paddoko pada-pada iya biyasaé napogau’ tau ripalié. Ri wettu dé’napa nalettu wennié, salaiwi bolamu mannessa-nessa pada-pada tau iya ritiwié ri appalirengngé. Ebbuno sebbo ri renring bolamu sibawa nasabbing bangsa parronta’éro, sibawa tiwini paddoko iya mallise’é sining barammuro massu molai sebbo’éro. Essangngi paddokoéro ri salangkammu. Joppano ri laleng akalemmengenna wennié; tongkoi matammu angkanna dé’ muwitai laleng iya muwolaé. Leppessanni sininna bangsa Israélié mitai sininna iya mupogau’éro, kuwammengngi namancaji papparéngngerang untu’ mennang. Naullé mainge’i matu mennang makkedaé mennang iyanaritu parronta."
4(12:3)
5(12:3)
6(12:3)
7Nainappa upogau’ paréntana PUWANGNGE laowé ri iyya. Iyatoro essoé, essona mupa, upangujui barab-barakku ri laleng séddié paddoko, pada-pada iya biyasaé napogau’ tomangungsié. Wettunna mammulani wenni, mébbuna sebbo sibawa limakku ri témbo’na bolaku, nainappa massu lalo ri sebbo’éro. Napénessai sininna tauwé, uwéssanni iyaro paddokoé ri salangkakku, nainappa joppaka.
8Pappa bajana mabbicarani PUWANGNGE lao ri iyya, adan-Na,
9"Eh tolino dé’é namannennungeng, bangsa Israél, iyaro bangsa parronta’é purani nakkutanang lao ri iko aga iya mattengngangngé mupogau’.
10Rimakkuwannanaro palettukengngi mennang aga Iyya, PUWANG Iya Pommatanré upowada lao ri mennang. Iyaro pasek-Ku ripattujui lao ri arungngé ri Yérusalém, sibawa sininna pabbanuwana kotaéro.
11Pakatajangngi makkedaé aga iya mupogau’éro iyanaritu lambanna aga iya kajajiyangngé matu ri yasé’na mennang, iyanaritu: mancajiwi matu mennang tau ripali sibawa ritawang.
12Ri laleng pettanna wennié naéssangngi matu arunna mennang paddokona ri salangkanna nanajoppa. Mébbui matu sebbo sining tauwé ri témbo’é kuwammengngi naulléi massu. Natongkoi matu matanna angkanna dé’ naitai laleng iya naolaé.
13Iyakiya Upallebba’i matu jala-Ku untu’ tikkengngi. Nainappa Utiwi matu ri kota Babél, nakkuwaniro maté matu tennaitani paimeng iyaro kotaé.
14Sininna monroiyéngngi saorajaé, muttama’ni sining pappangajaé nenniya pangawal paribadinna arungngéro Upassara-sarangngi matu lao ri sininna sulapa’é. Ulellungngi matu mennang sibawa Uwunoi.
15Wettunna mennang Upassara-sarang lao ri tengnga-tengngana bangsa-bangsa laingngé ri wanuwa-wanuwa laingngé, naissengngi matu mennang makkedaé Iyya’na ritu PUWANG.
16Sibagiyang céddé polé ri mennang Upassalama’i matu polé ri musué, polé ri akkadérengngé, sibawa saié, kuwammengngi ri tengnga-tengngana bangsa-bangsa laingngéro mainge’i matu mennang makkedaé purani mennang tinda matuna senna. Nanaakuiwi matu mennang makkedaé Iyya ritu PUWANG."
17Makkedai PUWANGNGE lao ri iyya,
18"Eh tolino dé’é namannennungeng, ténréno wettummu manré, mekke’no nataro tau wettummu ménung.
19Palettu’i lao risininna bangsaé aga Iyya, PUWANG Iya Pommatanré upowada lao ri pabbanuwana Yérusalém iya monroé mupa ri tanana mennang. Ténréi matu mennang wettunna manré sibawa mekke’i nataro tau wettunna ménung. Mancaji makabuttui matu tanana mennang, saba’ sininna tau iya monroé kuwaro matteru-terui majjalékkaiwi hukkungngé.
20Kota-kota iya makkekkuwangngé pennoi sibawa pabbanuwa riyancuru’i matu sibawa sining dare’na mancaji padang kessi’i. Nanaissenni mennang makkedaé iyya ritu PUWANG."
21Makkedai PUWANGNGE lao ri iyya,
22"Eh tolino dé’é namannennungeng, magi tau Israélié napojiwi teppu-teppui iyaé warékkadaé: ‘Tassulléi wettué, iyakiya teppudu-pudu kajajiyangngi botoé’?
23Nah, Palettu’i lao ri mennang makkedaé Iyya, Puwang Iya Pommatanré, mabbéréyangngi iyaé pasengngéwé: Iyaro warékkadaé uleddai matu, angkanna dé’na naripowadana paimeng ri Israélié. Selaku passulléna powadai lao ri mennang makkedaé narapini wettunna, na tungke boto kajajiyangngi matu.
24Ri Israélié dé’na matu gagana pakkitang iyaré’ga boto bellé.
25Iyya, PUWANG Iya Pommatanré mabbicara matu lao ri bangsa Israélié, na sininna iya upowadaé pasti kajaiyangngi matu, tenripasoro-pasorona. Engkalingai, éh appang parronta’é! Ri wettu tuwomu Upogagau’i matu sininna iya Uparéngngerangiyékko. Iyya, PUWANG Iya Pommatanré pura mabbicara."
26Adanna PUWANGNGE lao ri iyya,
27"Eh tolino de’é namannennungeng, makkedai sining tau Israélié makkedaé pakkitang sibawa botomu maitta mupa nappa kajajiyang.
28Rimakkuwannanaro, powadangngi mennang makkedaé Iyya, PUWANG Iya Pommatanré, makkeda: Sininna iya Upowadaé pasti kajajiyangngi matu, tenripasoro-pasoro. Iyya, PUWANG Iya Pomatanré pura mabbicara!"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel