De Life wa God Wahn We fa Lib
1Me bredren, fo we done wid dis letta, leh we tell oona dis las ting. We done laan oona de way oona mus lib fa mek God heppy wid oona. An fa sho, dat de way oona da lib. Bot now, we da tell oona an chaage oona een de name ob we Lawd Jedus, dat oona mus lib mo an mo een God way.
2Oona know dem ting wa we been tell oona fa do, by de tority ob we Lawd Jedus.
3God wahn fa mek oona life holy, da blongst ta um fa true. E ain wahn oona fa hab nottin fa do wid loose life.
4Ebry one ob oona man dem, ya mus tek ya own ooman fa marry, een de way wa holy an right een God an een people eye.
5Mus dohn ramify roun like de people ob de wol wa ain know God.
6Een dese ting yah, bout how man oughta behabe ta ooman, no man oughta do e broda wrong. Mus dohn tek exwantage ob e broda. We done been tell oona dis fo an waan oona fa true, dat God gwine punish dem wa da do dis kind ob sin yah.
7God ain call we fa hab we lib loose life. God call we fa lib een e holy way.
8So den, ef somebody ton e back pon dis ting yah wa we da laan oona, dat one ain ton e back pon jes noda man. E ton e back pon God, wa gii oona e Holy Sperit.
9Dey ain no need fa write oona bout how oona oughta lob oona Christian bredren. Cause God been laan oona fa lob one noda.
10An fa true, oona da lob all de Christian bredren dey all oba Macedonia. Bot we bredren, we da beg oona fa go on da lob um mo an mo scronga.
11Oona mus mek op oona mind fa try fa lib peaceable an mind oona own bidness, an oona mus wok wid oona han fa earn wa oona need fa lib, jes like we done chaage oona wen we been dey wid oona.
12Ef oona do dat, oona gwine mek de people wa ain Christian spec oona. An oona ain gwine haffa pend pon nobody fa earn wa oona need.
De Lawd Jedus Gwine Come Back
13We bredren, we wahn oona fa know de trute bout de people wa done dead, so dat oona ain gwine greebe like de oda people greebe, cause dey ain got no hope een God fa life ebalastin.
14We bleebe dat Jedus done dead, bot e got op fom mongst de dead people an e da lib gin. An we bleebe dat een de same way. God gwine bring de people wa done dead wa bleebe pon Jedus. God gwine bring um long wid Jedus.
15Wen de Lawd Jedus come back, we wa ain dead yet ain gwine go head ob de Christian dem wa done dead. De Lawd Jedus done say dat.
16Cause wen de Lawd come back, people gwine yeh a loud boice gii a chaage. Den dey gwine yeh de boice ob de head angel, an God trumpet gwine blow. An de Lawd esef gwine come down fom heaben. Den dem people wa done bleebe pon Jedus wen dey dead gwine rise op fus.
17Atta dat, all ob a sudden, we Christian wa ain dead yet an wa been lef yah, we gwine be geda op een de cloud dem, long wid dem Christian wa done dead. An we all gwine go op togeda fa meet de Lawd een de sky. An so we gwine be wid de Lawd faeba.
18So den, courage one noda wid dem wod yah.
<< 1 Tesalonika 4 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel