Alkitab Mobile SABDA
[VER] : [GULLAH]     [PL]  [PB] 
 <<  1 Korintus 11 >> 

1So oona oughta do like A da do, een de same way A da do like Christ.

How fa Do Wen Oona da Woshup Togeda

2Oona da do good, cause een ebryting oona da memba me an da folla ebryting de same way A laan oona.

3Bot A wahn oona fa ondastan dat Christ de head oba ebry man, de husban de head oba e wife, an God de head ob Christ.

4So de man wa kiba e head wen e da pray o wen e da tell people God wod, e ain hona Christ.

5An de ooman wa ain kiba e head wen e da pray o wen e da tell God wod, e ain hona e husban. E like dat ooman head shabe.

6Ef a ooman ain kiba e head, den e oughta git e hair cut off. Bot wen de ooman shabe e head o cut e hair, e bring shame pon esef, so e oughta kiba e head.

7A man ain oughta kiba e head, cause God mek man like esef, an man da gii hona ta God. Bot de ooman da gii hona ta man.

8Cause God ain mek man fom paat ob ooman. God done mek ooman fom paat ob man.

9An God ain mek man fa sake ob ooman. God done mek ooman fa sake ob man.

10Cause ob dat an cause ob de angel dem, ooman oughta kiba e head, fa show dat e dey onda e husban tority.

11Stillyet, wen we lib een de Lawd way, ooman cyahn do dout man, an man cyahn do dout ooman.

12Fa true, God done tek a paat fom man an mek ooman. Same way so, e true dat man bon fom ooman. Bot all ting come fom God.

13A wahn oona fa mek op oona own mind. E right fa ooman pray ta God wen e head ain kiba?

14Fa true, de way God mek ting een dis wol laan we dat wen man hab long hair, people ain gwine spec um, ainty?

15Bot long hair fa a ooman e glory. God gim long hair fa kiba e head.

16Bot ef somebody wahn fa aagy bout dat, leh we tell um say dat dis de way we beena do, an we an de choch ob God dem ain neba do um no oda way.

De Suppa We Nyam fa Memba de Lawd

17Bot A ain gwine say oona da do good bout de ting dem dat A da come now fa chaage oona fa do. Cause wen oona geda togeda, dat do mo bad den good.

18Now dis yah de fus ting A wahn fa taak bout. A yeh say dat een oona choch meetin, oona cyahn gree wid one noda an oona wide op eenta group ginst one noda. An A bleebe dey some trute een wa A yeh.

19A spose dey haffa be group mongst oona dat cyahn gree wid one noda fa show dem mongst oona wa da waak een God way fa true.

20Wen oona geda togeda, oona kin tink oona da nyam de Lawd Suppa, bot e ain so.

21Cause wen oona nyam, ebry one ob oona go head an nyam e own food an dohn wait fa nobody else. So some people stay hongry, an some people git dronk.

22Fa sho, wen oona wahn fa nyam an drink, oona got own house fa do dat een, ainty? Oona treat God choch like dort an mek shame de people wa ain got nottin, ainty? Wa A gwine say ta oona? A gwine tell oona say oona do good bout dis? Fa sho, A ain gwine do dat!

23So den, de Lawd gii me dis wa A pass on ta oona. De same night wen dey han oba de Lawd Jedus ta dem wa beena wahn fa kill um, E pick op a bread.

24E tell God tankya fa um, an e broke um op. Den e say, “Dis me body A broke fa oona. Oona mus do same like dis fa memba me.”

25Same way so, wen dey done nyam suppa, e pick op de cup. E say, “Dis cup de nyew cobnant seal wid me blood. Oona mus do dis fa memba me wensoneba oona drink um like dis.”

26Cause til de Lawd come back, wensoneba oona nyam dis bread an drink fom dis cup, oona da mek people know dat de Lawd done dead fa all people.

27So den, wensoneba somebody da nyam de Lawd bread o drink fom e cup een a way dat ain show hona, dat poson dey, e guilty ob sin, cause e ain gii hona ta de Lawd body an e blood.

28Ebrybody oughta look eenside e haat good fa see ef e right wid God, fo e nyam de bread an drink fom de cup.

29Cause wen somebody da nyam de bread an drink fom de cup an e ain memba dat e da nyam de Lawd body an wa dat mean, dat one dey done bring de Lawd jedgiment pon esef.

30Cause ob dat jedgiment, plenty ob oona ain got no scrent, plenty ob oona sick, an some done dead.

31Ef we look eenside we haat good fa see ef we right wid God fus, fo we nyam de bread an drink fom de cup, de Lawd ain gwine jedge we.

32Bot wen de Lawd da jedge we, e da punish we so dat een de end e ain gwine haffa condemn we, long wid de people ob de wol.

33So, me Christian bredren, wen oona geda togeda fa nyam de Lawd Suppa, oona mus wait fa one noda.

34Ef one ob oona hongry, leh um nyam een e own house, so dat wen oona geda togeda, oona ain gwine bring de Lawd jedgiment pon oonasef. Now bout dem oda bidness, A gwine chaage oona bout um wen A come ta oona.



 <<  1 Korintus 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel